ރައްޔިތުން މިއަދު ތިބީ ހެޔޮ ވެރިކަމެއް ކުރާތަން ބަލަން ކަމަށް މިނިސްޓްރީ އޮފް އެގްރިކަލްޗާ އެންޑް އެނިމަލް ވެލްފެއާގެ ސީނިއަރ ޕޮލިޓިކަލް ޑިރެކްޓަރ އާމިނަތު ޒޫނާ ވިދާޅުވެއްޖެއެވެ.

އެމްއެމްޓީވީގެ "ބޮޑު ޚަބަރު" ޕްރޮގްރާމުގައި ވާހަކަ ދައްކަވަމުން ޒޫނާ ވިދާޅުވީ، އިދިކޮޅު އެމްޑީޕީއިން ޤައުމުގެ މަޞްލަޙަތު ނަގާލަން ޖެހޭ އެއްވެސް ޙާލަތެއް ދިމާވެފައި ނުވާ ކަމަށާއި އެމްޑީޕީއިން މި މަހުގެ 31 ވަނަ ދުވަހު އެއްވާ އެއްވުމަކީ މި ޤައުމުގެ ހަމަޖެހުމާއި އަމަން އަމާންކަން ނަގާލުމުގެ ބޭނުމުގައި ކުރާ ކަމެއް ކަމަށެވެ.

އާ އަހަރާއެކު، ޤައުމީ އެއާލައިނަށް ދުރު ރާސްތާ ދަތުރުތައް ކުރުމަށްޓަކައި ވައިޑްބޮޑީ އެއާކްރާފްޓެއް ގެނައުމަކީ ރާއްޖޭގެ އިޤްތިޞާދަށް ވަރަށް ފައިދާ ކުރާނެ ކަމެއް ކަމަށާއި އެހެން ނަމަވެސް އެމްޑީޕީއިން އެކަމަށް ފާޑު ކިޔަމުންގެންދާ ކަމަށް ޒޫނާ ފާހަގަކުރެއްވިއެވެ.

މީގެ އިތުރުން ޒޫނާ ވިދާޅުވީ އެމްޑީޕީއިން ދައްކާ ވާހަކަ ރައްޔިތުން މިހާރު ޤަބޫލުއް ނުކުރާނެ ކަމަށެވެ. އަދި އެމްޑީޕީގެ ވެރިކަމުގައި ރައްޔިތުންނަށް މަންފާ ލިބޭ އެއްވެސް ކަމެއް ނުކުރާ ކަމަށް ޒޫނާ ވިދާޅުވިއެވެ.

ނިމިދިޔަ ވެރިކަމުގައި ރައްޔިތުންނަށް ގެއްލުންވާގޮތަށް ހިންގާފައިވާ އެންމެ ބޮޑު ކޮރަޕްޝަންތަކަކީ މަސްވެރިންނަށް ފައިސާ ނުދިނުމާއި ކުންފުނިތަކަށް ދޭންޖެހޭ ފައިސާ ނުދީ ކުންފުނިތައް ބަނގުރޫޓުކޮށްލުންކަމަށް ޒޫނާ ފާހަގަކުރެއްވިއެވެ.