ENGLISH

04 އޭޕްރީލު 2025

Advertisement

އުމުރުން 40 އަހަރުގައި ޗެތުރީ އެނބުރި އިންޑިއާ ގައުމީ ޓީމަށް

07 މާރިޗު 2025

|

މުޙައްމަދު އަދުހަމް

އިންޑިއާގެ ކުރީގެ ކެޕްޓަން، ޗެތުރީ. --ފޮޓޯ: އޭޕީ

އިންޑިއާގެ ގައުމީ ޓީމަށް ކުޅުން ހުއްޓާލައިގެން ހުރުމަށް ފަހު، ކުރީގެ ކެޕްޓަން އަދި މަޝްހޫރު ފޯވާޑް، ސުނިލް ޗެތުރީ އެނބުރި ގައުމީ ޓީމާ ގުޅިއްޖެއެވެ.

އުމުރުން 40 އަހަރުގެ ޗެތުރީ ވަނީ، ކުރިއަށް އޮތް އޭޝިއަން ކަޕް ކޮލިފައިންގައި އިންޑިއާ ކުޅެން ހަމަޖެހިފައިވާ މެޗުތަކަށް ނެގި ސްކޮޑާ ގުޅިފައެވެ.

އިންޑިއާގެ ގައުމީ ޓީމަށް ޗެތުރީ އެނބުރިއައުމާ ގުޅޭގޮތުން އެ ޓީމުގެ ކޯޗު، މަނޯލޯ މާކޭޒް ބުނީ، ޗެތުރީ ޓީމާ ގުޅުނީ އޭޝިއަން ކަޕްގެ ކޮލިފިކޭޝަންގެ މުހިއްމުކަން ބޮޑުވުމުން ކަމަށެވެ.

މާކޭޒް ވަނީ، އެ މުބާރާތުގެ މުހިއްމު ކަމާއި، އިންޑިއާ އަށް ކުރިއަށް ހުރި މެޗުތަކަށް ބަލާއިރު ޗެތުރީ އަލުން ގައުމީ ޓީމަށް ގެނައުމާމެދު އޭނާއާ މަޝްވަރާކުރުމުން، އެއްބަސްވުމަކަށް އާދެވުނީ ކަމަށް ބުނެފައެވެ. މިއާއެކު، އިންޑިއާ ޓީމު އިހުނަށްވުރެ ވަރުގަދަވެފައިވާ ކަމަށް ވެސް މާކޭޒް ބުނެފައިވެއެވެ.

އިންޑިއާ ޓީމަށް ކުޅުން ހުއްޓާލި ނަމަވެސް، ޗެތުރީ މިހާތަނަށް އައީ ކުލަބު ލެވެލްގައި ކުޅެމުންނެވެ. އެގޮތުން، ޗެތުރީ ކުޅެމުން އަންނަ ބެންގަލޫރު އެފްސީއާ އެކު އިންޑިއަން ސުޕަ ލީގުގައި ވަނީ 23 މެޗުގައި 12 ލަނޑު ޖަހައިފައެވެ.

އިންޑިއާގެ ގައުމީ ޓީމަށް މިހާތަނަށް އެންމެ ގިނަ ލަނޑު ޖަހައިދީފައިވާ ޗެތުރީ އަކީ ދުނިޔޭގެ ފުޓްބޯޅައިގައި މި ވަގުތު ކުޅެމުން އަންނަ ކުޅުންތެރިންގެ ތެރެއިން ގައުމީ ޓީމަށް ބައިނަލްއަގުވާމީ މެޗުތަކުގައި ޖަހައިދިން 94 ލަނޑާއެކު، އެ ލިސްޓުގެ ތިންވަނައިގައި އުޅޭ ކުޅުންތެރިޔާ އެވެ. މި ލިސްޓުގައި ޗެތުރީ އަށް ވުރެ ކުރީގައި އުޅެނީ މިހާތަނަށް 135 ލަނޑު ޖަހައިފައިވާ ޕޯޗުގަލްގެ ކެޕްޓަން، ކްރިސްޓިއާނޯ ރޮނާލްޑޯ އާއި 112 ގޯލާއެކު ދެވަނައިިގައި އުޅޭ އާޖެންޓީނާގެ ކެޕްޓަން، ލިއޮނަލް މެސީ އެވެ.

މި ވަގުތު ދަށް ފޯމެއްގައި އޮތް އިންޑިއާ ޓީމު އެންމެ ފަހުން ކުޅުނު 12 މެޗުގެ ތެރެއިން އެންމެ މެޗަކުން ވެސް މޮޅުވެފައިނުވާއިރު، އެ ޓީމަށް ދެން އެންމެ އަވަހަށް އޮތީ މި މަހުގެ 19 ވަނަ ދުވަހު އަމިއްލަ ގައުމުގައި ރާއްޖެއާ ދެކޮޅަށް ކުޅެން އޮތް އެކުވެރިކަމުގެ މެޗެކެވެ. އެއަށްފަހު، މި މަހުގެ 25 ވަނަ ދުވަހު އިންޑިއާ ނުކުންނާނީ ބަންގްލަދޭޝްއާ ދެކޮޅަށެވެ.

ކިޔުންތެރިންގެ ހިޔާލު