ހދ. ކުޅުދުއްފުށި ސިޓީގައި ސިހުރު ހަދާކަމުގެ ތުހުމަތުގައި 10 ގެއެއް ބަލާ ސިހުރުފޮތްތަކެއް އަތުލައިގެންފިއެވެ.

ފުލުހުންގެ އިދާރާއިން ވިދާޅުވި ގޮތުގައި އިއްޔެ ކުޅުދުއްފުށި ސިޓީގައި ވަނީ ފުލުުހުންގެ ބޮޑު އޮޕަރޭޝަނެއް ކުރިއަށް ގެންގޮސްފަ އެވެ. މި އޮޕަރޭޝަން ކުރިއަށް ގެންގޮސްފައި ވަނީ އެ ރަށުގައި ސިހުރު ހަދާ ކަމަށް ތުހުމަތު ކުރެވޭ މައްސަލައެއް ރިޕޯޓް ކުރުމުންނެވެ.

ކޯޓް އަމުރެއް ހޯދައިގެން ފުލުހުން ވަނީ އެ ސިޓީގެ 10 ގެއެއް ބަލާ ފާސްކޮށްފަ އެވެ. ފުލުހުން ވިދާޅުވީ 8 ގެއަކުން ސިހުރުގެ ކިޔުންތަކާއި ފޮތްތަކެއް ފެނުނު ކަމަށެވެ. އަދި ސިހުރު ހަދަން ގެންގުޅޭ ކަމަށް ބެލެވޭ އާލާތްތަކެއް ވެސް ފެނިފައިވާ ކަމަށް ވިދާޅުވި އެވެ.

އެކަމުގެ ތުހުމަތުގައި އެއްވެސް މީހަކު ހައްޔަރު ކުރި ކަމަކަށް ވިދާޅެއް ނުވެ އެވެ.

އަދި ވިދާޅުވީ އެ މައްސަލަ ތަހުގީގު ކުރަމުންދާ ކަމަށެވެ.