ރަމަޟާން މަހު ބާޒާރުގައި ކާބޯތަކެތީގެ ބާވަތްތަކުގެ އަގު އުފުލުނަ ނުދިނުމަށް ވިޔަފާރި ކުންފުނިތަކުން ދޭ އެއްބާރުލުމަށް އިޤްތިޞާދީ ތަރައްޤީ އާއި ވިޔަފާރިއާ ބެހޭ ވަޒީރު މުޙައްމަދު ސަޢީދު ޝުކުރު އަދާކުރައްވައިފިއެވެ.

ވަޒީރު ސަޢީދު އެކްސްގައި މިއަދު ކުރެއްވި ޕޯސްޓެއްގައި ވިދާޅުވީ ރަމަޟާން މަހު ކެއިންބުއިމުގައި ބޭނުންކުރާ ތަކެތި އަގު އުފުލުނަނުދީ، ލިބޭނެ އިންތިޒާމް ހަމަޖެއްސެވުމުގައި، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ރައްޔިތުންގެ ލުއި ފަސޭހައަށް އަޅުއްވާ އޯގާތެރި ފިޔަވަޅުތަކުގައި ސަރުކާރު އަދި އަމިއްލަ ކުންފުނިތައް ބައިވެރިވަމުންދާތީ، ދެއްވާ އެއްބާރުލުމަށް އެފަރާތްތަކަށް ޝުކުރު އަދާކުރައްވާކަމަށެވެ.

ފާއިތުވި ރަމަޟާން މަހެކޭ އެއްފަދައިން މި އަހަރުގެ ރަމަޟާން މަހު ރައްޔިިތުންނަށް އެއްވެސް ދައްޗެއް ނުވަތަ ތަކުލީފެއް ކުރިމަތިނުވާނެހެން ކަންކަން އިންތިޒާމުކުރެއްވުމަށް ސަރުކާރުގެ ވުޒާރާތައް ގުޅިގެން މަސައްކަތްކުރައްވަމުން ގެންދަވާކަމަށް ވަޒީރު ވަނީ ކުރިން ވިދާޅުވެފައެވެ. 

ސަޢީދު ވިދާޅުވީ، މިދިޔަ އަހަރު ރަމަޟާން މަހުގެ އިންތިޒާމުތައް ކުރިއަށްގެންދިޔައީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ޚާއްސަ ބެއްލެވުމުގެ ދަށުން ކަމަށާއި، އެގޮތުން މިދިޔަ އަހަރަކީ ފަހުގެ ތާރީޚުގައި ބާޒާރުގެ އަގުތައް އެންމެ ރަނގަޅަށް މެނޭޖްކުރެވުނު އަހަރު ކަމަށެވެ.