އިންސާނުންގެ ދިރިއުޅުމަށް ހިތްފަސޭހަ މާޙައުލެއް ޤާއިމުކުރުމަކީ އެބައެއްގެ ނަފްސާނީ އަދި ޖިސްމާނީ ދުޅަހެޔޮކަމާ ސީދާ ގުޅުންހުރި ކަމެކެވެ. ދިރިއުޅުމަށް ހޮވާ ތަނަކީ އަސާސީ ޚިދުމަތްތަކާއި ހިތްހަމަޖެހުން ލިބިދޭ ތަނަކަށްވުމަކީ މުހިންމުކަމެކެވެ. ސިޔާސީ މަޞްލަޙަތަށްޓަކައި ރައްޔިތުންގެ މުސްތަޤުބަލާ ގުޅުންހުރި ނިންމުންތައް އަވަސްއަރުވާލައިގެން ނިންމައި، ރައްޔިތުން ކަންބޮޑުވުމުގެ ތެރެއަށް ވައްޓާލުމަކީ އެއްވެސް ރައްޔިތަކު ޤަބޫލުކުރާނެ ކަމެއް ނޫނެވެ. ނިމިދިޔަ ސަރުކާރުގެ ދައުރު ނިމެން ގާތްވެފައިވަނިކޮށް ސަރުކާރުން އިޢުލާނުކުރެއްވި ބިންވެރިޔާ ސްކީމްގެ ދަށުން 9000 ވުރެ ގިނަ ރައްޔިތަކަށް ގޯތި ދިނެވެ.

ގުޅީފަޅުގެ ބިން ބޭނުންކުރުމުގެ ކުރީގެ އަދި އައު ޕްލޭންތަކުގައި އެ ސަރަޙައްދާ މެދު ވަރަށް ތަފާތު ދެ ތަޞައްވުރެއް ފެންނަން އެބަހުއްޓެވެ. ކުރީގެ ޕްލޭނަކީ މައިގަނޑު ގޮތެއްގައި ސިނާޢީ ބޭނުންތަކަށް އަމާޒުކުރެވިފައިވާ ޕްލޭނެކެވެ. މި ޕްލޭނުގެ މައިގަނޑު މަޤްޞަދަކީ ގުޅީފަޅު ލޮޖިސްޓިކްސް އަދި ގުދަންކުރުމުގެ މަރުކަޒަކަށް ބަދަލުކުރުމެވެ. އޭގެ އަސާސީ ވަސީލަތްތައް ފަރުމާކުރެވިފައިވަނީ މައިގަނޑު ގޮތެއްގައި ވިޔަފާރިއާއި ގުދަންކުރުމުގެ ބޭނުންތަކަށް ޚިދުމަތްދިނުމަށެވެ.

މީހުން ދިރިއުޅޭ ސަރަޙައްދުތަކާއި، ޤުދުރަތީ މާޙައުލާއި، އާންމު ޖާގަތަކަށް ދެވިފައިވަނީ ވަރަށް މަދު ސަމާލުކަމެކެވެ. މީގެ ސަބަބުން، ތަރައްޤީގެ ދާއިރާ ހަނިވެފައިވަނީ ހަމައެކަނި ސިނާޢީ އޮނިގަނޑަކަށެވެ. އަދި މަގުތަކާއި ގުދަންކުރުމުގެ ވަސީލަތްތައް ފިޔަވައި، އެ ސަރަޙައްދުގައި ދިރިއުޅޭ މީހުންނަށާއި، މަސައްކަތްކުރާ މީހުންނަށާއި، ޒިޔާރަތްކުރާ މީހުންނަށް ދެވޭ ޚިދުމަތްތަކާއި ވަސީލަތްތައް ވަރަށް މަދުކަން ފާހަގަކުރެވެއެވެ.

އޭގެ އިދިކޮޅަށް، އައު ޕްލޭންގައި ގުޅީފަޅު ދެކެފައިވަނީ އިޤްތިޞާދީ އަދި ދިރިއުޅުމުގެ ބޭނުންތަކަށް އަމާޒުކޮށްފައިވާ ހަމަހަމަ، މުޖުތަމަޢެއްގެ ގޮތުގައެވެ. މާލޭގެ އާބާދީ ތޮއްޖެހުމަށް ޙައްލެއް ހޯދައިދިނުމުގެ ގޮތުން، ކައިރީގައި އިތުރު ދިރިއުޅޭނެ ސަރަޙައްދެއް ފޯރުކޮށްދިނުމަށް ގޭގެ އިމާރާތްކުރުމަށް ފާހަގަކޮށްލެވޭ މިންވަރަކަށް ޖާގަ ކަނޑައަޅާފައިވެއެވެ.

 މި އައު ޕްލޭނުން ގެނެސްދެނީ ދިރިއުޅުމާއި، މުނިފޫހިފިލުވުމާއި، އަދި މުޖުތަމަޢުއަށް އަމާޒުކުރެވިފައިވާ ވަސީލަތްތަކަށް އިސްކަންދޭ އައު ތަޞައްވުރެކެވެ. ޕާކުތަކާއި، ސްކޫލްތަކާއި، ޞިއްޙީ މަރުކަޒުތަކާއި، އަދި މުޖުތަމަޢުގެ ޖާގަތައް ރޭވިފައިވާކަމީ ދިރިއުޅެން އެކަށީގެންވާ، ދުޅަހެޔޮކަމާއި މަތީ ފެންވަރުގެ ދިރިއުޅުމެއް ކުރިއަރުވާ މާޙައުލެއް އުފެއްދުމަށް ކުރެވޭ މަސައްކަތުގެ ހެއްކެކެވެ.

މި ދެ ޕްލޭނުގެ މެދުގައި ހުރި ތަފާތުތަކަކީ ހަމައެކަނި ޢުމްރާނީ ތަރައްޤީގެ ނަޒަރިއްޔާތުގެ ތަފާތުތަކެއް ނޫނެވެ. އެއީ މުޖުތަމަޢުގެ ދުޅަހެޔޮކަމާއި، ދިރިއުޅުމުގެ ފެންވަރާއި، އަދި ދެމެހެއްޓެނިވި ތަރައްޤީއާ މެދު ގެންގުޅޭ ތަފާތު ފިކުރުތަކެވެ. އައު ޕްލޭނުން ދައްކުވައިދެނީ އިންސާނުންގެ ބޭނުންތަކަށް އިސްކަންދޭ، ތިމާވެށްޓާ ރައްޓެހި، އަދި މުޖުތަމަޢުގެ އެކި ދާއިރާތަކަށް ފުރުޞަތު ހުޅުވާލާ ތަރައްޤީގެ ވިސްނުމެކެވެ.

އައު ޕްލޭނުގެ އެންމެ ފާހަގަކޮށްލެވޭ އެއް ކަމަކީ އޭގެ ހަރުދަނާ ޑިޒައިނެވެ. ދިރިއުޅޭ ސަރަޙައްދުތަކާއި، ވިޔަފާރީގެ ސަރަޙައްދުތަކާއި، މުނިފޫހިފިލުވުމުގެ ސަރަޙައްދުތައް ވަކި ހަމައަކުން ބަހާލެވިފައިވާ ގޮތުން، މުޅި ސަރަޙައްދަކީ އަމިއްލައަށް ފުދުންތެރި، ދިރުންހުރި މުޖުތަމަޢުއަކަށް ވެގެންދާނެއެވެ. މީގެ ސަބަބުން ރައްޔިތުންނަށް ދިރިއުޅުމާއި މަސައްކަތް އެއް ސަރަޙައްދެއްގައި ކުރުމުގެ ފުރުޞަތު ލިބި، ދަތުރުފަތުރުގެ ޚަރަދާއި ވަގުތު ސަލާމަތްވެގެންދާނެއެވެ.

އަލަށް ހެދުނު ޕްލޭނުގައި ހިމެނޭ އާންމު ޖާގަތަކާއި، މުނިފޫހިފިލުވުމުގެ ސަރަޙައްދުތަކާއި، އިޖްތިމާޢީ ވަސީލަތްތަކަކީ ހަމައެކަނި ޖާގައިގެ ބޭނުން ހެޔޮގޮތުގައި ހިފުމަށް ކުރެވޭ މަސައްކަތެއް ނޫނެވެ. މިފަދަ ޕްލޭނަކުން ދައްކުވައިދެނީ ހަމައެކަނި އިޤްތިޞާދީ ކުރިއެރުމަށް ބަލައިގެން ނޫން، އިންސާނުންގެ ދުޅަހެޔޮކަމާއި މުޖުތަމަޢުގެ ތަރައްޤީއަށް އިސްކަންދޭ ތަރައްޤީގެ ނަމޫނާއެކެވެ.

މި އައު ލޭންޑް ޔޫޒް ޕްލޭނަކީ ހަމައެކަނި ކަރުދާހުގައި ކުރަހާފައިވާ ކުރެހުމެއް ނޫނެވެ. އެއީ ދިވެހިންގެ ހިތްތަކުގައި އަށަގެންފައިވާ އުއްމީދީ ހުވަފެނެއް ޙަޤީޤަތަކަށް ބަދަލުވަމުންދާ ތަޞައްވުރެކެވެ.

އިޤްތިޞާދީ ގޮތުން ބަލާއިރު، މި އައު ޕްލޭނުގައި ހިމެނިފައިވާ ދިރިއުޅޭ ސަރަޙައްދުތަކާއި ވިޔަފާރީގެ ސަރަޙައްދުތަކުގެ ސަބަބުން، ސިނާޢީ ދާއިރާގެ އިތުރުން އެހެނިހެން ދާއިރާތަކުގައިވެސް ވަޒީފާގެ ފުރުޞަތުތައް އިތުރުވެގެންދާނެއެވެ. މިގޮތަށް އިޤްތިޞާދީ ހަރަކާތްތައް ތަފާތުކުރުމުގެ ސަބަބުން، އެ ސަރަޙައްދު ހަމައެކަނި އެއް ދާއިރާއަކަށް ބަރޯސާވުން ކުޑަވެ، އިޤްތިޞާދީގޮތުން އިތުރަށް ވަރުގަދަވެގެންދާނެއެވެ.

މީގެއިތުރުން، މި އައު ޕްލޭނުގައި ހިމެނޭ ޕާކުތަކާއި ހުސްބިންތަކުގެ ސަބަބުން ތިމާވެށި ރައްކާތެރިކުރުމަށް ބާރުއެޅިގެންދާނެއެވެ. މިފަދަ ފެހި ސަރަޙައްދުތަކުގެ ސަބަބުން ހޫނުމިން ދަށްވެ ވައި ސާފުވެގެންދާނެއެވެ. މިއީ މުޅި ތިމާވެށްޓަށް ލިބޭ ފައިދާއެކެވެ.

މި އައު ލޭންޑް ޔޫޒް ޕްލޭނަކީ ހަމައެކަނި ގުޅިފަޅު ތަރައްޤީކުރުމުގެ މަޝްރޫޢެއް ނޫނެވެ. އެއީ މުޅި ދިވެހިރާއްޖޭގެ މުސްތަޤްބަލަށް އައު އުއްމީދެއް ގެނެސްދޭ މަޝްރޫޢެކެވެ. މި ޕްލޭނުގެ ސަބަބުން ދިވެހިރާއްޖޭގެ އިޤްތިޞާދީ ވިއުގަ ފުޅާވެ، އިޖްތިމާޢީ ދުޅަހެޔޮކަން އިތުރުވެ، އަދި ތިމާވެށްޓާ ރައްޓެހި ތަރައްޤީއެއް ޙާޞިލުކުރެވޭނެއެވެ.

ލޭންޑް ޔޫޒް ޕްލޭނަކީ ދިވެހިރާއްޖޭގެ މާދަމާގެ ތަރައްޤީއަށް އަލިމަގެއް ދައްކައިދޭ މަޝްރޫޢެކެވެ. މިއީ ދެމެހެއްޓެނިވި، ދިރިއުޅުމަށް އެކަށޭނަ، އަދި އިޤްތިޞާދީގޮތުން ފުދުންތެރި މުޖުތަމަޢުއެއް އުފެއްދުމަށް އަމާޒުކުރެވިފައިވާ ފުރިހަމަ ތަޞައްވުރެކެވެ. މި ޕްލޭނުގެ ސަބަބުން ދިވެހިރާއްޖެއަށް އައު ފަޚުރުވެރިކަމެއް ލިބި، ޤައުމުގެ ކުރިމަގު އިތުރަށް އުޖާލާވާނެއެވެ.

މިފަދަ ޕްލޭނެއް ތަންފީޛުކުރުމަކީ ރާއްޖޭގެ ކުރިމަގު އުޖާލާކުރުމަށް އެޅޭ ހަރުދަނާ ފިޔަވަޅެކެވެ.މިކަން