ENGLISH

04 އޭޕްރީލު 2025

Advertisement

އިމްޕޯޓު 4 އިންސައްތަ އިތުރުވެއްޖެ، އެންމެ ބޮޑަށް އިތުރުވީ ކާނާ އެތެރެކުރި މިންވަރު

01 ފެބްރުއަރީ 2025

|

ޝިފްޒާން އަޙްމަދު

އިމްޕޯޓުކުރާ މުދާ އިތުރުވުމަކީ ރާއްޖޭގެ އިޤުތިޞާދުގައި ވިލުންތެރިކަން ހުރިކަމުގެ ނިޝާނެއްކަމަށް މާހިރުން ވިދާޅުވޭ، ފޮޓޯ: މިހާރު

ފާއިތުވި އަހަރު ރާއްޖެއަށް މުދާ އެތެރެކުރި މިންވަރު އޭގެ ކުރީ އަހަރަށްވުރެ 4 އިންސައްތަ އިތުރުވެފައިވާއިރު އެންމެ ބޮޑަށް އިތުރުވީ ކާނާގެ ބާވަތްތައް އެތެރެކުރި މިންވަރުކަން މަރުކަޒީ ބޭންކު މޯލްޑިވްސް މަނިޓަރީ އޮތޯރިޓީގެ މާލީ ހިސާބުތަކުން ދައްކައިފިއެވެ. 

އެމްއެމްއޭއިން އާންމުކޮށްފައިވާ ޑިސެންބަރު މަހުގެ ތަފާސްހިސާބުތަކަށް ބަލާއިރު، ފާއިތުވި އަހަރުގެ ޖަނަވަރީން ޑިސެންބަރުގެ ނިޔަލަށް 3.6 ބިލިއަން ޑޮލަރުގެ މުދާ ރާއްޖެއަށް އެތެރެކުރިއެވެ. އެއީ އޭގެ ކުރީ އަހަރު ރާއްޖެއަށް އެތެރެކުރި 3.4 ބިލިއަން ޑޮލަރުގެ މުދަލަށްވުރެ 4 އިންސައްތަ އިތުރު ޢަދަދެކެވެ. 

ނިމުނު އަހަރު 755 މިލިއަން ޑޮލަރުގެ ކާބޯތަކެތި ރާއްޖެއަށް އެތެރެކޮށްފައިވެއެވެ. އެއީ 2023 ވަނަ އަހަރު ރާއްޖެއަށް އެތެރެކުރި 674.5 މިލިއަން ޑޮލަރަށްވުރެ 11.9 އިންސައްތަ އިތުރު އަދަދެކެވެ. 

2023 ވަނަ އަހަރު ކާބޯތަކެތީގެ ތެރެއިން ތަރުކާރީއާއި، ފަލަމަޑީގެ ބާވަތްތަކާއި ހަވާދުގެ ބާވަތްތަކުގެ ގޮތުގައި 92.9 މިލިއަން ޑޮލަރުގެ މުދާ ރާއްޖެއަށް އެތެރެކުރިއިރު 2024 ވަނަ އަހަރު އެ ބާވަތްތަކުގެ 104.8 މިލިއަން ޑޮލަރުގެ މުދާ ރާއްޖެއަށް އެތެރެކުރިއެވެ. 

އަދި ފާއިތުވި 155.6 މިލިއަން ޑޮލަރުގެ ކަނޑު މަހާއި އެއްގަމު މަހުގެ ބާވަތްތަކާއި ސީފުޑް ރާއްޖެއަށް އެތެރެކޮށްފައިވާއިރު އޭގެ ކުރީ އަހަރު އެތެރެކުރީ 131.1 މިލިއަން ކަނޑު މަހާއި އެއްގަމު މަހުގެ ބާވަތްތަކާއި ސީފުޑެވެ. ނިމުނު އަހަރު 96.2 މިލިއަން ޑޮލަރުގެ މޭވާއާއި ނަޓްސް އަދި ސީޑްސް އެތެރެކޮށްފައިވެއެވެ. 

އަދި 102.2 މިލިއަން ޑޮލަރުގެ ބިހާއި ކިރުގެ ބާވަތްތައް ނިމުނު އަހަރު ރާއްޖެއަށް އެތެރެކުރިއިރު، އޭގެ ކުރީ އަހަރު އެތެރެކޮށްފައިވަނީ 94.8 މިލިއަން ޑޮލަރުގެ ބިހާއި ކިރުގެ އުފެއްދުންތަކެވެ. 

ނިމުނު އަހަރު ރާއްޖެއަށް އެންމެ ގިނަ މުދާ އިމްޕޯޓުކޮށްފައިވަނީ ޔޫއޭއީންނެވެ. އެ ޤައުމުން 723.1 މިލިއަން ޑޮލަރުގެ މުދާ އިމްޕޯޓުކުރިއެވެ. އެއީ ދެވަނައަށް އެންމެ ގިނައިން މުދާ އިމްޕޯޓުކުރި އިންޑިޔާއިން އިމްޕޯޓުކޮށްފައިވާ 514.6 މިލިއަން ޑޮލަރުގެ މުދަލަށްވުރެ 208 މިލިއަން ޑޮލަރު އިތުރު ޢަދަދެކެވެ. އަދި އެއީ 2023 ވަނަ އަހަރު ޔޫއޭއީން އެތެރެކުރި މުދަލަށްވުރެ 57 އިންސައްތަ އިތުރު ޢަދަދެއްވެސްމެއެވެ. 

ޗައިނާއިން ނިމުނު އަހަރު 485 މިލިއަން ޑޮލަރުގެ މުދާ އިމްޕޯޓުކޮށްފައިވާއިރު ސިންގަޕޫރުން 375 މިލިއަން ޑޮލަރުގެ މުދާ އިމްޕޯޓުކޮށްފައިވެއެވެ. ނިމުނު އަހަރު ޗައިނާއިން އިމްޕޯޓުކުރި މުދަލުގެ ޢަދަދު އޭގެ ކުރީ އަހަރާ އަޅާބަލާއިރު 19.7 އިންސައްތަ އިތުރުވެފައިވެއެވެ. 

އިޤުތިޞާދީ މާހިރުން ފާހަގަކުރައްވާ ގޮތުގައި ރާއްޖެއަށް މުދާ އިމްޕޯޓުކުރާ މިންވަރު އިތުރުވުމަކީ ރާއްޖޭގެ އިޤުތިޞާދުގެ ވިލުންތެރިކަން ދައްކުވައިދޭ ކަމެކެވެ. 

ކިޔުންތެރިންގެ ހިޔާލު