ޤައުމީ ބޭންކު، ބޭންކް އޮފް މޯލްޑިވްސް (ބީއެމްއެލް) އަށް މިދިޔަ އަހަރު 2.1 ބިލިއަން ރުފިޔާގެ ސާފު ފައިދާ ވެފައިވާކަމަށް އެ ބޭންކުގެ ވަގުތީ ހިސާބުތަކުން ދައްކައިފިއެވެ.

ބީއެމްއެލްއިން އިއްޔެ ވަނީ މިދިޔަ އަހަރުގެ ފަހު ކްއާޓާގެ މާލީ ބަޔާން އާންމުކުރައްވައިފައެވެ. އެ ބަޔާނުގައިވާ ގޮތުން، މިދިޔަ އަހަރު ޖުމްލަ އާމްދަނީގެ ގޮތުގައި 4.8 ބިލިއަން ރުފިޔާ ލިބިފައިވާއިރު، އެއީ 2023 ވަނަ އަހަރު ލިބުނު ޖުމްލަ އާމްދަނީއަށްވުރެ 340 މިލިއަން ރުފިޔާ އިތުރު އަދަދެކެވެ.

މާލީ ބަޔާނުގައިވާ ގޮތުން މިދިޔަ އަހަރު ބީއެމްއެލްގެ ހިންގުމުގެ ޚަރަދަށް ހޭދަވެފައިވަނީ 798 މިލިއަން ރުފިޔާ އެވެ. ކުރީ އަހަރު ހިންގުމުގެ ޚަރަދަކީ 714 މިލިއަން ރުފިޔާއެވެ. ޕްރޮވިޒަން ހެދުމުގެ ކުރިން ހިންގުމުގެ ފައިދާގެ ގޮތުގައި 2.8 ބިލިއަން ރުފިޔާ ބީއެމްއެލްއަށް މިދިޔަ އަހަރު ލިބިފައިވެއެވެ. ދައުލަތަށް ދައްކަންޖެހޭ އިންކަމް ޓެކްސް އަށްވާ 25 ޕަސެންޓް އުނިކުރުމުން، މިދިޔަ އަހަރު 2.1 ބިލިއަން ރުފިޔާ ސާފު ފައިދާގެ ގޮތުގައި ލިބިފައިވާކަމަށް ބީއެމްއެލްގެ ވަގުތީ ހިސާބުތަކުން ދައްކައެވެ. ބީއެމްއެލްއަށް 2023 ވަނަ އަހަރު ސާފު ފައިދާގެ ގޮތުގައި ލިބިފައިވަނީ ދެ ބިލިއަން ރުފިޔާ އެވެ. ބީއެމްއެލްއިން އިންކަމް ޓެކްސްގެ ގޮތުގައި 753 މިލިއަން ރުފިޔާ މިދިޔަ އަހަރުގެ ފައިދާއިން ދައުލަތުގެ މާލިއްޔަތަށް އިތުރުވާނެއެވެ.

ބީއެމްއެލް އަށް މިދިޔަ އަހަރު ލިބުނު ސާފު ފައިދާއިން މޫނު މަތީއަގު 50 ރުފިޔާގެ ހިއްސާއަކަށް 401 ރުފިޔާ ޖެހެއެވެ. ކުރީ އަހަރުގެ ފައިދާއިން ހިއްސާއަކަށް ޖެނުނީ 385 ރުފިޔާއެވެ. ރާއްޖޭގެ ހިއްސާގެ ބާޒާރުގައި ބީއެމްއެލްގެ ހިއްސާއެއް މިދިޔަ އަހަރު މުޢާމަލާތްކޮށްފައިވަނީ އެވްރެޖްކޮށް 708 ރުފިޔާ އަށެވެ.

ބީއެމްއެލްގެ މާލީ ބަޔާނުގައި ބުނެފައިވާ ގޮތުގައި ޖުމްލަ އެސެޓު 2023 ވަނަ އަހަރަށްވުރެ މިދިޔަ އަހަރު 3 ބިލިއަން ރުފިޔާ އިތުރުވެފައިވެ އެވެ. ބޭންކުން ދޫކުރާ ލޯނުގެ ފެންވަރު ރަނގަޅުވެފައިވާއިރު، މިދިޔަ އަހަރު އާންމު ފަރުދުންނާއި ވިޔަފާރިތަކަށް 5.2 ބިލިއަން ރުފިޔާ، އާ ލޯނުގެ ގޮތުގައި ދޫކޮށްފައިވެއެވެ. އަދި ބޭންކުގެ ރައުސުލްމާލާއި ލިކުއިޑިޓީ ރޭޝިއޯ ޤާނޫނު ލާޒީމުކުރާ މިންވަރަށްވުރެ މަތީގައި ދެމެހެއްޓިފައިވާ ކަމަށް ބީއެމްއެލްއިން ވިދާޅުވެއެވެ.

ބީއެމްއެލްގެ ސީއީއޯ އަދި މޭނޭޖިން ޑިރެކްޓަރު މުޙައްމަދު ޝަރީފުގެ ބަޔާނުގައި ވިދާޅުވެފައިވާ ގޮތުގައި އެ ބޭންކަށް މިދިޔަ އަހަރު ހާސިލުކުރެވިފައިވަނީ ހަރުދަނާ މާލީ ނަތީޖާއެކެވެ. އަދި މިދިޔަ އަހަރުގެ ފަހު ކުއާޓާގައި "މުޅި ރާއްޖެއަށް ބީއެމްއެލް އޭޓީއެމް" މަޝްރޫޢު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފައްޓަވާދެއްވާފައިވާކަން ޝަރީފު ފާގަފަކުރައްވާފައިވެއެވެ.

ރާއްޖޭގައި އެންމެ ފުޅާދާއިރާއެއްގައި ޚިދުމަތްދޭ ބޭންކަކީ ބީއެމްއެލް އެވެ. ރާއްޖޭގެ 20 އަތޮޅުގައި 39 ބްރާންޗް، 95 ސޭލްސް ސާރވިސް ބެންކިން ސެންޓަރު އަދި 150 އޭޓީއެމްގެ ޚިދުމަތް ބީއެމްއެލްއިން ޤާއިމުކުރައްވާފައިވެއެވެ. ބީއެމްއެލްގެ އޮންލައިން ބޭންކިންގެ ޚިދުމަތަށް ދުވާލަކު އެއް މިލިއަނަށްވުރެ ގިނަ ފަހަރު މީހުން ލޮގިންވާއިރު، އިންޓަނެޓް އަދި މޯބައިލް ބޭންކިން މެދުވެރިކޮށް ދުވާލަކު 295،000 އަށްވުރެގިނަ މުޢާމަލާތް ހިންގައެވެ. ބީއެމްއެލްގެ، 345،000 އަށްވުރެ ގިނަ ކަސްޓަމަރުންނަށް ޚިދުމަތް ދިނުމަށް ހާހަކަށްވުރެ ގިނަ މީހުންނަށް އެ ބޭންކުން ވަޒީފާދީފައިވެއެވެ.