ދިރާގު މޯލްޑިވްސް ރޯޑް ރޭސް ފުރަތަމަ ފަހަރަށް ފުވައްމުލަކު ސިޓީގައި ބާއްވާ ގޮތަށް ހަމަަޖައްސައިފިއެވެ.

ފުވައްމުލަކު ސިޓީ ކައުންސިލާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީއާ ގުޅިގެން ބާއްވާ މި ހަރަކާތަކީ ރާއްޖޭގެ އެންމެ ބޮޑު ދުވުމުގެ އިވެންޓަށް ތަރުހީބު އިތުރު ކުރުމުގެ ގޮތުން ކުރިއަށް ގެންދާ ހަރަކާތެކެވެ.

ދިރާގުން އިޢުލާން ކުރި ގޮތުގައި މި ރޭހުގެ މަޤުޞަދަކީ ދުވުންތެރިންގެ މުހިއްމު މަންޒިލެއްގެ ގޮތުގައި ފުވައްމުލައް ޕްރޮމޯޓް ކުރުމާއެކު މުޅި ރާއްޖޭގައި މި ދުވުން ފުޅާކުރުމެވެ. 

ފުވައްމުލަކު ސިޓީގެ މޭޔަރު އިސްމާޢިލް ރަފީޤު ވަނީ ކުޅިވަރާއި ފަތުރުވެރިކަމުގެ މަންޒިލެއްގެ ގޮތުގައި އެ ސިޓީ ޕްރޮމޯޓްކުރުމުގެ ފުރުޞަތު ފަހިވިކަމަށްޓަކައި ދިރާގުގެ މި އިސްނެގުމަށް މަރުހަބާ ވިދާޅުވެފަ އެވެ. އޭނާ ވަނީ މި އިވެންޓް ހޯސްޓް ކުރުމުން ރާއްޖޭގެ އިތުރުން ބައިނަލްއަޤްވާމީ ދުވުންތެރިން ފުވައްމުލަކަށް ޝައުގުވެރިވާނެ ކަމަށް އުންމީދުކުރައްވާ ކަމަށް ވިދާޅުވެފައެވެ. 

ދިރާގުގެ ޗީފް ކޮމާޝަލް އޮފިސަރު އަލީ ރިޔާޒު ސިފަކުރެއްވި ގޮތުގައި މިއީ ދިރާގު ރޯޑް ރޭހަށް އާ ބާބެކެވެ. ގްރޭޓާ މާލޭ ސަރަހައްދުން ބޭރުގައި ބައިވެރިންނަށް މި އިވެންޓް އިތުރަށް ފަސޭހަވެގެންދާނެ ކަމަށް ވެސް އޭނާ ވިދާޅުވިއެވެ. ޢަލީ ރިޔާޒް ވަނީ އެކްޓިވް ވައްޓަފާޅިއެއް ޕްރޮމޯޓްކޮށް، ރޭހުގެ ތެރެއިން ލޯކަލް ޓޫރިޒަމް ކުރިއެރުވުމަށް އެ ކުންފުނިން ކުރާ މަސައްކަތަށް އަލިއަޅުވާލައްވާފަ އެވެ.

ފުރަތަމަ ފަހަރަށް ދިރާގު މޯލްޑިވްސް ރޯޑް ރޭސް މާލެއިން ބޭރުގައި ބާއްވާއިރު، ފުވައްމުލަކު ސިޓީގައި މި އިވެންޓް ބާއްވަން ހަމަޖެހިފައިވަނީ މި އަހަރުގެ މެއި މަހުގެ ދެވަނަ ދުވަހު އެވެ.