ENGLISH

04 އޭޕްރީލު 2025

Advertisement

މިދިޔަ އަހަރު ނިމުނުއިރު ގްރީން ފަންޑުގައި 1.6 ބިލިއަން ރުފިޔާ، ޚަރަދު ކުރީ 645 މިލިއަން ރުފިޔާ

22 ފެބްރުއަރީ 2025

|

ޝާމަ ޝުޢައިބު

ފިނޭންސް މިނިސްޓްރީ - ފޮޓޯ: ދަ މޯލްޑިވްސް ޖަރނަލް

ފާއިތުވި 2024 ވަނަ އަހަރު ނިމުނު އިރު ގްރީން ފަންޑުގައި 1.6 ބިލިއަން ރުފިޔާ ހުރި ކަމަށް ފިނޭންސް މިނިސްޓްރީގެ ތަފާސްހިސާބުތަކުން ދައްކައިފިއެވެ. 

އެ މިނިސްޓްރީން އާންމު ކުރައްވާފައިވާ ތަފާސްހިސާބުތައް ދައްކާގޮތުން 2024 ވަނަ އަހަރު ފެށުނުއިރު ގްރީން ފަންޑުގައި ހުރީ 1.1 ބިލިއަން ރުފިޔާއެވެ. 

ތަފާސްހިސާބުތަކަށް ބަލާއިރު ގްރީން ފަންޑަށް އެންމެ ގިނަ އަދަދެއްގެ ފައިސާ ޖަމާކޮށްފައިވަނީ މިދިޔަ އަހަރުގެ މާޗު މަހުއެވެ. އެ މަހު 113,842,019 (ސަތޭކަ ތޭރަ މިލިއަން އަށް ލައްކަ ސާޅީސް ދެހާސް ނަވާރަ) ރުފިޔާ ވަނީ ޖަމާކޮށްފައެވެ. އެ މަހު ގްރީން ފަންޑުން ޚަރަދު ކޮށްފައިވަނީ 19,892,682 (ނަވާރަ މިލިއަން އަށް ލައްކަ ނުވަދިހަ ދެހާސް ހަ ސަތޭކަ އަށްޑިހަ ދެ) ރުފިޔާއެވެ. މާޗު މަހު ގްރީން ފަންޑުގައި ހުރީ ޖުމްލަ 93,949,336.5 (ނުވަދިހަ ތިން މިލިއަން ނުވަ ލައްކަ ސާޅީސް ނުވަ ހާސް ތިން ސަތޭކަ ތިރީސް ހަ ރުފިޔާ، ފަސް ލާރި) އެވެ. 

ގްރީން ފަންޑުން އެންމެ ބޮޑު ޚަރަދެއް ކޮށްފައިވަނީ މިދިޔަ ޑިސެމްބަރު މަހު އެވެ. އެ މަހު ޖުމްލަ 172,417,129.5 (ސަތޭކަ ހަތްދިހަ ދެ މިލިއަން ހަތަރު ލައްކަ ސަތާރަ ހާސް ސަތޭކަ ނަވާވިސް ރުފިޔާ ފަސް ލާރި) ޚަރަދުކޮށްފައިވެއެވެ. އެ މަހު އެ ފަންޑަށް ޖަމާކުރީ 109,461,742.3 (ސަތޭކަ ނުވަ މިލިއަން ހަތަރު ލައްކަ ފަސްދޮޅަސް އެއް ހާސް ހަތްސަތޭކަ ސާޅީސް ދެ ރުފިޔާ ތިން ލާރި) އެވެ. 

ޑިސެމްބަރު މަހު ގްރީން ޓެކުހުގެ ގޮތުގައި 109 މިލިއަން ރުފިޔާ ލިބިފައިވާ ކަމަށްވެސް ފިނޭންސް މިނިސްޓްރީން އާންމުކުރެއްވި ތަފާސްހިސާބުތަކުން ދައްކައެވެ. އެގޮތުން އެ މަހު އެންމެ ގިނައިން ޓެކްސް ލިބިފައިވަނީ ރިސޯޓުތަކުންނެވެ. ރިސޯޓުތަކުން ގްރީން ޓެކުހުގެ ގޮތުގައި ޑިސެމްބަރު މަހު 95 މިލިއަން ރުފިޔާ ވަނީ ލިބިފައެވެ. 

އޭގެ އިތުރުން ދެވަނައަށް އެންމެ ގިނައިން ގްރީން ޓެކްސް ލިބިފައިވަނީ ގެސްޓްހައުސްތަކުންނެވެ. ގެސްޓްހައުސްތަކުން ގްރީން ޓެކުހުގެ ގޮތުގައި ލިބިފައިވަނީ 7.9 މިލިޔަން ރުފިޔާއެވެ.

އޭގެއިތުރުން ޓޫރިސްޓު ހޮޓާތަކުން 2.3 މިލިޔަން ރުފިޔާ، ސަފާރީތަކުން 3.6 މިލިޔަން ރުފިޔާ އަދި ހޯމްސްޓޭއިން ގްރީން ޓެކުހުގެ ގޮތުގައި 38،025 ރުފިޔާ ލިބިފައިވެއެވެ.

ޖެނުއަރީ މަހުގެ އެއް ވަނަ ދުވަހުން ފެށިގެން ގްރީން ޓެކްސް ނަގަމުންދާ ރޭޓުތަކަށް ސަރުކާރުން ވަނީ ބަދަލު ގެނެސްފައެވެ. އެގޮތުން ޓޫރިޒަމާ ބެހޭ ގާނޫނަށް ގެނައި އިސްލާހުގައި ބުނެފައިވަނީ 50 އަށް ވުރެ މަދު ކޮޓަރި ހުންނަ ގެސްޓުހައުސްތަކަށް އަންނަ ކޮންމެ ފަތުރުވެރިއެއްގެ އަތުން ގްރީން ޓެކްސް އަށް ނަގާ އަދަދު ތިން ޑޮލަރުން 6 ޑޮލަރަށް ބޮޑުކުރުމަށެވެ. ފަންސާހަށް ވުރެ ގިނަ ކޮޓަރި ހުންނަ ގެސްޓު ހައުސްތަކަށް އަންނަ ކޮންމެ ފަތުރުވެރިއެއްގެ އަތުން ނަގާ އަދަދު ވެސް 6 ޑޮލަރުން 12 ޑޮލަރަށް ބޮޑުކުރުމަށް ވެސް ނިންމާފައިވެއެވެ.

ސަރުކާރުން އަންދާޒާ ކުރަނީ، މި ބިލު ތަންފީޒުވުމާ އެކު ދައުލަތަށް ގްރީން ޓެކުހުގެ ގޮތުގައި ލިބޭ އާމްދަނީ އަންނަ އަހަރު 963.6 މިލިއަން ރުފިޔާއިން އިތުރުވާނެ ކަމަށެވެ. އަދި އެކަމުގެ ސަބަބުން ދައުލަތުގެ ބަޖެޓު ޑެފިސިޓް ދެމެހެއްޓެނިވި މިންގަނޑަކަށް ކުޑަކުރަން ބާރު ލިބޭނެ ކަމަށް ވެސް ބުނެފައިވެއެވެ.

ގްރީން ޓެކުހަކީ ތިމާވެށްޓާ ގުޅުންހުރި މަސައްކަތްތައް ކުރުމަށް މާލީ އެހީ ހޯދުމަށް، ރާއްޖެ އަންނަ ފަތުރުވެރިންގެ އަތުން ނަގަމުން އަންނަ ޓެކުހެކެވެ. މި ޓެކްސް ރިސޯޓްތަކާއި، ގެސްޓްހައުސްއާއި، ސިޓީ ހޮޓާތަކާއި، ސަފާރީތަކަށް އަންނަ ފަތުރުވެރިން ވެސް ދައްކަންޖެހެއެވެ.

ކިޔުންތެރިންގެ ހިޔާލު