ކައުންސިލް އިދާރާތައް އަލުން ޢިމާރާތްކުރުމަށް ރައީސްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ނިންމެވި ނިންމެވުމާ ގުޅިގެން ކުރިއަށް ގެންދިޔުމަށް ނިންމާފައިވާ 55 ކައުންސިލް އިދާރާގެ މަސައްކަތުގެ ދަށުން އިމާރާތް ކުރުމުގެ މަސައްކަތް އަންނަ އޭޕްރީލް މަހު ރަސްމީކޮށް ފެށޭނެ ކަމަށް ލޯކަލް ގަވަމެންޓް މިނިސްޓަރު އާދަމް ޝަރީފް ޢުމަރު ވިދާޅުވެއްޖެއެވެ.

ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން މިނިސްޓަރު ވިދާޅުވީ މި މަޝްރޫއަކީ ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ރަށްރަށަށް ޒިޔާރަތްކުރެއްވި އިރު ބައެއް ރަށްރަށުގެ ކައުންސިލް އިދާރާތަކުގެ ހާލަތު ފެނިވަޑައިގެން ބައުވެ، ވީރާނާވެފައިވާ އިމާރާތްތަކާ، ދިމާވެެފައިވާ ޖާގައިގެ ދަތިކަން ހައްލުކުރެއްވުމަށް އެމަނިކުފާނު ނިންމެވި ނިންމެވުމާ ގުޅިގެން ފެށުނު މަޝްރޫޢުއެއް ކަމަށެވެ. 

މިނިސްޓަރު ވިދާޅުވީ އެ މަޝްރޫއު ކޮންޓްރެކްޓް އެންޑް ފައިނޭންސްގެ ދަށުން ކުރުމަށް ކަނޑައަޅުއްވާ، މިހާރު މެލޭޝިއާގެ ހެކްސްޓަރ ގްލޯބަލް ކުންފުންޏާ ހަވާލުކުރެވިފައިވާ ކަމަށެވެ.

ލިބިފައިވާ ފަހުގެ މައުލޫމާތަށް ބަލާއިރު މި މަހުގެ 28 ގައި އެ ކުންފުނީގެ ޓީމެއް ރާއްޖެ އަންނާނެކަން ހާމަކުރައްވާ މިނިސްޓަރު ވިދާޅުވީ މިހާރު އެއްކުރެވިފައިވާ މައުލޫމާތަށް ބަލާއިރު އޭޕްރީލް މަހުގެ ތެރޭގައި އިމާރާތް ކުރުމުގެ މަސައްކަތް ރަސްމީކޮށް ފެށިގެންދާނެ ކަމަށެވެ. 

މި މަޝްރޫއުގެ ޖުމްލަ އަގަކީ 36 މިލިއަން ޑޮަލަރުކަމަށް ވެސް މިނިސްޓްރީން ވަަނީ ބުނެފައެވެ. 

ބައުވެ ވީރާނާވެފައިވާ، ރަށްރަށުގެ ކައުންސިލް އިދާރާތައް ޢިމާރާތްކުރުމުގެ މަސައްކަތަކީ ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، ޚާއްޞަ އިސްކަމެއް ދެއްވައިގެން ކުރިއަށް ގެންދަވައި މަޝްރޫޢެކެވެ. ކޮންޓްރެކްޓަރ ފައިނޭންސް އުޞޫލުން ޢިމާރާތްކުރުމަށް ހަމަޖެހިފައިވާ 55 ކައުންސިލްގެ އިތުރުން، ޕީއެސްއައިޕީ ޕްރޮޖެކްޓްގެ ތެރޭން 50 ކައުންސިލެއްގެ އިދާރާ ވެސް ޢިމާރާތްކުރާ ގޮތަށް ވަނީ ހަމަޖެހިފައެވެ. ޕީއެސްއައިޕީ ޕްރޮޖެކްޓްގެ ތެރޭގައި ހިމެނޭ ކައުންސިލްތަކުގެ މަސައްކަތް ވެސް ކައިރި ތާރީޚެއްގައި ފެށިގެން ދާނެ ކަމަށް ލަފާކުރެވޭކަމަށް އެއިދާރާއިން ވިދާޅުވެއެވެ.