އިލެކްޝަންސް ކޮމިޝަނުގެ މެންބަރުކަމަށް ޢަބްދުލް ޙަސީބު އިސްމާޢީލް އައްޔަންކުރުމަށް ރައްޔިތުންގެ މަޖިލީހުން މިއަދު ވަނީ ފާސްކޮށްފައެވެ. މި ނިންމުން ނިންމާފައިވަނީ މަޖިލީހުގެ ވޯޓުގައި ބައިވެރިވި 67 މެންބަރުންގެ އިއްތިފާޤުންނެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ޙަސީބުގެ ނަން މަޖިލީހަށް ހުށަހެޅުއްވީ މިދިޔަ މަހުގެ 14 ވަނަ ދުވަހުއެވެ. މިއީ އިލެކްޝަންސް ކޮމިޝަނުގެ މިހާރުގެ ރައީސް ފުވާދު ތައުފީގުގެ މެންބަރުކަމުގެ މުއްދަތު މި މަހުގެ 23 ވަނަ ދުވަހު ހަމަވާތީ، އެ މަޤާމަށް އާ މެންބަރަކު އައްޔަންކުރުމަށްޓަކައެވެ.

މިނިވަން މުއައްސަސާތަކުގެ ކޮމިޓީން ޙަސީބުގެ ނަންފުޅު ދިރާސާކުރުމަށްފަހު، އޭނާ އިލެކްޝަންސް ކޮމިޝަނަށް އައްޔަންކުރުމަށް ފެންނަކަމަށް ނިންމައި، އެ ނިންމުން މަޖިލީހަށް ހުށަހެޅިއެވެ. މަޖިލީހުން މިއަދު ނެގި ވޯޓުގައި ހުރިހާ މެންބަރުން ވެސް ވަނީ ޙަސީބު އައްޔަންކުރުމަށް ތާއީދުކުރައްވާފައެވެ.

ޙަސީބަކީ މިހާރު އިލެކްޝަންސް ކޮމިޝަނުގެ އެސިސްޓެންޓް ޑިރެކްޓަރުގެ މަޤާމު ފުރުއްވަމުންދާ ބޭފުޅެކެވެ. އޭނާ އިލެކްޝަންސް ކޮމިޝަނާ ގުޅިވަޑައިގަތީ 2022 ވަނަ އަހަރުގެ ޖަނަވަރީ މަހުގެ 2 ވަނަ ދުވަހުއެވެ. މީގެ އިތުރުން، ޙަސީބު ވަނީ މާލީ ވުޒާރާ އަދި އިސްލާމީ ކަންތައްތަކާބެހޭ ވުޒާރާގައި އިސް މަޤާމުތަކެއް ފުރުއްވާފައެވެ.

.