ޔުއެފާ ޗެމްޕިއަންސް ލީގުގެ ގަދަ 16 ގެ ބުރުގައި ބެންފީކާ އަތުން 1-0 އިން މޮޅުވި މެޗަށް ފަހު ބާސެލޯނާގެ ކޯޗު، ހަންސީ ފްލިކް އޭނާގެ ޓީމަށް ތައުރީފުކޮށްފިއެވެ.

ފްލިކް މިހެން ބުނީ، ރޭގެ މެޗަށްފަހު ސްޕެއިނުގެ ޓީވީ ސްޓޭޝަނެއް ކަމަށްވާ، މޫވިސްޓާ ޕްލަސް އަށް ދިން އިންޓަވިއުއެއްގައެވެ.

"މިއީ ވަރަށް ފުރިހަމަ މޮޅެއް،" ފްލިކް ބުންޏެވެ.

ފްލިކް ބުނީ، މުބާރާތުގެ ގަދަ 16 ގެ ބުރުގެ ފުރަތަމަ ލެގުގައި ރޭ ކުޅުނު މެޗުގެ ބޮޑުބައި އެއް ކުޅުންތެރިއަކު މަދުން ކުޅެން ޖެހުނު ނަމަވެސް، ބާސެލޯނާ އިން ދެއްކި ހިތްވަރާއި ވީ ޤުރުބާނީއާ މެދު ފަޚުރުވެރިވާ ކަމަށެވެ.

ރޭގެ މެޗުގެ 22 ވަނަ މިނެޓުގައި ބާސެލޯނާގެ 18 އަހަރުގެ ޑިފެންޑަރު، ޕައު ކުބާސީ އަށް ރަތް ކާޑު ދެއްކުމާ ގުޅިގެން، އެ ޓީމުގެ ކުޅުންތެރިން ދެވަނަ ހާފުގައި ރަފީނިއާ ލަނޑުޖެހުމާ ހަމައަށް ދެއްކި ޕްރޮފެޝަނަލް ކަމާއި، ދިފާއީ ކުޅުމަށް އިސްކަންދީގެން ދެއްކި ސާބިތުކަން ފްލިކް ވަނީ ފާހަގަކޮށްފައެވެ.

"އަހަރެމެން އުފާވަނީ ހަމައެކަނި މެޗު ކާމިޔާބުކުރެވުމުން އެކަންޏެއް ނޫން. މި މެޗުން މޮޅު ހާސިލްކުރިގޮތާ މެދުވެސް ހިތްހަމަޖެހޭ،" ފްލިކް ބުންޏެވެ.

އޭނާގެ ޓީމުން ވަރަށް ރަނގަޅަށް ޑިފެންސްކޮށްފައިވާ ކަމަށާއި، ޚާއްސަކޮށް ޓީމެއްގެ ގޮތުގައި ދެއްކި ދިފާއީ ކުޅުމުގެ ސަބަބުން މެޗު ކާމިޔާބުކުރުމަށް މުހިއްމު ދައުރެއް އަދާކުރިއިރު، ޓީމުގެ އެންމެހައި ކުޅުންތެރިން ކުރި ބުރަ މަސައްކަތްތައް ވެސް އެކަމުގައި ޝާމިލުވާ ކަމަށް ވެސް ފްލިކް ބުނެފައިވެއެވެ.

އުނދަގޫ ހާލަތަކުން އަރައިގަނެ، ބެންފީކާ އަތުން މުހިއްމު މޮޅެއް ހޯދި ނަމަވެސް، އަދި ދެވަނަ ލެގުގެ މެޗު ބާކީ އޮތުމުން އެއްވެސް ކަމެއް ފަސޭހަކޮށްލައިގެން ނުވާނެ ކަމަށާއި، ބެންފީކާއާ މެދު ސަމާލުވާންޖެހޭނެ ކަމަށް ވެސް ފްލިކް ބުންޏެވެ.

މީގެއިތުރުން، ބެންފީކާގެ ކުޅުންތެރިންގެ އެޓޭކުތައް ނާކާމިޔާބުކޮށްލުމުގައި ބާސެލޯނާގެ ގޯލްކީޕަރު، ވޮޝިއެކް ޝެޒްނީ އަދާކުރި ދައުރަށް ވެސް ފްލިކް ތައުރީފުކުރިއެވެ. އެގޮތުން، ފްލިކް ބުނީ، ބާސެލޯނާ އަށް ބޮޑު ގޮންޖެހުމަކާއި ކުރިމަތިލާން ޖެހުނު ދަނޑިވަޅަކު އެ ޓީމާ ގުޅި ޝެޒްނީ އަންނަނީ ތަފާތު ދައްކަމުން ކަމަށާއި، މެޗަކަށްފަހު މެޗެއްގައި އޭނާ އިތުބާރު ހޯދަމުން އަންނަ ކަމަށެވެ.