ENGLISH
04 އޭޕްރީލު 2025
މެޗުގެ އޮއިވަރު ބަދަލުވެގެންދިޔައީ ސޮސިއެޑާޑަށް ޕެނަލްޓީ ލިބުނު ހިސާބުން: އަމޯރިމް
07 މާރިޗު 2025
|
ޔުނައިޓެޑްގެ ކޯޗު، އަމޯރިމް. --ފޮޓޯ: ރޮއިޓާސް
އެންމެ މަޤްބޫލު
ޔުއެފާ ޔުރޮޕާ ލީގުގައި ރޭ ސްޕެއިނުގައި ރެއާލް ސޮސިއެޑާޑާ 1-1 އިން އެއްވަރުވި މެޗުގައި އެ ޓީމަށް ޕެނަލްޓީ ލިބުނު ހިސާބުން މެޗުގެ އޮއިވަރު ބަދަލުވެގެންދިޔަ ކަމަށް މެންޗެސްޓަރ ޔުނައިޓެޑްގެ ކޯޗު، ރުބެން އަމޯރިމް ބުނެފިއެވެ.
އަމޯރިމް މިހެން ބުނީ، ރޭގެ މެޗަށްފަހު ބޭއްވި ނޫސްވެރިންގެ ބައްދަލުވުމުގައެވެ.
ރޭގެ މެޗުގެ ދެވަނަ ހާފުގެ ކުރީކޮޅު، ޔުނައިޓެޑުން ލަނޑެއް ޖަހާފައިވަނިކޮށް، ސޮސިއެޑާޑުން އެއްވަރުކުރީ ލިބުނު ޕެނަލްޓީއަކުންނެވެ. މިއީ ޕެނަލްޓީ އޭރިޔާ ތެރެއިން ޔުނައިޓެޑްގެ ކެޕްޓަން، ބްރޫނޯ ފެނާންޑޭސް އަތުގައި ބޯޅައިން ޖެހުމުން ރެފްރީ ދިން ޕެނަލްޓީއެކެވެ.
މެޗަށްފަހު ވަރަށް ބޮޑަށް ހިތްހަމަނުޖެހި ހުރެ ވާހަކަދައްކަމުން އަމޯރިމް ބުނީ، ރޭގެ މެޗުގައި ސޮސިއެޑާޑަށް ޕެނަލްޓީ ލިބުމާ ހަމައަށް ޔުނައިޓެޑުން މޮޅު ކުޅުމެއް ދެއްކި ކަމަށެވެ. އެހެންނަމަވެސް، ޕެނަލްޓީއާ ހިސާބުން މެޗުގެ ހުރިހާ ކަމެއް ބަދަލުވެގެންދިޔަ ކަމަށް އަމޯރިމް ފާހަގަކުރިއެވެ.
"މެޗުގެ ފަހު ވިއްސަކަށް މިނެޓުގައި ޓީމު ފެނުނީ ވަރަށް ބޮޑަށް ވަރުބަލިކޮށް... އަދި ޕެނަލްޓީ ލިބުމާ ހަމައަށް އަހަރެމެން މެޗު ކޮންޓްރޯލްކުރީ. ލަނޑުޖަހާނެ ފުރުޞަތުތައް ވެސް ލިބުނު،" އަމޯރިމް ބުންޏެވެ.
އަމޯރިމް ވަނީ، މެޗުތަކުގައި ޔުނައިޓެޑަށް ލިބެމުންދާ ފުރުޞަތުތަކުގެ ބޭނުންނުހިފި ލަނޑުޖެހުމުގައި މައްސަލަތައް ކުރިމަތިވަމުންދާތީވެ، އެކަން ފާހަގަކޮށްފައެވެ. އަދި، ބަލާ މީހުންނަށް އެކަން އެހާ ބޮޑަށް ފާހަގަނުވި ނަމަވެސް، ތަފާސްހިސާބުތަކަށް ބަލާލުމުން އެކަން ފެނިގެންދާނެ ކަމަށް ވެސް އަމޯރިމް ބުނެފައިވެއެވެ.
އަމޯރިމް ބުނީ، ޔުނައިޓެޑުން ލަނޑުޖަހާނެ ފުރުޞަތުތައް ތަނަވަސްކުރާ ކަމަށާއި، ބައެއް ދަނޑިވަޅުތަކުގައި މަދުވަނީ ވަރަށް ކުދިކުދި ކަންކަން ކަމަށެވެ. އެހެންނަމަވެސް، ކުރިއަށް އޮތް ތާނގާއި، މި ކަންކަން ބަދަލުވާނެ ކަމަށް އަމޯރިމް ބުންޏެވެ.