ފާއިތުވި އަހަރު ރާއްޖޭގެ އިންޝުއަރެންސް ކުންފުނިތަކުން ދޫކުރި ޕްރިމިއަމްތައް 2 ބިލިއަން ރުފިޔާއަށްވުރެ މައްޗަށް އަރާފައިވާކަން މަރުކަޒީ ބޭންކު މޯލްޑިވްސް މަނިޓަރީ އޮތޯރިޓީގެ ތަފާސްހިސާބުތަކުން ދައްކައިފިއެވެ. 

އެމްއެމްއޭއިން މަހަކު އެއްފަހަރު އާންމުކުރާ ހިސާބުތަކަށް ބަލާއިރު 2024 ވަނަ އަހަރުގެ ހަތަރު ކުއާޓާގައި ޖުމްލަ 2.02 ބިލިއަން ރުފިޔާގެ ޕްރިމިއަމް އިންޝުއަރެންސް ކުންފުނިތަކުން ދޫކޮށްފައިވެއެވެ. 

އެގޮތުން މިއަހަރުގެ ފުރަތަމަ ކުއާޓާގައި 600 މިލިއަން ރުފިޔާ އަދި ދެވަނަ ކުއާޓާގައި 478.2 މިލިއަން ރުފިޔާ އަދި ތިންވަނަ ކުއާޓާގއި 445.5 މިލިއަން ރުފިޔާ އަދި އެންމެ ފަހު ކުއާޓާގައި 499.3 މިލިއަން ރުފިޔާގެ ޕްރިމިއަމް އިންޝުއަރެންސް ކުންފުނިތަކުން ދޫކޮށްފައިވެއެވެ. 

އެ މުއްދަތުގައި އިންޝުއަރެންސް ކުންފުނިތަކުން އެންމެ ގިނައިން ދޫކޮށްފައިވަނީ ހެލްތު އިންޝުއަރެންސް ޕްރިމިއަމްތަކެވެ. އެގޮތުން އިންޝުއަރެންސް ކުންފުނިތަކުން 617.6 މިލއިަން ރުފިޔާގެ ހެލްތު އިންޝުއަރެންސް ޕްރިމިއަމް ދޫކޮށްފައިވެއެވެ. 

އެ މުއްދަތުގައި ހެލްތު އިންޝުއަރެންސް ކްލެއިމްސްގެ ގޮތުގައި އިންޝުއަރެންސް ކުންފުނިތަކުން ދޫކޮށްފައިވަނީ 341.8 މިލިއަން ރުފިޔާ އެވެ. އިންޝުއަރެންސް ކުންފުނިތަކުން ޖުމްލަކޮށް ދޫކޮށްފައިވަނީ 683.8 މިލިއަން ރުފިޔާއެވެ. 

ފާއިތުވި އަހަރު އިންޝުއަރެންސް ކުންފުނިތަކަށް 246.5 މިލިއަން ރުފިޔާގެ ފައިދާއެއް ލިބިފައިވާކަން މަރުކަޒީ ބޭންކުގެ ތަފާސްހިސާބުތަކުން ދައްކައެވެ.