އއ. އަތޮޅުގެ ސްކޫލުތަކުގެ އިސްވެރީންނަށް ހާއްސަކޮށް ލީޑަރޝިޕް ޓްރޭނިންގ ޕްރޮގްރާމެއް ކުރިޔަށް ގެންގޮސްފިއެވެ.

އުކުޅަހުގައި ކުރިއަށްދިޔަ މި ތަމްރީނު ޕްރޮގްރާމްގައި އއ. އަތޮޅުގެ ސްކޫލުތަކުން ޖުމްލަ 52 ބޭފުޅުން ބައިވެރިވިއެވެ.

މި ވޯކްޝޮޕް ފެސިލިޓޭޓްކޮށްދެއްވާފައި ވަނީ މިނިސްޓްރީ އޮފް އެޑިއުކޭޝަންގެ ޕަރމަނަންޓް ސެކްރެޓަރީ ޝިފާޒް މުޙައްމަދު، އިސްކަންދަރު ސްކޫލުގެ ޕްރިންސިޕަލް މުޙައްމަދު ޝުކުރީ، އަދި ޞަލާޙުއްދީން ސްކޫލުގެ ޑެޕިއުޓީ ޕްރިންސިޕަލް ޒަހީނާ ޢަބްދުﷲ އެވެ. މި ފަރާތްތަކުގެ ތަޖުރިބާގެ އަލީގައި ބައިވެރިންނަށް ސްކޫލް ކުރިއެރުވުމާއި، ސުޕަވައިޒްކުރުމާއި، ލަނޑުދަނޑިތައް ކަނޑައެޅުމާއި، އަދި މީހުންނާ މުޢާމަލާތްކުރުމުގެ ހުނަރުތައް ފަދަ މުހިންމު ދާއިރާތަކުން ލީޑަރޝިޕްގެ ހުނަރުތައް ތަރައްޤީކުރުމުގެ ތަމްރީން ލިބިގެންދާނެއެވެ.

މި ވޯކްޝޮޕްގެ މައިގަނޑު މަޤްޞަދަކީ ސްކޫލްތައް ހިންގުމުގައި ބޭނުންކުރާ ޒަމާނީ އާ ގޮތްތަކާއި، އާ އީޖާދުތަކާ ގުޅޭ މަޢުލޫމާތު ޕްރިންސިޕަލުންނަށް ހިއްސާކޮށް އަހުލުވެރިކުރުވުމެވެ.

މި ފަދަ ވޯކްޝޮޕްތަކުގެ ސަބަބުން ސްކޫލުތަކުގެ ވެރިންނަށް އެ ފަރާތްތަކުގެ މަސައްކަތުގެ މާޙައުލުގައި ދިމާވާ ޚާއްޞަ ގޮންޖެހުންތަކަށް އަމާޒުކޮށްގެން ޙައްލުތައް ހޯދުމަށް ހޭނިގެންދާނެއެވެ. މީގެ އިތުރުން، ބައިވެރިންގެ މެދުގައި ނެޓްވޯކެއް އުފެދި، ކުރިމަގުގައި އެއްބަޔަކު އަނެއްބަޔަކަށް އެހީތެރިވެ، މަޢުލޫމާތު ޙިއްޞާކުރުމަށް މަގުފަހިވެގެންދާނެއެވެ.

މި ސިލްސިލާގެ ވޯކްޝޮޕްތައް މިހާތަނަށް ވަނީ ގދ، ގއ، ކ، މާލެ ސިޓީ، އައްޑޫ ސިޓީ، ފުވައްމުލަކު ސިޓީ، ގެ އިތުރުން މ އަދި ވ އަތޮޅުގައިވެސް ކުރިއަށް ގެންގޮސްފައެވެ.