ރާއްޖޭގެ ފަތުރުވެރިކަން ޕްރޮމޯޓުކުރުމުގައި ޑިޖިޓަލް މާކެޓިން މަސައްކަތްތައް އިތުރަށް ހަރުދަނާކުރުމަށް ބައިނަލްއަޤުވާމީ ތަޖުރިބާކާރެއް މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޮމްޕެނީ (އެމްއެމްޕީއާރުސީ) އަށް ގެނައުމަށް ނިންމައިފިއެވެ. 

އެމްއެމްޕީއާރުސީއަށް އެހީތެރިވުމަށް ގެންނަ ސާރާ މެތިއުސްއަކީ ޑިޖިޓަލް މާކެޓިން ދާއިރާގައި 30 އަހަރު މަސައްކަތްކުރައްވައި ތަޖުރިބާ ހާސިލުކުރައްވާފައިވާ މާހިރެކެވެ. އޭނާ ވަނީ ޓެސްލާ އާއި ކޮކާކޯލާ އާއި ޖަޕާން އެއާލައިންސް އަދި ސިންގަޕޯ އެއާލައިންސް ފަދަ ބައިނަލްއަޤުވާމީ ބޮޑެތި ކުންފުނިތަކުގައި މަސައްކަތްކުރައްވާފަައެވެ. 

ސާރާއަކީ ދަތުރުފަތުރުގެ ދާއިރާގައި ޑިޖިޓަލް މާކެޓިން ވަސީލަތްތައް ބޭނުންކުރުމުގެ ދާއިރާއިން ވެސް ތަޖުރިބާތަކެއް ހާސިލް ކުރައްވާފައިވާ ބޭފުޅެކެވެ. އެގޮތުން އޭނާ ވަނީ ޓްރިޕްއެޑްވައިޒާގައި އޭޝިޔާ ޕެސިފިކް ސަަރަހައްދުގެ މާކެޓިން ސްޓްރެޓެޖީތައް އެކުލަވައިލެއްވުމާއި ބޮޑެތި ޑޭޓާ ތަހުލީލު ކުރައްވައިފައެވެ. 

ސާރާއަކީ ޕާޓާގެ އެންމެ ޒުވާން އަންހެން ޗެއާއެވެ. އޭނާއަކީ ޒިންމާދާރު ފަތުރުވެރިކަމާއި ދެމެހެއްޓެނެވި ތަރައްޤީއަށާއި ވިލުންތެރި މުޖުތަމަޢުތައް ބިނާކުރުމަށް ޚާއްޞަ އިސްކަންދެއްވާ ބޭފުޅެއްކަމަށް އެމްއެމްޕީއާރުސީން ވިދާޅުވެފައިވެއެވެ. 

އެ ކުންފުނިން ވިދާޅުވި ގޮތުގައި ދެމެހެއްޓެނެވި އަދި ޝާމިލު ފަތުރުވެރިކަން ތަޢާރަފުކޮށް ކުރިއެރުވުމަށް އެމްއެމްޕީއާރުސީން ކުރަމުން އަންނަ މަސައްކަތްތައް ސާރާގެ ތަޖުރިބާގެ ސަަބަބުން އިތުރަށް ފުރިހަމަވާނެއެވެ. 

އަދި ސާރާގެ އިރުޝާދުގެ އަލީގައި ރާއްޖޭގެ ބްރޭންޑު އިޝްތިހާރުކުރުމުގެ އިސްތިރާޖިއްޔާތައް ހަރުދަނާކޮށް ފުރިހަމަކުރުމަށްޓަކައި ފޯކަސް ގުރޫޕުތަކާއެކު މަސައްކަތްކުރުމަށް ފަތުރުވެރިކަމުގެ ޞިނާޢަތުގެ ތެރެއިން ފަންނީ ކޮމިޓީއެއް އުފެއްދުމަށް އެމްއެމްޕީއާރުސީން އަންނަނީ މަސައްކަތްކުރަމުންނެވެ.