ގޭންގުތަކުން ހިންގާ ކުށްތަކާއި އެ ނޫންވެސް ނުރައްކާތެރި ކުށްތައް ހުއްޓުވުމުގެ ބިލާ ގުޅިގެން ރައްޔިތުންގެ މަޖިލީހުގެ ސަރުކާރު ތަމްސީލުކުރާ ޕީޕަލްސް ނެޝަނަލް ކޮންގްރެސް (ޕީއެންސީ)ގެ މެމްބަރުން ކަންބޮޑުވުން ފާޅުކުރައްވައިފި އެވެ.

މިއަދު ބޭއްވި ރައްޔިތުންގެ މަޖިލީހުގެ ޖަލްސާގައި ވަނީ މައްޗަންގޮޅި ދެކުނު ދާއިރާގެ މެމްބަރު މުސްތަފާ ހުސެއިން މަޖިލީހަށް ހުށަހެޅުއްވި އެ ބިލުގެ އިބްތިދާއީ ބަހުސްގެ މަރުހަލާ ނިންމަލައި ދިރާސާކުރުމަށްޓަކައި ޖުޑިޝަރީ ކޮމިޓީއަށް ފޮނުއްވާފަ އެވެ.

މި ބިލަށް ބަހުސްކުރައްވަމުން މާފަންނު މެދު ދާއިރާގެ މެމްބަރު އަބްދުﷲ ރިފާއު ފާޅުކުރެއްވި އެއް ކަންބޮޑުވުމަކީ އެ ބިލުގެ ސުރުޚީގައި " ގޭންގު" ކުށްތައް ކަމަށް ބަޔާންކޮށްފައި އޮތުމުންނެވެ. ރިފާއު ވިދާޅުވީ ރާއްޖޭގައި "ގޭންގު" ހިންގާ ކަމަށް ގަބޫލުނުކުރައްވާ ކަމަށާއި، ސުރުޚީ ފިޔަވައި ބިލުގެ އެއްވެސް މާއްދާއެއްގައި އެ ލަފްޒު ބޭނުންކޮށްފައިނުވާއިރު އެގޮތަށް ބިލުގެ ނަން އޮތުމުން ކަންބޮޑުވެވަޑައިގަންނަވާ ކަމަށެވެ.

މެމްބަރު ރިފާއު ދެއްކެވި ވާހަކައަށް މާފަންނު ހުޅަނގު ދާއިރާގެ މެމްބަރު މުހައްމަދު މުސްތަފާ އިބްރާހީމް ވެސް ތާއީދު ކުރެއްވި އެވެ. ސަބަބެއްގެ ގޮތުގައި ވިދާޅުވީ ދުނިޔޭގެ ފެންވަރުގައި ގޭންގުތައް އޮޕަރޭޓްކުރާ ގޮތަށް ރާއްޖޭގައި އެކަން ހިނގާ ކަމަށް ގަބޫލުނުކުރެއްވުމެވެ.

މިކަން ފާހަގަކުރައްވާ މެމްބަރު ވަނީ ކޮމިޓީ މަރުހަލާގައި އެ ބިލު ދިރާސާކުރާއިރު ގާނޫނުގެ ނަމުން "ގޭންގު" މި ލަފްޒު އުނިކުރެއްވުމަށް އެދިވަޑައިގެންފައެވެ.

ހަމައެއާއެކު ކުށްކުރަން ހިތްވަރުދީ ފަންޑުކުރާ މީހުންނަށް އެޅޭނެ ފިޔަވަޅުތައް ވެސް ބިލު ގާނޫނަކަށް ވެގެން އަންނައިރު ހިމެނުން މުހިންމު ކަމަށް މެމްބަރު ފާހަގަކުރެއްވި އެވެ.

މި ބިލަށް ބަހުސްކުރައްވަމުން ހިތަދޫ މެދު ދާއިރާގެ މެމްބަރު އަހުމަދު އަޒާން މަރުޒޫގު ވިދާޅުވީ ކުށްކުރާ ޒުވާނުންނަށް އަދަބު ދިނުމުގެ ބަދަލުގައި އެ މީހުން ކުށުގެ ވެއްޓަށް ހުށަހެޅި ނުވަތަ ވަންނަން މެދުވެރިވާ ސަބަބުތައް ދިރާސާކުރަން ޖެހޭ ކަމަށެވެ. އަދި އެ މައްސަލަތައް ހައްލުކުރަން މަސައްކަތް ކުރުން ވަރަށް މުހިއްމު ކަމަށް ވިދާޅުވި އެވެ.

އަޒާން ވަނީ އެ ބިލު ފާސްކުރެއްވުމަށްފަހު ވެސް ގާނޫނު ރަނގަޅަށް ތަންފީޒުކުރެވެމުންދާކަން ކަށަވަރުކުރުމަށް ތަންފީޒީ އިދާރާތަކަށް ފާރަވެރިވުމަށް ވެސް ރައްޔިތުންގެ މަޖިލީހަށް ގޮވާލައްވާފަ އެވެ.

މިފަދަ ބިލެއް ހުށަހެޅުއްވުމުގެ ބޭނުމަކީ ގޭންގުތަކުން ހިންގާ ކުށްތަކާއި އެ ނޫންވެސް އާއްމު ރައްޔިތުންގެ ހިތްތަކުގައި ބިރުވެރިކަން އުފެދޭ ގޮތަށް ހިންގާ ނުރައްކާތެރި އަދި ބޮޑެތި ކުށްތަކުން ރައްޔިތުންނާއި މުޖުތަމައު ރައްކާތެރިކުރުމަށްޓަކައި، ކަމާ ގުޅޭ ތަފްސީލީ ގާނޫނީ އޮނިގަނޑެއް ގާއިމުކުރުމެވެ.

މި ބިލުގެ ދަށުން، ގޭންގުތަކުން ހިންގާ ކުށްތައް ހިމެނޭ ގޮތަށް އިންތިޒާމްވެގެން ހިންގާ ބޮޑެތި ކުށްތަކާއި އެ ނޫންވެސް ނުރައްކާތެރި ކުށްތައް ރާއްޖޭގައި ހިންގުން ހުއްޓުވުމަށްޓަކައި ނުރައްކާތެރި އަދި އިންތިޒާމްވެގެން ހިންގާ ބޮޑެތި ކުށްތަކާއި ނުހައްގު މުއްސަނދިކަން ހޯދައި ލިބިގަތުމުގެ ކުށް ހިމެނޭ ގޮތުން ކުށުގެ ގޮތުގައި ކަނޑައެޅޭ އަމަލުތައް ބަޔޔާންކުރުމާއި އެ ކުށްތަކުގެ އަދަބު ކަނޑައަޅާފައިވެ އެވެ.

އެފަދަ ކުށްކުރާ ފަރާތްތަކަށް އެކަށީގެންވާ ގޮތެއްގެ މަތިން ފިޔަވަޅު އެޅުމަށްޓަކައި ގާނޫނު ތަންފީޒުކުރާ އިދާރާތަކަށް ހާއްސަ ބާރުތަކެއް ވެސް މި ބިލުގެ ދަށުން ލިބެ އެވެ.

އިންތިޒާމްވެގެން ހިންގާ ބޮޑެތި ކުށްތަކާއި އެ ނޫންވެސް ނުރައްކާތެރި ކުށްތަކުން ކުޑަކުދިންނާއި ޒުވާނުން އެފަދަ ކުށްތައް ކުރާ ވެށިން ދުރުކޮށް، އެ ފަރާތްތަކަށް ރައްކާތެރިކަންދީ، ހެޔޮގޮތުގައި މުޖުތަމައުއަށް ރުޖޫއަވުމަށް މަގުފަހިކޮށްދިނުމަށްޓަކައި ޚާއްޞަ ފިޔަވަޅުތަކެއް އެޅުމުގެ އުސޫލުތަކެއް ކަނޑައެޅުމާއި އެފަދަ ކުށްތައް ކުރާ ފަރާތްތައް އުޅޭނޫޅޭ ގޮތް މޮނީޓާކޮށް، ފިޔަވަޅު އެޅޭނެ ޚާއްޞަ އުސޫލުތައް ވެސް މި ބިލާއެކު ކަނޑައެޅިގެންދާނެ އެވެ.