އިތުރު ޖަނަރޭޓަރުތައް ގެނެސް އަންނަ ރޯދަ މަހުގެ ކުރިން ރަށްރަށުގައި ކަރަންޓަށް ދިމާވާ މައްސަލަ ހައްލުކުރުމަށް ސަރުކާރުން އަމާޒު ހިފާފައިވާ ކަމަށް ރައީސް ޑރ. މުޙައްމަދު މުޢިއްޒު މިރޭ ވިދާޅުވެއްޖެ އެވެ.

ހުވަދޫ އަތޮޅަށް ކުރައްވަމުން ގެންދަވާ ދަތުރުފުޅުގެ ތެރެއިން ގދ. ފިޔޯރީ ރައްޔިތުންނާ ބައްދަލުކުރައްވާ ވާހަކަފުޅު ދައްކަވަމުން ރައީސް ވިދާޅުވީ ރޯދަ މަހާ ދިމާކޮށް ކަރަންޓުގެ މައްސަލައަށް ހައްލެއް ގެނެސްދިނުމަށް ވަރަށް ބޮޑު އިސްކަމެއްދެއްވާ ކަމަށެވެ.

ރަނގަޅަށް މެއިންޓެއިން ނުކުރެވެމުގެ ސަބަބުން ފެނަކައިގެ އިންޖީނުގޭ ތަކުގެ ޖަނަރޭޓަރުތައް ހުރީ ހަލާކުވެފައިކަން ފާހަގަކުރައްވާ ރައީސް ވިދާޅުވީ އެ މައްސަލަ ހައްލުކުރުމަށް ފިނޭންސް މިނިސްޓްރީއާއި އެސްއޯއީތައް ގުޅިގެން މަސައްކަތްތަކެއް ފަށާފައިވާ ކަމަށެވެ. އޭގެ ނަތިއްޖާ ކުރިއަށް ދެ މަސް ތެރޭގައި ފެންނާނެ ކަމަށް ރައީސް ވިދާޅުވި އެވެ.

ރަށްރަށުން ކަރަންޓު ކެނޑޭ މައްސަލަ އަކީ އަބަދުހެން ދިމާވާ މައްސަލައަކަށްވާއިރު އެކަމަށް ހައްލެއް ހޯދިފައި ނެތުމުގެ ކަންބޮޑުވުން އަބަދުވެސް އޮވެ އެވެ.