ކަަޅުބިލަމަހުގެ މަސްވެރިކަންކުރާ އޮޑިފަހަރު މަސް ކިރުވުމަށް ކިއުގައި ޖެހެންޖެހޭ މައްސަލައަކީ ކުރީ ސަރުކާރުތަކަށް ޙައްލުނުކުރެވުމުގެ ސަބަބުން މި ސަރުކާރަށް ވާރުތަވި މައްސަލައެއްކަން ފާހަގަކުރައްވައި، ކުރިއަށް އޮތް ތަނުގައި އެ މައްސަލަ މި ސަރުކާރުން ޙައްލުކުރައްވާނެކަމުގެ ޔަޤީންކަން މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަޙްމަދު ޝިޔާމު ވިދާޅުވެއްޖެއެވެ.

ރައްޔިތުންގެ މަޖިލީހުގެ ކެންދޫ ދާއިރާގެ މެންބަރު މަޢުރޫފު ޒާކިރު ކުރެއްވި ސުވާލަކަށް ޖަވާބުދެއްވަމުން މިނިސްޓަރު ޝިޔާމު ވިދާޅުވީ ސަރުކާރުން މިހާރު ކުރައްވަމުންދާ މަސައްކަތްތައް ނިމޭއިރު މަސްވެރިންނަށް އެއްވެސް ދަތިކަމެއް ނެތި މަސް ކިރުވައިލެވޭނެ ކަމަށެވެ. 

މިނިސްޓަރު އިތުރަށް ވިދާޅުވީ މިހާރު މަސް ކިރުވުމަށް ކިއުގައި ޖެހިގެން ބައެއް އުޅަނދުފަހަރު އަންނައިރު ކުރިން އަންދާޒާކުރި މިންވަރަށް، މަސް ނެތުމުން އެ ދޯންޏާ ޖެހިގެން ކިއުގައި އޮންނަ ދޯންޏަށް ތަންކޮޅެއް އަވަހަށް ގޮވައިލެވޭނެ ކަމަށެވެ. 

ޝިޔާމު އިތުރަށް ވިދާޅުވީ މި މަހުގެ 30 ވަނަ ދުވަހާ ހަމައަށް ކިއު ނަންބަރު ދޫކޮށްފައި ހުރި ނަމަވެސް މަސް ކިރުވޭ މިންވަރު ހަލުއިވުމާއެކު އެ ކިއުގައި ހުރި ހުރިހާ އުޅަނދަކަށް މިއަދާއި މާދަމާގެ ނިޔަލަށް ޚިދުމަތް ދީ ނިންމައިލެވޭނެ ކަަމަށެވެ. 

މިފްކޯއަށް މަސް ކިރުވުމުގައި ކުރިމަތިވާ ގޮންޖެހުންތަކަށް އަލިއަޅުވައިލައްވަމުން ޝިޔާމު ވިދާޅުވީ ކުރީ ސަރުކާރުގައި މަސް ކިރުވުމަށް މިފްކޯއަށް ގަނެފައި ހުރި އޮޑިފަހަރުގެ އެފިޝިއެންސީ ވަރަށް ދަށް ކަމަށެވެ. މިނިސްޓަރު ވިދާޅުވި ގޮތުގައި ޖަޒީރާ ބޯޓުތަކުގެ ތެރެއިން ގިނަ ބޯޓުތައް އޮޕަރޭޓުނުކުރެވޭތީ އެ ބޯޓުތައް މަރާމާތުކޮށް މަސްވެރިކަން އެންމެ ތިޔާގިވާ ދުވަސްވަރު އޮޕަރޭޝަނަށް ނެރުމަށް މިހާރު މަސައްކަތް ކުރަމުން އަންނަ ކަމަށެވެ. 

މިނިސްޓަރު ވިދާޅުވި ގޮތުގައި ޖަޒީރާ ބޯޓުތަކުގެ ތެރެއިން ދެ ބޯޓެއް ޚިދުމަތަށް ނެރުމަށް މި މަހުގެ 12 އަދި 13 ވަނަ ދުވަހު ކުރެވޭ މަސައްކަތުން އެ ދެ ބޯޓު ޚިދުމަތަށް ނެރުވުމުން މިހާރު އޮތް ކިއުއަށް ވަރަށް ބޮޑު ޙަލެއް ލިބޭނެ ކަމުގައި މިނިސްޓަރު ވިދާޅުވިއެވެ. 

މިފްކޯއަށް ދުވާލެއްގެ މައްޗަށް ކިރުވޭނީ 420 ޓަނުގެ މަސްކަން ފާހަގަކުރައްވައި ޝިޔާމު ވިދާޅުވީ މިދުވަސްވަރު ގިނަ ދުވަސްދުވަހު އެ ޢަދަދަށް މަސްކިރުވާ ކަމަށެވެ. އަދި ބައެއް ދުވަސްދުވަހު 450 ޓަނުގެ މަސްވެސް ކިރުވަމުންދާކަން މިނިސްޓަރު ފާހަގަކުރެއްވިއެވެ. 

ޝިޔާމު އިތުރަށް ވިދާޅުވީ މަސްވެރިކަމުގެ ޞިނާޢަތުގެ ތަރައްޤީއަށް މިހާރު ސަރުކާރުން ކުރަމުން އަންނަ މަސައްކަތްތަން މަސްވެރިން ކިއުގައި ޖެހެންނުޖެހޭ ޙާލަތަށް މަސްވެރިކަން ތަރައްޤީކުރައްވާނެ ކަމަށެވެ. އަދި މިފަހަރަކީ މަސްވެރިން ކިއުގައި ޖެހެންޖެހޭ ފަހު ފަހަރުކަމަށްވާނެ ކަމުގެ ޔަޤީންކަން މިނިސްޓަރު ދެއްވިއެވެ. 

މަސްވެރިކަމުގެ ޞިނާޢަތް އިތުރަށް ތަރައްޤީކުރެއްވުމުގެ ގޮތުން މަސް ރައްކާކުރުމުގެ ޤާބިލުކަމާއި، މަސް ދަޅުގައި ބަންދުކުރުމުގެ ޤާބިލުކަން އިތުރުކުރުމަށް މުޅި ރާއްޖެ ހިމެނޭ ގޮތަށް ބޮޑު މަޝްރޫޢެއް ސަރުކާރުން ގެންދަވަނީ ހިންގަވަމުންނެވެ. 

މި މަޝްރޫޢުތައް ނިމިގެންދާއިރު މިހާރު ރާއްޖޭގައި މަސް ރައްކާކުރެވޭ މިންވަރަށްވުރެ އެތައް ގުނައެއް އިތުރަށް މަސް ރައްކާކުރެވި ދުވާލެއްގެ މައްޗަށް ދަޅުގައި މަސް ބަންދުކުރެވޭ މިންވަރުވެސް ވަރަށް ބޮޑަށް އިތުރުވާނެއެވެ.