މި ވަގުތު އެންމެ ގިނަ މެމްބަރުން ހިމެނޭ ސިޔާސީ ޕާޓީއަކަށް ސަރުކާރު ހިންގާ ޕީޕަލްސް ނެޝަނަލް ކޮންގްރެސް (ޕީއެންސީ) ވެއްޖެ އެވެ.

އިލެކްޝަންސް ކޮމިޝަނުން ވަނީ، ރާއްޖޭގައި ހިންގާ ސިޔާސީ ޕާޓީތަކުގެ މެންބަރަކަށް ވުމަށް އެދި ހުށަހަޅާފައިވާ ފޯމުތައް ޕްރޮސެސްކުރުމަށް ފަހު، އެ ޕާޓީގައި ހިމެނޭ މެމްބަރުންގެ އެންމެ ފަހުގެ އަދާހަމަ އެ ކޮމިޝަންގެ ވެބްސައިޓުގައި ޢާއްމުކޮށްފަ އެވެ.

އީސީގެ ވެބްސައިޓުން ފެންނަ ގޮތުގައި 68،968 މެމްބަރުންނާއެކު މިވަގުތު އެންމެ ގިނަ މެމްބަރުން ހިމެނެނީ، ޕީއެންސީގަ އެވެ. ދެވަނަ އަށް އޮތީ، 2023 ގެ ޑިސެމްބަރުގެ ނިޔަލަށް ރާއްޖޭގެ އެންމެ ބޮޑު ސިޔާސީ ޕާޓީގެ ގޮތުގައި އޮތް ވާދަވެރި އެމްޑީޕީ އެވެ. އީސީގެ ވެބްސައިޓުން އެނގޭ ގޮތުގައި އެމްޑީޕީގައި މިހާރު ތިބީ 43،755 މެމްބަރުންނެވެ. ކުރިން އެ ޕާޓީގައި 50،000 އަށް ވުރެ ގިނަ މެމްބަރުން ހިމެނެއެވެ.

ޕީއެންސީއަކީ މި ވަގުތު ރާއްޖޭގެ އެންމެ ބޮޑު ސިޔާސީ ޕަޓީއަށް ވާއިރު، ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވެރިކަމަށް ވަޑައިގެންނެވިއިރު އެ ޕާޓީގެ މެންބަރުންގެ ގޮތުގައި ތިބީ ގާތްގަނޑަކަށް 3،000 އެއްހާ މެމްބަރުން ނެވެ. އެހެންނަމަވެސް އެމަނިކުފާނު ސަރުކާރާއި ހަވާލުވެވަޑައިގެންނެވުމަށްފަހު ވަނީ ޕާޓީގެ ހަރަކާތްތައް އިތުރުކުރައްވައި، މެމްބަރުން އިތުރުކުރުމުގެ ގިނަ މަސައްކަތްތަކެއް ކުރައްވާފަ އެވެ.