ހޯމަދުވަހު ދުނިޔެއަށް ސިހުން ގެނުވީ ޗައިނާގެ ކުޑަކުޑަ އައު ކުންފުންޏެއްކަމަށްވާ ޑީޕްސީކްއިން ރޯކޮށްލި ހުޅުގަނޑެއްގައި ހިއްސާގެ ބާޒާރުން އެއް ޓްރިލިއަން ޑޮލަރު އެއް ދުވަސް ތެރޭ ނެތިގެންދިއުމުންނެވެ. 

ޑީޕްސީކްއިންގެ އައު އޭއައި މޮޑެލް އާރް-1 ތަޢާރަފުކުރުމާއެކު، އާޓިފިޝަލް އިންޓެލިޖެންސްގެ ދާއިރާގައި ދުނިޔޭގެ އެހެނިހެން ޤައުމުތަކަށްވުރެ ކުރީގައި އެމެރިކާ އޮތްކަމަށް ޤަބޫލުކުރެވިފައި އޮތް އޮތުން ނިމުމަކަށް އައެވެ. އަދި ޗައިނާގެ ބައެއް ވިޔަފާރިތަކުން އެމެރިކާގެ ސިލިކަން ވެލީގެ ކުންފުނިތަކުގެ މައްޗަށް ކުރިހޯދަފާނެކަމަށް ގިނަ ބަޔަކު މިހާރު ޤަބޫލުކުރަން ފަށައިފިއެވެ. 

ޑީޕްސީކްގެ އައު އޭއައި ތަޢާރަފުކުރިތާ ކުޑަ ހިނދުކޮޅެއްގެ ތެރޭގައި އެމެރިކާގައި އެޕަލް އައިއޯއެސް އެޕް ސްޓޯރުން އެންމެ ގިނައިން ޑައުންލޯޑުކުރެވުނު އެޕުގެ މަޤާމު އެ އެޕަށް ލިބުނެވެ. 

ޖިއޯޕޮލިޓިކަލް ބަދަލުތަކެއް ގެނުވުމާއެކު، ޑީޕްސީކްގެ އޭއައިގެ ސަބަބުން 2022 ވަނަ އަހަރު ޗެޓްޖީޓީޕީގެ ސަބަބުން އޭއައި އިތުރަށް ތަރައްޤީކުރުމަށް އަމިއްލަ ވިޔަފާރިތަކުން ޝައުޤުވެރިކަން ފާޅުކުރި ގޮތަށް އެކަމުގެ ޝައުޤުވެރިކަން އިތުރުވެގެންދާނެއެވެ. 

އެއާއެކު ޑީޕްސީކްގެ އޭއައިގެ ސަބަބުން އެމެރިކާގެ ހިއްސާގެ ބާޒާަރު އެ މައްޗަށް ބިނާވެފައިވާ ގިނަގުނަ ވިސްނުންތަކަށް ބޮޑެތި ބަދަލުތަކެއް އަންނާނެއެވެ. އެއީ ޒަމާނީ ކުރިއަރާފައިވާ އޭއައި މޮޑެލްތައް ތަރައްޤީކުރުމަށް އެތައް ބިލިއަން ޑޮލަރެއް ހޭދަކުރަންނުޖެހޭކަން ޑީޕްސީކްއިން ސާބިތުކޮށްދިނުމާ ގުޅިގެންނެވެ. 

މިހައިހިސާބުން މުޅި ދުނިޔެ އުފައްދާ ސުވާލަކީ؛ އިންސާނުންނާ އެއް ހަމައިގެ ތޫނުފިލިކަން އާޓިފިޝަލް އިންޓެލިޖެންސަށް ހޯދައިދެވުމުގެ ތުންފަތްމައްޗަށް ވާސިލުވެވިފައިވާކަމަށް މާހިރުން ވިދާޅުވަމުންދާ ދަނޑިވަޅެއްގައި އެމެރިކާއާ އެއްހަމައަކަށް އޭއައިގެ ދާއިރާގައި ޗައިނާއިން ދަތުރުކުރީތޯ ކުރެވޭ ސުވާލެވެ. 

ގޫގުލްގެ ކުރީގެ ސީއީއޯ އެރިކް ޝްމިޑްޓް ވިދާޅުވާ ގޮތުން ޓެކްނޮލޮޖީގެ ދާއިރާގައި ޗައިނާއިން އެމެރިކާއާ ފައިހަމަކޮށް ފިޔަވަޅުއަޅަމުންދާ ކަމަށެވެ. އަދި އެމެރިކާއަށް ޗައިނާގެ މައްޗަށް އޮތްކަމަށް ކުރިން ޤަބޫލުކުރެވުނު މިންވަރުގެ ޤާބިލުކަމެއް މިހާރު އޮތްކަމަށް ދެން ބެލެވެން ނެތުމާއެކު، އެމެރިކާގެ ޓެކްނޮލޮޖީ ދާއިރާއިން އިތުރު މަސައްކަތްތަކެއް ކުރަންޖެހޭނެ ކަމަށްވެސް އޭނާ ވިދާޅުވިއެވެ. 

ޗައިނާގެ މަހުޖަނު ލިއަން ވެންފެން އެއް ފަރާތުން ހިންގަވަން ފެއްޓެވި މަޝްރޫޢެއްގެ ގޮތުގައި ފެށުނު ޑީޕްސީކް ވެގެންގޮސްފައިވަނީ ޗައިނާގެ އެންމެ މުހިއްމު އެއް އޭއައި ލެބަށެވެ. 

ލިއަންގް ވިދާޅުވި ގޮތުގައި އޭއައި ދާއިރާގައި އަދި ޖުމްލަކޮށް ޓެކްނޮލޮޖީގެ ދާއިރާގައި އެމެރިކާއާ ފައިހަމަކުރުމަށް ޗައިނާއަށް މުހިއްމީ އިތުބާރެވެ. އޭނާ ވިދާޅުވީ ޗައިނާގެ އިންވެސްޓަރުންނާއި ފަންނިއްޔާތުގެ ދާއިރާގެ ކުންފުނިތަކުން ކުރިން ގެންގުޅުނު ވިސްނުމަކީ އެމެރިކާއާއި ޗައިނާގެ މެދުގައި އޮތް ފަރަޤުގެ ބޮޑުކަމުން އަރައިހަމަނުކުރެވޭނެ ކަމަށެވެ. އަމިއްލަ ޒާތަށް އިތުބާރުކޮށް މަސައްކަތްކުރުމުން އެ ދާއިރާތަކުގައި އެމެރިކާއާ އަރައިހަމކުރެވޭނެކަމަަށް އޭނާ ކުރިއްސުރެ ޤަބޫލުކުރައްވައެވެ. 

ކުންފުނީގެ ބޭރުން ފައިސާއެއް ހޯދުމަކާ ނުލައި ހިންގާ ޑީޕްސީކްގެ މަޤުޞަދަކަށްވެފައި އޮތީ ވިޔަފާރި ފައިދާ އިތުރުކުރުމެއް ނޫނެވެ. ނަމަވެސް އޭއައިގެ ދާއިރާއިން އައު ކުރިއެރުންތައް ހޯދުމެވެ. ނަތީޖާއަކަށްވީ އެ ކުންފުނީގެ ހުރިހައި ސަމާލުކަމެއް ޓެކްނޮލޮޖީ ތަރައްޤީކުރުމެވެ. 

މި މަސައްކަތުގައި އެ ކުންފުންޏަަށް ކުރިމަތިވި އެންމެ ބޮޑު އެއް ގޮންޖެހުމަކީ 2022 ވަނަ އަހަރުން ފެށިގެން އޭއައި ދާއިރާގައި ޗައިނާގެ ކުރިއެރުމަށް ހުރަސްއެޅުމަށް އެމެރިކާއިން އަޅާފައިވާ ދަތިކުރުމުގެ ފިޔަވަޅުތަކެވެ. އެފިޔަވަޅުތަކުގެ ސަބަބުން އެންމެ މަތީ ފަންތީގެ ޗިޕްތައް ބޭނުންކުރެވޭނެ މަގު ބަންދުވުމާއެކު، ޑީޕްސީކްއިން އިޚުތިޔާރުކުރީ ޢާންމުކޮށް އޭއަައި ކުންފުނިތަކުން ބޭނުންކުރާ ޗިޕްތަކަށްވުރެ ދަށް ފަންތީގެ ޗިޕްތަކުން އެންމެ ބޭނުންވާ ނަތީޖާ ނެރެވޭނެ އީޖާދީ ވިސްނުންތަކެއް ތަންފީޒުކުރުމެވެ. 

އެ ކުންފުނިން ކުޑަ ހޭދައެއް ކޮށްގެން ހޯދި ބޮޑު ކާމިޔާބަށް ސިލިކަން ވެލީގެ ބޮޑެތި ކުންފުނިތަކުގެ އިސްވާރުންގެ ތާރީފު ލިބިފައިވެއެވެ. އެގޮތުން އޯޕެންއޭއައިގެ ސީއީއޯ ސެމް އޮލްޓްމެން ވިދާޅުވެފައިވަނީ އާރް-1 މޮޑެލްއަކީ ވަރަށްވެސް ފުރިހަމަ މޮޑެލްއެއް ކަމަށެވެ. އަދި އެ ކުންފުނިން އީޖާދުކުރި ބައެއް ކަންކަމަކީ ފޭސްބުކުގެ ސިސްޓަމްތަކުގައި މުސްތަޤުބަލުގައި ތަންފީޒުކުރަން ބޭނުންފުޅުވާ ސިސްޓަމްތަކެއްކަމަށް މެޓަގެ ސީއީއޯ މާކް ޒަކަބާގް ވިދާޅުވެފައިވެއެވެ. 

ޗައިނާގެ މުޙައްލިލުން ދެކެވަޑައިގަންނަވާ ގޮތުގައި އޭއައި ދާއިރާގައި އަދިވެސް އެމެރިކާއާ ފައިހަމަކުރުމަށް ޗައިނާއިން ކުރަން ހުރި މަސައްކަތްތައް ގިނައެވެ. ގަވެކަލް ޑްރެގަނޮމިކްސްގެ ޓެކް މުޙައްލިލެއްކަމަށްވާ ޓިލީ ޝަންގް ލިޔުއްވި ގޮތުގައި ޑީޕްސީކްގެ ކުރިއެރުމުން ސާބިތުކޮށްދެނީ އެމެރިކާއިން އަޅަފައިވާ އެކްސްޕޯޓުގެ ދަތިކުރުމުގެ ފިޔަވަޅުތަކާއެކުވެސް ބޮޑެތި ކުރިއެރުންތައް ހާސިލުކުރުމުގެ ޤާބިލުކަން ޗައިނާގެ ކުންފުނިތަކަށް ލިބިފައިވާކަަން ކަމަށެވެ.