ޖަނަވާރު ގެންގުޅުމާއި ޖަނަވާރުގެ ރައްކާތެރިކަމުގެ ބިލަކީ ޖަނަވާރުންގެ ޙައްޤުތައް ރައްކާތެރިކޮށް އެތަކެތީގެ ދުޅަހެޔޮކަން ކަށަވަރުކުރުމަށްޓަކައި ސަރުކާރުން ހުށަހަޅާ ނުހަނު މުހިއްމު ބިލެއްކަމަށް، ރައްޔިތުންގެ މަޖިލީހުގެ އިއްޔެގެ ޖަލްސާގައި ޕީޕަލްސް ނެޝަނަލް ކޮންގްރެސް (ޕީއެންސީ) ގެ މެމްބަރުން ވިދާޅުވެއްޖެއެވެ.

އިއްޔެ އޮތް ރައްޔިތުންގެ މަޖިލީހުގެ 2025 ވަނަ އަހަރުގެ ފުރަތަމަ ދައުރުގެ 11 ވަނަ ޖަލްސާގައި ވަނީ ސަރުކާރުގެ ފަރާތުން ހިންނަވަރު ދާއިރާގެ މެމްބަރު މުޙައްމަދު ޢަބްދުއްރަޙްމާން މަޖިލީހަށް ހުށަހެޅުއްވި، ޖަނަވާރު ގެންގުޅުމާއި ޖަނަވާރުގެ ރައްކާތެރިކަމުގެ ބިލް، ރައްޔިތުންގެ މަޖިލީހުން ބަލައިގެންފައެވެ.

ބިލް ހުށަހަޅުއްވަމުން، ހިންނަވަރު ދާއިރާގެ މެމްބަރު މުޙައްމަދު ޢަބްދުއްރަޙްމާން ވިދާޅުވީ، ބިލުގެ މައިގަނޑު ބޭނުމަކީ ދިވެހިރާއްޖޭގައި ދެމެހެއްޓެނިވި އަދި ރައްކާތެރިގޮތެއްގައި ޖަނަވާރު ގެންގުޅުމާއި، ޖަނަވާރު ވިއްސާ އާލާ ކުރުމާއި ވިޔަފާރިކުރުމުގެ ކަންކަން ކުރުމަށް މަގުފަހިކުރުން ކަމަށެވެ. މީގެ އިތުރުން ޖަނަވާރު ގެންގުޅުމާއި ބެލެހެއްޓުމުގައި އަދި، ވިއްސާ އާލާކުރުމުގައި ޖަނަވާރުގެ ޞިއްޙަތާ ގުޅޭ ކަންކަމުގައި ޢަމަލުކުރަންވީ ގޮތާއި، ޖަނަވާރަށާއި، ޖަނަވާރުގެ ޒަރިއްޔާއިން އިންސާނުންނަށް ޖެހޭ ބަލިތަކުން ރައްކާތެރިވުމާ ގުޅޭ އުޞޫލުތައް ބަޔާންކުރުމަކީވެސް މުހިއްމު ކަމެއްކަމުގައި މެމްބަރު މުޙައްމަދު ޢަބްދުއްރަޙްމާން ވިދާޅުވިއެވެ. އަދި، ދިވެހިރާއްޖެއަށް ޖަނަވާރު އެތެރެކުރުމާއި ދިވެހިރާއްޖޭން ބޭރަށް ގެންދިއުމާއި ގުޅޭ އުޞޫލުތަކުގެ މިންގަނޑުތައް ކަނޑައެޅުމަކީވެސް މި ބިލް ހުށަހެޅުއްވުމުގެ ސަބަބެއްކަމުގައި މެމްބަރު މުޙައްމަދު ޢަބްދުއްރަޙްމާން ފާހަގަކުރެއްވިއެވެ.

މެމްބަރު މުޙައްމަދު ޢަބްދުއްރަޙްމާން ވިދާޅުވީ ދިވެހިރާއްޖޭގެ ގުދުރަތީ ވެށި ރައްކާތެރިކުރުމަށާއި، ރާއްޖޭގެ ބަޔޯ ޑައިވާސިޓީ ހިމާޔަތްކުރުމަށްޓަކައި މި ބިލަކީ މުހިއްމު ބިލެއްކަމުގައި ދެކިވަޑައިގަންނަވާ ކަމަށެވެ. އަދި، އދ ގެ ދެމެހެއްޓެނިވި ތަރައްޤީގެ ލަނޑުދަނޑިތަކުގެ ތެރެއިން 14 އަދި 15 ވަނަ ލަނޑުދަނޑިއާ ގުޅުންހުރި ކަންކަން ޙާޞިލްކުރުމަށްވެސް މި ބިލް ބާރުއަޅާކަން މެމްބަރު މުޙައްމަދު ޢަބްދުއްރަޙްމާން ފާހަގަކުރެއްވިއެވެ.

ޖަލްސާގައި ވާހަކަދައްކަވަމުން އއ. މަތިވެރި ދާއިރާގެ މެމްބަރު ޙަސަން ޒަރީރު ވިދާޅުވީ، އިއްޔެ ފާސްކުރި ބިލަކީ ޖަނަވާރުންގެ ޙައްޤުތައް ކަށަވަރުކުރުމުގެ ގޮތުން ސަރުކާރަކުން ހުށަހެޅި ފުރަތަމަ ބިލު ކަމަށެވެ.

ރައްޔިތުންގެ މަޖިލީހުގެ މާފަންނު ދެކުނު ދާއިރާގެ މެމްބަރު ޢަބްދުﷲ ރިފާޢު ވިދާޅުވީ، ޒަމާނަށް ބަލާއިރު މިއީ އަންނަންޖެހޭ ބިލެއް ކަމަށާއި، ގިނަ އަދަދެއްގެ ޒުވާނުން އެދެމުންދަނީ އެ ޒުވާނުން އެކުގައި ގެންގުޅޭ ޖަނަވާރާއި ދޫނިސޫފާސޫފި އަދި މަސްމަހާމެހި ފަދަ އެއްޗިއްސަށް ބޭނުންވާ ރައްކާތެރިކަމާއި ހިމާޔަތް ލިބިގެންދިއުން ކަމަށެވެ. އަދި ފަސޭހަކަމާއެކީގަ ޤާނޫނީ އިމުގެ ތެރެއިން މިތަކެތި ގެންގުޅުމުގެ އުޞޫލުތަކެއް ކަނޑައެޅިގެން ދިއުން ޒުވާނުން އެދޭކަމަށް މެމްބަރު ޢަބްދުﷲ ރިފާޢު ވިދާޅުވިއެވެ.

ޖަނަވާރު ގެންގުޅުމާއި ޖަނަވާރުގެ ރައްކާތެރިކަމުގެ ބިލު މިއަދު ރައްޔިތުންގެ މަޖިލީހުން ފާސްކުރީ ޖަލްސާގެ ވޯޓުގައި ބައިވެރިވެވަޑައިގެންވި 43 މެމްބަރުންގެ ވޯޓުންނެވެ. ބިލު ބަލައިގަތުމަށް މަޖިލީހުން ފާސްކުރުމާއެކު، ރައްޔިތުންގެ މަޖިލީހުގެ ރައީސް އަބްދުއްރަހީމް ޢަބްދުﷲ ވިދާޅުވީ ބިލް ދިރާސާކުރުމަށް އިޖުތިމާއީ ކޮމިޓީއަށް ފޮނުއްވާފައިވާކަމަށެވެ.