މެންޗެސްޓަރ ޔުނައިޓެޑްގެ މުހިއްމު ކުޅުންތެރިން ކަމަށްވާ، މެނުއެލް އުގާޓޭ އާއި ހެރީ މެގުއާ އަށް އަނިޔާވެ، ޔުރޮޕާ ލީގުގައި ސްޕެއިނުގެ ރެއާލް ސޮސިއެޑާޑާ ދެކޮޅަށް ކުޅޭ މެޗުގައި ނުކުޅެވޭނެ ކަމަށް އެ ކުލަބުން ބުނެފިއެވެ.

އެގޮތުން، ސޮސިއެޑާޑާ ދެކޮޅަށް ކުޅޭ މެޗަށް ސްޕެއިނަށް ދަތުރުކުރުމަށް ހަމަޖެހިފައިވާ 18 ކުޅުންތެރިންގެ ސްކޮޑުގައި މި ދެ ކުޅުންތެރިން ނުހިމެނޭއިރު، ކޯޗު ރުބެން އަމޯރިމް ވަނީ އަނިޔާއަށް ފަހު ކުޅުމަށް އެނބުރިއައިސްފައިވާ ޒުވާން މިޑްފީލްޑަރު، ޓޮބީ ކޮލީއާ އަށް ފުރުޞަތު ދީފައެވެ.

ފަހަކަށްއައިސް ޔުނައިޓެޑް ޓީމުގައި އެންމެ ރަނގަޅު ކުޅުމެއް ދައްކަމުން އަންނަ އުގާޓޭ އާއި މެގުއާ އަށް އަނިޔާވެފައިވަނީ، އާދީއްތަ ދުވަހު އެފްއޭ ކަޕްގައި ފުލަމްއާ ދެކޮޅަށް ކުޅުނު މެޗުގައެވެ.

އުމުރުން 32 އަހަރުގެ މެގުއާ އަށް އެ މެޗުގައި ލިބުނު އަނިޔާގެ ސަބަބުން ވަނީ އިތުރު ވަގުތުގެ 15 މިނެޓުގެ ދެ ހާފުގެ ކުޅުން ފެށިތަނާ ބަދަލުކޮށްފައެވެ. އުގާޓޭ އަށް އަނިޔާވެގެން ބަދަލުކޮށްފައި ވަނީ ދެވަނަ ހާފުގެ ކުރީކޮޅު އެވެ.

އުގާޓޭ އާއި މެގުއާގެ އިތުރުން ޔުނައިޓެޑްގެ އަނިޔާގައި ތިބި ކުޅުންތެރިންގެ ތެރޭގައި، ލިސަންދްރޯ މާޓިނޭޒް، އަމަދު ޑިއާލޯ، ލޫކް ޝޯ، މޭސަން މައުންޓް އަދި ކޮބީ މެއިނޫ ހިމެނެއެވެ.

މި ވަގުތު ލީގުގެ 15 ވަނައިގައި އުޅޭ ޔުނައިޓެޑަށް ފަހަކަށްއައިސް އެންމެ ރަނގަޅު ކުޅުން ދެއްކޭގޮތްވެފައިނުވީ ނަމަވެސް، ޔޫރަޕްގައި އެ ޓީމުން އަންނަނީ މޮޅު ކުޅުމެއް ދައްކަމުންނެވެ.

ޔުރޮޕާ ލީގުގެ ގަދަ 16 ގެ ބުރުގައި ސޮސިއެޑާޑްގެ ދަނޑުގައި އެ ޓީމާ ދެކޮޅަށް ޔުނައިޓެޑް ކުޅުމަށް ހަމަޖެހިފައިވާ މެޗު އޮންނާނީ ރާއްޖޭގަޑިން މާދަމާ ރޭ 10:45 ގައެވެ.