މި ރަމަޟާން މަހު މާލޭގެ 35 މިސްކިތެއްގައި 297 ދަރުސް ދޭން ނިންމާފައިވާ ކަމަށް އިސްލާމީ ކަންތައްތަކާ ބެހޭ ވުޒާރާގެ ޑިރެކްޓަރ ޖެނެރަލް، ޢަބްދުލްޢަޒީޒް އިސްމާޢިލް ވިދާޅުވެއްޖެއެވެ. 

ޢަބްދުލްޢަޒީޒް އިސްމާޢިލް މިފަދައިން ވިދާޅުވީ އެމްއެމްޓީވީގެ ބޮޑު ޚަބަރު ޕްރޮގްރާމްގައި ވާހަކަދައްކަވަމުންނެވެ. އެގޮތުން އިސްލާމީ މަރުކަޒާއި މަލިކް ސަލްމާން މިސްކިތާއި މާފަންނުގެ މިސްކިތަކާއި މައްޗަންގޮޅީ އަދި ހެންވޭރު އެއް މިސްކިތުގެ އިތުރުން ހުޅުމާލެ ފޭސް އެކެއް، ފޭސް ދޭއް އަދި ވިލިމާލެ މިސްކިތެއްގައި ދަރުސް ޕްރޮގްރާމް ގެންދިއުމަށް ހަމަޖެހިފައިވާކަމަށް ޢަބްދުލްޢަޒީޒް ފާހަގަކުރެއްވިއެވެ.

މީގެ އިތުރުން އައުޓްރީޗް ޕްރޮގްރާމްގެ މަޢުލޫމާތު ހިއްސާކުރައްވަމުން ޢަބްދުލްޢަޒީޒް ވިދާޅުވީ، ކޮންމެ ހޮނިހިރު ދުވަހެއްގެ ހަވީރު މި ޕްރޮގްރާމް ކުރިއަށް ގެންދިއުމަށް ހަމަޖެހިފައިވާ ކަމަށާއި، މި ޕްރޮގްރާމް އޮންނާނެ ތަން މީޑިއާ މެދުވެރިކޮށް އަންގަވާނެކަމަށެވެ.

ހަމައެހެންމެ ފިތުރު ޒަކާތް ބަލައިގަތުމުގެ އިންތިޒާމް ޒަކާތު ހައުސްއިން މިހާރު ހަމަޖައްސަވައި، ޢަމަލީ ގޮތުން އެ މަސައްކަތް ފަށާފައިވާކަމަށް ޢަބްދުލްޢަޒީޒް ވިދާޅުވިއެވެ. 

އަދި އޮންލައިންކޮށް ޒަކާތް ދެއްކޭނެ ނިޒާމުތައް މިހާރު ހަމަޖެހިފައިވާކަމަށާއި، ޒަކާތް ދެއްކުމަށްޓަކައި އޮންލައިން ޕްލެޓްފޯމްތައް ޤާއިމްކުރެވިފައިވާ ކަމަށް ޢަބްދުލްޢަޒީޒު ވިދާޅުވިއެވެ. 

ފިތުރު ޢީދަށް ތައްޔާރުވުމުގެ މަސައްކަތްތައް ކުރިއަށްދާކަން ފާހަގަކުރައްވާ، އޭނާ ވިދާޅުވީ މިދިޔަ އަހަރެކޭ އެއްގޮތަށް، ވިއްސާރަ ނޫން ނަމަ، މާލެ، ވިލިމާލެ އަދި ހުޅުމާލޭގެ ބޮޑެތި މައިދާންތަކުގައި އީދު ނަމާދުކުރުމުގެ އިންތިޒާމުތައް ހަމަޖެއްސުމުގެ މަސައްކަތް ކުރިއަށް ގެންދާނެކަމަށެވެ. 

އަތޮޅުތެރޭގައި ރަމަޟާން މަހާއި ދިމާކޮށް، އިސްލާމީ ކަންތައްތަކާ ބެހޭ ވުޒާރާއިން ރާވައިގެންނާއި ރަށްރަށުގެ ކައުންސިލްތަކުން އެދިގެންވެސް ވަރަށް ގިނަ ޕްރޮގްރާމްތަކެއް ހިންގާ ކަމަށް ޢަބްދުލްޢަޒީޒް ފާހަގަކުރެއްވިއެވެ. ބައެއް ރަށްރަށުން ވަރަށް ކާމިޔާބުކަމާއެކު، އެބޭފުޅުންގެ އަމިއްލަ އިޙްޔާ ފޯރަމް ކަހަލަ ފޯރަމްތައް ވެސް ކުރިއަށްގެންދާ ކަމަށް ޢަބްދުލްޢަޒީޒް ވިދާޅުވިއެވެ. 

މިފަދަ ކަންކަމުގައި ޢިލްމުވެރިންގެ ފަރާތުން ލިބޭ އެހީތެރިކަން ވުޒާރާގެ ފަރާތުން ފާހަގަކުރާ ކަމަށް ޢަބްދުލްޢަޒީޒް ވިދާޅުވިއެވެ.