މި މަހު ފަށާ އޭޝިއަން ކަޕް ކޮލިފައިންގައި ވާދަކުރާ ރާއްޖޭގެ ގައުމީ ފުޓްބޯޅަ ޓީމުން ފަރިތަކުރުންތައް ފަށައިފިއެވެ.

ގަލޮޅު ރަސްމީ ދަނޑުގައި ރޭ ފަރިިތަކުރުންތައް ފަށާފައިވާއިރު، މި ވަގުތު ޓީމާ ގުޅިފައިވަނީ މާޒިޔާ ސްޕޯޓްސް އެންޑް ރެކްރިއޭޝަން ފިޔަވައި އެހެން ކުލަބުތަކުގެ ކުޅުންތެރިން އެކަންޏެވެ.

ދެހާސް ހަތާވީސް ވަނަ އަހަރު ބާއްވާ އޭޝިއަން ކަޕްގެ ކޮލިފައިންގައި މި މަހުގެ 25 ވަނަ ދުވަހު ފިލިޕީންސްއާ ދެކޮޅަށް ރާއްޖެ ނުކުންނައިރު، އޭގެކުރިން ބައިނަލްއަގުވާމީ އެކުވެރިކަމުގެ މެޗެއްގައި މި މަހުގެ 19 ގައި ނުކުންނާނީ އިންޑިއާއާ ދެކޮޅަށެވެ.

ކުރިއަށް އޮތް އޭޝިއަން ކަޕްގެ ކޮލިފައިންގައި ހަ މެޗެއް ރާއްޖޭން ކުޅެން ހަމަޖެހިފައިވާއިރު، އޭގެތެރެއިން ފުރަތަމަ ތިން މެޗު ކުޅޭނީ ރަށުން ބޭރުގައެވެ. ކޮލިފައިިންގައި ރާއްޖެއާ އެކު ގްރޫޕް އޭގައި ދެން ހިމެނެނީ؛ ތަޖިކިސްތާނާއި، ފިލިޕީންސް އަދި އީސްޓް ޓިމޯ އެވެ.

އޭޝިއަން ކަޕް ކޮލިފައިންގައި ވާދަކުރާ 24 ޓީމު ވަނީ ހަ ގްރޫޕަކަށް ބަހާލައިފައެވެ. އޭޝިއަން ކަޕަށް ކޮލިފައިވަނީ ކޮންމެ ގްރޫޕެއްގެ އެއްވަނަ ހޯދާ ޓީމު އެކަންޏެވެ.

މި ފަހަރުވެސް ގައުމީ ޓީމުގެ ކޯޗެއްގެ ގޮތުގައި ފެނިގެންދާނީ ތަޖުރިބާކާރު ކޯޗު، އަލީ ސުޒެއިން އެވެ.