ސަޢޫދީޢަރަބިއްޔާގެ ތައުސީސީ ދުވަހުގެ މުނާސަބަތުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، އެ ޤައުމުގެ ރަސްގެފާނު ސަލްމާން ބިން ޢަބްދުލް ޢަޒީޒަށާއި، ވަލީއަހުދު މުޙައްމަދު ބިން ސަލްމާން އަދި އެ ޤައުމުގެ އުޚުއްވަތްތެރި ރައްޔިތުންނަށް ތަހުނިޔާ ވިދާޅުވެއްޖެއެވެ.

މީސްމިޑީއާ މަންސަ އެކްސްގެ އެމަނިކުފާނުގެ ރަސްމީ އެކައުންޓުން ޢަރަބި ބަހުން ހިއްސާކުރެއްވި މެސެޖުގައި ރައީސުލްޖުމްހޫރިއްޔާ ވަނީ، ސަޢޫދީ ޢަރަބިއްޔާއަށް އިތުރު ތަރައްޤީ އާއި ފާގަތިކަމާއި ރައްކާތެރިކަމާއި ހަމަޖެހުން މާތް ﷲ މިންވަރުކުރައްވާނޭކަމަށް އުންމީދުކުރައްވާ ކަމަށް ވިދާޅުވެފައެވެ.

ކޮންމެ އަހަރެއްގެ ފެބްރުއަރީ މަހުގެ 22 ވަނަ ދުވަސް ސަޢޫދީ ޢަރަބިއްޔާއިން ފާހަގަކުރަނީ އެ ޤައުމުގެ ތައުސީސީ ދުވަސް ނުވަތަ އެ ގައުމުގެ ފުރަތަމަ ދައުލަތް އުފެދުނު ދުވަހާ ގުޅުވައިގެންނެވެ. އެ ދުވަސް އިޙުތިފާލުކުރަނީ، ޙިޖުރީ ސަނަތުން 1139 ވަނަ އަހަރު، އިމާމް މުޙައްމަދު ބިން ސައުދު، ސަޢޫދީ ދައުލަތް ޤާއިމުކުރެއްވުމާ ގުޅިގެންނެވެ.