ހައުސިންގ ޑިވެލޮޕްމެންޓް ކޯޕަރޭޝަން (އެޗްޑީސީ)ގެ ޗެއާމަނުގެ މަގާމުގައި ހުންނެވި ސ. ހުޅުދޫ، ރިވަރސައިޑް އަލްފާޟިލް އަޙްމަދު ނާޞިފް އެ މަޤާމުން ވަކިކޮށް ވޭސްޓް މެނޭޖްމެންޓު ކޯޕަރޭޝަން (ވެމްކޯ)ގެ ޗެއަރމަން ކަމުގެ މަޤާމަށް އައްޔަނުކޮށްފިއެވެ.

ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ)އިން މައުލޫމާތުދިންގޮތުގައި ނާޞިފް ވެމްކޯގެ ޗެއަރމަން ކަމުގެ މަޤާމަށް އައްޔަނުކުރެއްވީ މިއަދުގެ ވަގުތެއްގައެވެ.

ޕީސީބީއިން މި ބަދަލުގެނައި ސަބަބެއް ހާމަކޮށްފައެއްނުވެއެވެ. އެޗްޑީސީގެ ޗެއަރްމެންގޮތުގައި ނާޞިފް އައްޔަނުކުރީ މިދިޔަ އަހަރުގެ ނޮވެމްބަރު މަހުގައެވެ. 

އެޗްޑީސީގެ ޗެއާމަނުގެ މަގާމަށް އައްޔަންކުރުމުގެ ކުރިން އޭނާ ހުންނެވީ ރީޖަނަލް އެއާޕޯޓްސް ކުންފުނީގެ ޗެއާމަނުގެ މަގާމުގައެވެ. އޭނާއަކީ ރައީސް އަބްދުﷲ ޔާމީނުގެ ވެރިކަމުގައި އެޗްޑީސީގެ އިސް މަގާމުތައް އަދާކުރެއްވި ބޭފުޅެކެވެ.