ރޯދަމަހަށް ތައްޔާރުވުމުގެ ގޮތުން ރައްޔިތުންނަށް ބޭނުންވާ ބައެއް ޒަރޫރީ ބާވަތްތަކުގެތެރެއިން ލިބުމުގައި ދަތިވާނެ ކަމަށް ބެލެވޭ ބައެއް ބާވަތްތައް ރޯދައިގެ ކުރިން ގެނަސްފައިވާ ކަމަށް އެސްޓީއޯގެ މެނޭޖިންގް ޑިރެކްޓަރު ޝިމާދު އިބްރާހިމް ވިދާޅުވެއްޖެއެވެ. 

ދައުލަތުގެ މީޑިއާއިން ގެނަސްދިން 'ރޯދައަށް ތައްޔާރު' ފޯރަމުގައި ވާހަކަދައްކަވަމުން ޝިމާދު ވިދާޅުވީ ރޯދައަށް ތައްޔާރުވުމުގެ ގޮތުން އެސްޓީއޯއިން ވެސް ގިނަ މަސައްކަތްތަކެއް ކޮށްފައިވާ ކަމަށެވެ. އެގޮތުން މާލޭގެ އިތުރުން އެސްޓީއޯގެ ފިހާރަ ހުންނަ ބައެއް ރަށްރަށުގަ ވެއާހައުސް ސޭލެއް ކުރިއަށްގެންދިއަކަށް އޭނާ ވިދާޅުވިއެވެ. 

ޝިމާދު ވިދާޅުވީ އެއީ ރޯދަމަހު ބޭނުންކުރާ ބަދިގޭ ސާމާނުތައް އަގުހެޔޮކޮށް ފޯރުކޮށްދޭން ބޭއްވި ސޭލެއް ކަމަށެވެ. އަދި އެކަމަށް ވަރަށް ބޮޑު ތަރުހީބެއް ލިބުނު ކަމަށް ވެސް އޭނާ ވިދާޅުވިއެވެ. އެކަމާ ގުޅިގެން އިތުރު ސްޓޮކްތަކެއް ވެސް ގެނަސްފައިވާ ކަން ޝިމާދު ފާހަގަކުރެއްވިއެވެ.

އޭގެ އިތުރަށް ރޯދަމަހަށް ބޭނުންވާ ކާބޯތަކެތީގެ ލިސްޓު ކޮންމެ ހަފުތާއަކު އެއްފަހަރު ރިވީއުކުރަމުންދާކަން ޝިމާދު ފާހަގަކުރެއްވިއެވެ. 

ޝިމާދު ވިދާޅުވީ މި ބައްދަލުވުންތަކުގައި ބާޒާރުގެ އަގުތަކަށް އަންނަ ބަދަލު ދަނެގަތުމާ މުދާތައް މަދުވަނީ ކޮން ހިސާބުތަކެއްގައިތޯ އަދި އެއީ ކޮން މުދަލެއްތޯއާ ކޮންކަހަލަ ގައުމުތަކުންތޯ މުދާތައް ގެނެވޭނީ ބަލާފައިވާ ކަމަށެވެ. އެކަންކަން ބެލުމަށްފަހު ރޯދައިގެ ކުރިންވެސް ބައެއް ޝިޕްމަންޓުތައް ގެނަސްފައިވާ ކަމަށް އޭނާ ވިދާޅުވިއެވެ. 

އެސްޓީއޯގެ ރޯލަކީ ވިޔަފާރިވެރިންނަށް ދަތިވާ ދުވަސްކޮޅެއްގަ، މާކެޓަށް އަންނަ ބަދަލުތަކާއެކު ބައެއްފަހަރު އަގު ކުޑަކުރަން އެހީވުމާ ތަކެތި މަދުވާފަހަރުތަކުގައި، މުދާ ބާޒަރަށް ވާސިލުވުމުގައި މައްސަލައެއް އުޅޭނަމަ އެކަމެއް ހައްލުކުރުން ކަމަށް ޝިމާދު ވިދާޅުވިއެވެ.

ޝިމާދު ވިދާޅުވީ މި ރޯދަމަހު ވެސް ފިޔާ، އަލުވި އަދި ބިސް ލިބުމުގައި ދަތިވެދާނެ ކަމަށް އަންދާޒާކުރެވުނު ކަމަށެވެ. އޭގެއިތުރުން އާންމުކޮށް ބޭނުންކުރާ ބާވަތްތަކުގެ ތެރެއިން ކާށި އަދި ލުނބޯ ބާޒާރުގައި މަދުވުމާ އަގުތައް އަރައިގެން ދިއުން އެކަށީގެންވުމާއެކު އެ ބާވަތްތަކުގެ ޝިޕްމަންޓުތައް ވެސް ގެނަސްފައިވާ ކަމަށް އޭނާ ވިދާޅުވިއެވެ. 

ޝިމާދު ވަނީ މި ރޯދަމަހު، ރައްޔިތުން ބޭނުންވާ މިފަދަ ބާވަތްތައް އެއްވެސް ދަތިކަމެއް ނެތި ރައްޔިތުންނަށް ލިބެމުންދާކަން ކަށަވަރު ކުރުމަށްޓަކައި މަސައްކަތް ކުރާނެ ކަމަށެވެ.