ގުދުރަތުގެ އަޖައިބުތަކުގެ ފާހަގަކޮށްލެވޭ ޑިސްޕްލޭއެއްގައި ރާއްޖޭގެ މަސްވެރިއަކު ވަނީ މަދުން ނޫނީ ނުފެންނަ ފިޔާތޮށި ކުލައިގެ ކަޅުބިލަ މަހެއް ބާނާ، އާންމު ރައްޔިތުންނާއި ކަނޑުގެ ދާއިރާއަށް ލޯބިކުރާ މީހުންގެ ކަޅި ހުއްޓުވާލައިފައެވެ.

އާންމުކޮށް ނުފެންނަ ކުލައެއްގެ ކަޅުބިލަމަހެއްގެ ވީޑިއޯ "ފަރެސްމާތޮޑާ މަސްވެރިން" ގެ ނަމުގައި ހިންގާ ފޭސްބުކް ޕޭޖުގައި މީގެ ދެތިން ދުވަސް ކުރިން ޕޯސްޓުކުރި އެވެ. އެއީ މަހަށް ނުކުމު އުޅުނު  "ސަފީނާ" ދޯނި އެ ދުވަހު ބޭނި ކަޅުބިލަ މަހުގެ ތެރެއިން ފަހަގަވި މަހެކެވެ.

ފަރެސްމާތޮޑާ މަސްވެރިންގެ ޕޯސްޓުގައި ބުނި ގޮތުގައި މަސް ބޭނި ގަޑީގައި މުޅި މަސް އެއްކޮށް އޮތީ ހުދާއި ފިޔާތޮށި ކުލާގައެވެ. އެކަމަކު މަސް ބޭނިފަހުން ގިނައިރުވީވަރަކަށް މަހުގެ ރީތި ކުލަ ދިޔައީ ފަނޑުވަމުންނެވެ.

ކަޅުބިލަމަސް ނުވަތަ ސްކިޕްޖެކް ޓޫނާ އަކީ ޓޫނާ އާއިލާ ސްކޮމްބްރިޑޭ އަށް ނިސްބަތްވާ ޕަރސިފޯމް މަހެކެވެ. މިއީ ކަޓްސުވޮނަސް ޖިންސުގެ ހަމައެކަނި މެމްބަރެކެވެ. އަދި ކަޓްސޫއޯ، އާރކްޓިކް ބޮނިޓޯ، މަޝްމައުތު، އޯޝަނިކް ބޮނިޓޯ، ސްޓްރައިޕްޑް ޓޫނާ ނުވަތަ ވިކްޓަރ ފިޝްގެ ނަމުން ވެސް ނަންދެވިފައިވެއެވެ.

ކަޅުބިލަ މަހަކީ އާންމުކޮށް ބުރަކަށީގައި ގަދަ ދަނބުނޫ އަދި ބަނޑުގައި ރިހިކުލަ ހުންނަ މަހެކެވެ. އަދި ބަނޑުގެ އަރިމަތީގައި ކަޅު ހަތަރު ރޮނގު ވެސް ހުރެއެވެ.

އެހެންނަމަވެސް، މި މަސްވެރިޔާއަށް މި ވަނީ އާދަޔާޚިލާފު ކުލައެއްގެ ކަޅުބިލަމަހެއް ބޭނިފައެވެ. މި މަސް އެ ދޯންޏަށް ނެގުމާއެކު، އޭނާއަށް ވަގުތުން އޭގެ ތަފާތު ކުލަ ފާހަގަ ކުރެވުނެވެ.

އާންމުގޮތެއްގައި މި މަހުގެ ކުލަ ތަފާތުވަނީ ޖެނެޓިކް މިއުޓޭޝަން، ޑައިޓް ނުވަތަ ތިމާވެށީގެ ސަބަބުން ކަމަށް ދިރާސާ ކުރެވިފައިވެއެވެ.

މީގެ ހަތަރު އަހަރު ކުރިން ޖަޕާނުގެ މަސްވެރިޔަކު ވެސް ވަނީ ފިޔާތޮށި ކުލައިގެ ކަޅުބިލަމަހެއް ޕަޕުއާ ނިއުގިނީގެ ދެކުނު ކަނޑުން ބާނާފައެވެ.  އެ މަސް ބޭނީ ޖަޕާނުގެ ޕްރިފެކްޗަރެއް ކަމަށްވާ ޝިޒުއޯކާއަށް ނިސްބަތްވާ މަސްވެރިއެކެވެ.

ފިޔާތޮށި ކަޅުބިލަމަހަކީ މަދުން ނޫނީ ނުފެންނަ ވައްތަރެއްގެ ކަޅުބިލަ މަހެކެވެ. އޭގެ އަނގަޔާއި ބަނޑު ހުންނަނީ ފިޔާތޮށި ކުލައަކަށެވެ. ސައިންސްވެރިން މައުލޫމާތު ދޭގޮތުގައި، ފިޔާތޮށި ކުލައިގައި ހުންނަނީ ކޮންމެ ފަސް މިލިއަނަކުން އެއް ކަޅުބިލަމަހެވެ.

އާންމު ގޮތެއްގައި ނުފެންނަ ވައްތަރެއްގެ މަހެއް ސަފީނާ ދޯނިން ބޭނުމުން ގިނަ ބައެއްގެ ސަމާލުކަން ވަނީ ލިބިފައެވެ.

ކުލައިގެ ތަފާތު ކަމެއް ހުއްޓަސް، މި އާދަޔާ ޚިލާފު މަހަކީ ކެއުމަށް ރައްކާތެރި އަދި ސިއްހީ އެއްވެސް ނުރައްކަލެއް ކުރިމަތިވާނެ މަހެއް ނޫނެވެ. 

ކަނޑުގެ ދިރުން މުއްސަނދި ދިވެހި ރާއްޖެއަކީ، ގިނަ ފަހަރަށް ގުދުރަތީ އަޖައިބުތަކުން ދިވެހިންނާ އަދި ފަތުރުވެރިންވެސް ހައިރާންކޮށްލާ ޤައުމެކެވެ.