އެމްޑީޕީގެ މަގުމަތީ ހަރަކާތްތަކުން ޤައުމުގެ މަސްލަޙަތު ނަގާލުމުގެ ނުރައްކާ އޮތްކަމަށާއި އެފަދަ ހަރަކާތްތަކަކީ ޤައުމުގެ އިޤްތިޞާދަށް ބޮޑު ގެއްލުމެއް ލިބިދާނެ ކަމެއް ކަމަށް މިނިސްޓަރ އޮފް ސްޓޭޓް ފޮރ ސިޓީސް، ލޯކަލް ގަވަރމަންޓް އެންޑް ޕަބްލިކް ވާކްސް އަލްއުސްތާޒު މޫސާ ފަތުޙީ އާދަމް ވިދާޅުވެއްޖެއެވެ.

އެމްއެމްޓީވީގެ "ބޮޑު ޚަބަރު" ޕްރޮގްރާމުގައި ވާހަކަ ދައްކަވަމުން މޫސާ ފަތުހީ ވިދާޅުވީ، މާޒީގައި އެމްޑީޕީން ސިޔާސީ ހަރަކާތްތަކުގެ ނަމުގައި ޤައުމުގެ މަސްލަޙަތު ނަގާލުމުގެ ބައެއް ކަންކަން ކޮށްފައިވާ ކަމަށެވެ.

އެމްޑީޕީން މިހާރު މަގުމައްޗަށް ނުކުންނަން އުޅެނީ ކޮން ހާލަތެއް އޮވެގެންތޯ ސުވާލު އުފައްދަވަމުން، އޭނާ ވިދާޅުވީ މިއީ ރާއްޖޭގެ ފަތުރުވެރިކަމުގެ ހައި ސީޒަން ކަމަށާއި، މިއީ ރާއްޖޭގެ އިޤްތިޞާދަށް ފައިދާވާން އޮތް ދަނޑިވަޅެއް ކަމަށެވެ. އަދި ޤައުމުގައި އޮތް ހަމަޖެހުން ގެއްލުވާލައި، އެ މަންޒަރު ފަތުރުވެރިންނަށް ދައްކަން އުޅެނީތޯ ސުވާލު ކުރެއްވިއެވެ.

މޫސާ ފަތުޙީ އިތުރަށް ވިދާޅުވީ، ރާއްޖޭގެ އިޤްތިޞާދީ ހާލަތު ރަނގަޅުވުމުގެ އާ ސިޔާސަތެއް އެކަށައެޅި، އިޤްތިޞާދު ރަނގަޅުވުމުގެ ފެހި ސިގްނަލް ފެންނަމުންދާ ދަނޑިވަޅެއްގައި، ޤައުމަށް ހެޔޮ އެދޭ ނަމަ، މިވަގުތު ޤައުމުގެ ހަމަޖެހުން ގެއްލޭ ފަދަ ކަމެއް އެއްވެސް މީހަކު ނުކުރާނެ ކަމަށެވެ. އަދި މިއީ ސިޔާސީ މަގުމަތީ ކެމްޕޭން ހަރަކާތެއް ހިންގަން އެއްވެސް މުނާސަބު ވަގުތެއް ނޫން ކަމަށްވެސް ވިދާޅުވިއެވެ.

މީގެއިތުރުން، މަސްވެރިކަމުގެ ދާއިރާއަށް ސަރުކާރުން ގެންނަމުންދާ ހެޔޮ ބަދަލުތަކުގެ ވާހަކަވެސް  އޭނާ ދެއްކެވިއެވެ. އެގޮތުން، އެމްޑީޕީގެ ވެރިކަން ނިމުނުއިރު މަސްވެރިންނަށް ދޭން ޖެހޭ އެތައް ސަތޭކަ މިލިއަން ރުފިޔާއެއް ނުދީ ހުރި ކަމަށާއި، މިހާރުގެ ސަރުކާރުން މަސްވެރިންނަށް ފަހި މާޙައުލެއް ޤާއިމުކޮށްދީފައިވާ ކަމަށް ވިދާޅުވިއެވެ.

މޫސާ ފަތުޙީ އިތުރަށް ވިދާޅުވީ، މަސްވެރިކަމުގެ ސިނާޢަތަށް ހެވެއް އެދޭނަމަ، މި ސިނާޢަތް ކުރިއަށްދާނެ މަގުތައް މަގުފަހިކޮށްދޭންވާނެ ކަމަށެވެ. އަދި މަސްވެރިން ސިޔާސީ ހަރަކާތްތަކުގެ ތެރެއަށް ވެއްދުމުގެ މަސައްކަތް ކުރުމުގެ ޙާލަތެއް މިހާރު ނެތް ކަމަށްވެސް ވިދާޅުވިއެވެ.