މާލެ ސިޓީ ކައުންސިލް ހިނގަމުންދާތަން މިއަދު އެ ފެންނަނީ ކައުންސިލް ހިންގާނެ ފުރުސަތު، ރައީސުލްޖުމްހޫރިއްޔާ ޑރ. މުހައްމަދު މުއިއްޒު ދެއްވަމުންދާތީ ކަމަށް މާލެ ސިޓީގެ ޑެޕިއުޓީ މޭޔަރު އަހްމަދު ނަރީޝް ވިދާޅުވެއްޖެއެވެ.

އެމްއެމްޓީވީގެ 'ބޮޑު ޚަބަރު' ޕްރޮގްރާމްގައި ވާހަކަދައްކަވަމުން ނަރީޝް ވިދާޅުވީ މިހާރުގެ ކައުންސިލް މެންބަރުން އެ މަގާމަށް އިންތިޚާބުވެވަޑައިގަތްއިރު ވެރިކަމުގައި އޮތީ އިދިކޮޅު އެމްޑީޕީން ކަމަށާ އޭރު ވެރިކަމުގައި ހުންނެވި އިބްރާހިމް މުހައްމަދު ސޯލިހު އެ ކައުންސިލާ ބައްދަލުނުކުރެއްވި ކަމަށެވެ.

ނަރީޝް ވިދާޅުވީ ނަމަވެސް އެއާ ޚިލާފަށް އޭރު މޭޔަރު ކަމުގައި ހުންނެވި މިއަދުގެ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވެރިކަމާ ހަވާލުވެވަޑައިގަތުމަށްފަހު ރާއްޖޭގެ ހުރިހާ ކައުންސިލަކާ ބައްދަލުކުރެއްވި ކަމަށެވެ. ޚާއްސަކޮށް މާލޭ ސިޓީ ކައުންސިލްގެ އޮފީހަށް ރާއްޖޭގެ ތާރީޚުގައި ފުރަތަމަ ފަހަރަށް ވެރިއަކު ވަޑައިގެން ކައުންސިލް މެންބަރުންނާ ބައްދަލުކުރެއްވީ ވެސް މި ވެރިކަމުގައި ކަމަށް ނަރީޝް ވިދާޅުވިއެވެ.

އެ ބައްދަލުވުމުުގައި ރައީސް ޑރ. މުއިއްޒު މެންބަރުންނާ ބައްދަލުކުރައްވާ ކައުންސިލްގެ ކަންބޮޑުވުންތައް އަޑުއެއްސެވި ކަން ފާހަގަކުރައްވާ ނަރީޝް ވިދާޅުވީ އެމަނިކުފާނު އެކަންކަމަށް ރިއާޔަތް ކުރެއްވުމަށް ފަހު ކައުންސިލަށް ދިމާވާ ދަތިތަކަށް ލުއިވާނެ ގޮތަށް ކަންކަން އިންތިޒާމް ކޮށްދެއްވި ކަމަށެވެ.

ނަރީޝް ވިދާޅުވީ މިއަދު މާލޭގެ މޭޔަރަކަށް ހުންނެވީ އިދިކޮޅު އެމްޑީޕީއަށް ނިސްބަތްވެވަޑައިގަންނަވާ ބޭފުޅެއް ނަމަވެސް ދައުލަތުން ބާއްވާ ހުރިހާ ރަސްމިއްޔާތުތަކާ މިނިސްޓްރީތަކުން ބާއްވާ އެކިއެކި ކަންކަމުގައި ވެސް ބައިވެރިވެވަޑައިގަތުމަށް ދައުވަތު އަރުވާ ކަމަށެވެ. އޭގެއިތުރުން އެއްވެސް މިނިސްޓްރީއަކުން ކައުންސިލާ ގުޅިގެން ކުރަންޖެހޭ ކަމެއްގައި ކައުންސިލް ބާކީ ނުކުރާ ކަމަށާ ހުރިހާ މިނިސްޓްރީއަކުން ވެސް ކައުންސިލްގެ ފުރިހަމަ ބައިވެރިވުމާއެކު ކަންކަން ކުރިއަށް ގެންދެވޭތޯ ބަލާކަން ފާހަގަކުރެވޭ ކަމަށް ނަރީޝް ވިދާޅުވިއެވެ.

މާލެ ސިޓީ ކައުންސިލްގެ އެކިއެކި ޕްރޮޖެކްޓުތަކާ ހިންގާ އެކިއެކި މަޝްރޫއުތަކަށް ފަސޭހަވާނެ ހުރިހާ ގޮތެއް ރައީސް ޑރ. މުއިއްޒުގެ އިރުޝާދުގެ ދަށުން މިނިސްޓްރީތަކުން ކުރަމުންދާކަން ނަރީޝް ތަކުރާރުކޮށް ފާހަގަކުރެއްވިއެވެ. ނަމަވެސް ކުރީ ސަރުކާރުގައި އެކަން އޮތީ މިއާ މުޅިން އިދިކޮޅަށް ކަމަށް ވެސް ނަރީޝް ވިދާޅުވިއެވެ.

ރައީސް ޑރ. މުއިއްޒުގެ މޭޔަރު ކަމުގައި ކައުންސިލް ހިންގަން ޖެހުނީ އެހާލުގައިކަން ފާހަގަކުރައްވާ ނަރީޝް ވިދާޅުވީ މިއަދު ފެންނަނީ އެ މަންޒަރު ނޫން ކަމަށެވެ. އެގޮތުން ކައުންސިލުން ކަމަކަށް އެދިއްޖެނަމަ ވަގުތުން ވަގުތަށް އެކަމެއް ހަމަޖައްސައިދޭ ކަމަށާ މިއަދު މާލެ ސިޓީ ކައުންސިލް ހިނގާތަން އެ ފެންނަނީ ކައުންސިލް ހިނގާނެ ފުރުސަތު ރައީސް ޑރ. މުއިއްޒު ދެއްވާތީ ކަމަށް ނަރީޝް ވިދާޅުވިއެވެ.