މަޝްހޫރު އޮންލައިން ގޭމިން ޕްލެޓްފޯމް ރޮބްލޮކްސް އިން 13 އަހަރުން ދަށުގެ ކުދިންނަށް އަމާޒުކޮށްގެން އިތުރު ރައްކާތެރިކަމުގެ ފިޔަވަޅުތަކެއް ތަޢާރަފުކުރާނެ ކަމަށް އިއުލާނުކޮށްފިއެވެ.

މިއީ ޅަ އުމުރުގެ ކުދިން ރައްކާތެރިކުރުމަށް އެޅޭ ފިޔަވަޅުތަކާ ގުޅޭގޮތުން ކުރެވުނު ފާޑުކިޔުންތަކަށް ފަހު އަޅާ ފިޔަވަޅުތަކެކެވެ.

ދުނިޔޭގެ އެކި ކަންކޮޅުތަކުން ގާތްގަނޑަކަށް 70 މިލިއަން މީހުން ދުވާލަކު ބޭނުންކުރާ މި ހިލޭ އޮންލައިން ގޭމިން ޕްލެޓްފޯމްގައި ކުޅޭ މީހުންނަށް އަމިއްލައަށް ގޭމްތައް ހަދައި އަދި އެހެން މީހުން ހަދާފައިވާ ގޭމްތައް ކުޅެވެއެވެ. މި ޕްލެޓްފޯމަކީ ޚާއްޞަކޮށް ކުޑަކުދިންގެ މެދުގައި މަޤްބޫލު ޕްލެޓްފޯމެކެވެ. ނަމަވެސް ބައެއް ފަރާތްތަކުން ޝަކުވާކޮށްފައިވަނީ މި ސައިޓުގައި ހިތްދަތިކަން ލިބޭ އަދި ގެއްލުންދެނިވި ކޮންޓެންޓްތަކަށް ހާމަވެފައިވާ ކަމަށެވެ.

ޑިސެމްބަރު 3 އިން ފެށިގެން، ގޭމް ހަދާ ފަރާތްތަކުން އެ ގޭމްތަކަކީ 13 އަހަރުން ދަށުގެ ކުދިންނަށް އެކަށީގެންވާ ގޭމްތަކެއްތޯ ބަޔާންކުރަން ޖެހޭނެއެވެ. އަދި މިގޮތަށް ބަޔާންނުކުރާ ގޭމްތައް 12 އަހަރާއި އޭގެ ދަށުގެ ކުދިންނަށް ބްލޮކްކުރެވޭނެއެވެ.

މީގެ އިތުރުން، ނޮވެމްބަރު 18 އިން ފެށިގެން 13 އަހަރުން ދަށުގެ ކުދިންނަށް "ސޯޝަލް ހޭންގްއައުޓް" ތަކަށް ވަނުން މަނާކުރެވޭނެއެވެ. މިއީ ކުޅޭ މީހުންނަށް ޓެކްސްޓް އަދި އަޑުން އެއްބަޔަކު އަނެއްބަޔަކާ ވާހަކަދެއްކޭ އޮންލައިން ތަންތަނެވެ.

މި ބަދަލުތައް އަވަހަށް ގެންނަން އިޢުލާނުކުރި ނަމަވެސް، މި ޝަރުތުތައް ތަންފީޒުކުރަން ފަށާނީ 2025 ވަނަ އަހަރުން ފެށިގެން ކަމަށް ރޮބްލޮކްސްއިން ބުނެފައިވެއެވެ.