ދިވެހި ސަރުކާރުގެ ފަރާތުން ރޯދަ ހަދިޔާގެ ގޮތުގައި ރައްޔިތުންނަށް ހަދިޔާކުރާ މަސްދަޅު ކޭސް ބެހުމުގެ މަސައްކަތުގައި ސިފައިންނާއި ސްޓެލްކޯގެ މުވައްޒަފުން ވެސް ހަރަކާތްތެރިވާން ފަށައިފިއެވެ.

ރައްޔިތުންނަށް ލުއިފަސޭހަ ގޮތަކަށް މަސްދަޅު ބެހުމުގެ ކަންކަން ހަމަޖައްސައިދިނުމުގެ ގޮތުން ސަރުކާރުން ވަނީ 13 މަރުކަޒެއްގައި މަސްދަޅު ބެހުމުގެ މަސައްކަތް މިހާރު ފަށާފައެވެ. އަދި އޮންލައިން ޕޯޓަލްއެއް މެދުވެރިކޮށް، މަސްދަޅު ކޭސް ނަގަން ބޭނުންވާ މަރުކަޒު އަދި ވަގުތު އިޚްތިޔާރުކޮށް ޓޯކަން ނެގޭނެ ގޮތަށް ވެސް ހަމަޖައްސަވާފައެވެ.

ސްޓެލްކޯގެ މުވައްޒަފުން ޕޮލްކޯ ފްލެޓް ސީ ބްލޮކްގައި މަސްދަޅު ކޭސް ބެހުމުގައި ހަރަކާތްތެރިވަނީ

މި މަސައްކަތަށް އެއްބާރުލުން ދިނުމުގެ ގޮތުން ސިފައިން ވަނީ ގަލޮޅު ދަނޑުގައި ގާއިމް ކޮށްފައިވާ ހަތަރު ޑިސްޓްރިބިއުޓިން ސަރަހައްދުގައި ހަރަކާތްތެރިވެފައެވެ. މީގެ އިތުރުން ސްޓެލްކޯގެ މުވައްޒަފުން ވަނީ ޕޮލްކޯ ފްލެޓް ސީ ބްލޮކްގައި މަސްދަޅު ކޭސް ބެހުމުގައި ހަރަކާތްތެރިވެފައެވެ. މިފަދަ ކަންކަމުގައި ސްޓެލްކޯގެ މުވައްޒަފުންގެ ފަރާތުން ލިބެމުން އަންނަ އެއްބާރުލުމަށް އެކުންފުނީގެ މެނޭޖިން ޑިރެކްޓަރ ހުސައިން ފަހުމީ ވަނީ ޝުކުރު އަދާކުރައްވާފައެވެ.

މަސްދަޅު ކޭސް ދޫކުރުމަށް ކަރަންޓު މީޓަރ ނަމްބަރު ބޭނުންވެއެވެ. އޮންލައިންކޮށް ނަމްބަރު ނެގުމުގެ ކުރިން ގިނަބަޔަކު ސްޓެލްކޯގެ މީޓަރ ނަމްބަރު ހޯދުމަށް، ސްޓެލްކޯގެ އެޕްލިކޭޝަން ބޭނުންކުރަމުން ދިޔަ ވަގުތެއްގައި އެ ކުންފުނީގެ މޮބައިލް އެޕްލިކޭޝަންއަށް ވަނީ ޑީޑޮސް ހަމަލާއެއް އަމާޒު ވެފައެވެ. މިކަމުގެ ސަބަބުން ވަގުތު ކޮޅަކަށް އެޕްލިކޭޝަން ހުއްޓުނު ނަމަވެސް ކުޑަ ވަގުތު ކޮޅެއްގެ ތެރޭގައި އެ ކުންފުނިން ވަނީ ހަމަލާތައް ހުއްޓުވާފައެވެ.

މި އަހަރުގެ ރަމަޟާން މަހުގެ ރޯދަ ހަދިޔާގެ ގޮތުގައި ސަރުކާރުން ދުކުރާ މަސްދަޅު ކޭސް، ހުރިހާ ގޭބިސީއަކަށް ލިބެންދެން މަސްދަޅު ކޭސް ބެހުމުގެ މަސައްކަތް ކުރިއަށް ގެންދަވާނެ ކަމަށް ސަރުކާރުން ވަނީ ބުނެފައެވެ.