ޔުނިވަރސަލް ޕީރިއޮޑިކް ރިވިއު (ޔޫ.ޕީ.އާރު.) ގެ 47 ވަނަ ބައްދަލުވުން މިއަދު ސްވިޒަލޭންޑްގެ ޖެނީވާގައި ހުންނަ އ.ދ ގެ އޮފީހުގައި ފަށައިފި އެވެ.

މި ބައްދަލުވުމުގައި ދިވެހިރާއްޖެއިން ބައިވެރިވެއެވެ.

ނޮވެމްބަރު 4 އިން 15 އަށް ކުރިއަށްދާ މި ސެޝަންގައި 14 ޤައުމެއްގެ އިންސާނީ ޙައްޤުތަކުގެ ޙާލަތު ވަޒަންކުރެވޭނެއެވެ. މީގެ ތެރޭގައި އަލްބޭނިއާ، ބޫޓާން، ބްރޫނާއި، ކޮންގޯ، ކޮސްޓަ ރީކާ، ކޮޓެ ޑިވުއާ، ޑޮމިނިކާ، އިކުއިޓޯރިއަލް ގިނީ، އިތިއޯޕިއާ، ޑިމޮކްރެޓިކް ޕީޕަލްސް ރިޕަބްލިކް އޮފް ކޮރެއާ، ނިކަރާގުއާ، ނޯވޭ، ޕޯޗުގަލް އަދި ޤަތަރު ހިމެނެއެވެ.

ޔޫ.ޕީ.އާރު. އަކީ އ.ދ. ގެ މެމްބަރު ޤައުމުތަކުގެ އިންސާނީ ޙައްޤުތަކުގެ ޙާލަތު ވަޒަންކޮށް ދެނެގަތުމަށް އެކުލަވާލާފައިވާ ނިޒާމެކެވެ. މި ނިޒާމުގެ ދަށުން، ޤައުމުތަކަށް އެމީހުންގެ އިންސާނީ ޙައްޤުތަކުގެ ކުރިއެރުންތައް ހުށަހެޅުމުގެ ފުރުޞަތު ލިބެއެވެ.

ދިވެހިރާއްޖެއިން މި ބައްދަލުވުމުގައި ބައިވެރިވާ ވަފުދުގެ އެންމެ އިސް ފަރާތަކީ ޖެނީވާގައި ހުންނަ އދ.ގެ އޮފީހަށް ކަނޑައަޅާފައި ހުންނަ ދިވެހިރާއްޖޭގެ ދާއިމީ މަންދޫބު ޑރ. ސަލްމާ ރަޝީދެވެ. މީގެ އިތުރުން، ވަފުދުގައި ކައުންސެލަރ އާދަމް ހާމިދު، ކައުންސެލަރ އަލްއުސްތާޛާ އާމިނަތު ޝިފާޔާ އިބްރާހީމް، ސެކަންޑް ސެކްރެޓަރީ މަރްޔަމް ފާތިކާ ފަޔާޒް އަދި އެޓާޝޭ މުޙައްމަދު ރާއިދު ސައީދު ހިމެނެއެވެ.

ދިވެހިރާއްޖެއިން މި ބައްދަލުވުމުގައި ބައިވެރިވެ، ރިވިއު ކުރެވޭ ޤައުމުތަކަށް ދިވެހި ސަރުކާރުގެ ސިޔާސަތުތަކާ އެއްގޮތްވާ ގޮތުގެ މަތިން ބިނާކުރަނިވި އިސްލާޙުތަކެއް ހުށަހަޅާނެ ކަމަށް ބެލެވެއެވެ. އަދި ޤަތަރުގެ ރިވިއުގައި ދިވެހިރާއްޖެއިން ޓްރޮއިކާގެ މެންބަރެއްގެ ގޮތުގައި ބައިވެރިވާނެއެވެ.