ފަލަސްތީނުގެ  ރައްޔިތުންނާ ދެކޮޅަށް ފަށާފައިވާ ގާޒާ ހަނގުރާމައާ ގުޅޭ ގޮތުން ޚިޔާލު ތަފާތުވެ ކޯޅުންބޮޑުވެ އެންމެ ފަހުން ޑިފެންސް މިނިސްޓަރުގެ މަގާމުން ޔޯވް ގަލަންޓް ވަކިކޮށްފި އެވެ.

ބޮޑުވަޒީރު ބެންޔަމިން ނަތަންޔާހޫގެ އޮފީހުން ނެރުނު ބަޔާނެއްގައި ބުނެފައި ވަނީ ޑިފެންސް މިނިސްޓަރު ވަކިކުރީ އޭނާއާ މެދު އިތުބާރު ގެއްލުމުން ކަމަށެވެ. އާ ޑިފެންސް މިނިސްޓަރަކަށް ހަމަޖެއްސީ ފޮރިން މިނިސްޓަރުގެ މަގާމުގައި ހުރި އިޒްރޭލް ކާޒް އެވެ.

އާ ޑިފެންސް މިނިސްޓަރު ކާޒް އެކްސްގައި ކުރި ޕޯސްޓެއްގައި ބުނެފައި ވަނީ ގާޒާ ހަނގުރާމައިގެ މަގްސަދު އޭނާގެ ބެލުމުގެ ދަށުން ހާސިލްކުރާނެ ކަމަށެވެ. 

ޑިފެންސް މިނިސްޓަރު ވަކިކުރުމާ ގުޅިގެން ތެލް އަވީވުގައި ހުންނަ ނަތަންޔާހޫގެ ގެދޮށަށް އެތައް ބަޔަކު ރޭ އެއްވެ ވަނީ މުޒާހަރާކޮށްފަ އެވެ. 

އޮކްޓޯބަރު 2023 ގައި ގާޒާ ހަނގުރާމަ ފެށި ފަހުން މިހާތަނަށް ވަނީ 43،391 މީހުން މަރުވެ 102،347 މީހުން ޒަޚަމްވެފަ އެވެ.