މިދިޔަ ނޮވެމްބަރު މަހު ބާޒާރުގައި ކަނޑުމަހާއި ކާބޯތަކެތީގެ އަގު ކުޑަކޮށް ދަށަށްޖެހިލައި، އެހެން ގިނަ ބާވަތްތަކުގެ އަގު މައްޗަށް އުފުލިފައިވާ ކަމަށް މޯލްޑިވްސް ބިއުރޯ އޮފް ސްޓެޓިސްޓިކްސް (އެމްބީއެސް) އިން ވިދާޅުވެއްޖެއެވެ.

އެމްބީއެސްއިން އާންމުކުރެއްވި ކޮންސިއުމާ ޕްރައިސް އިންޑެކްސް (ސީޕީއައި) ދައްކާ ގޮތުގައި މިދިޔަ އަހަރުގެ އޮކްޓޫބަރު މަހާއި އަޅާބަލާއިރު، މިދިޔަ ނޮވެމްބަރު މަހު ކާބޯތަކެތީގެ އަގު 0.19 އިންސައްތަ އަދި މަހުގެ ބާވަތްތަކުގެ އަގު 0.36 އިންސައްތަ ވަނީ ދަށަށް ގޮސްފައެވެ. މި ދެ ކެޓަގަރީގައި އަގު ދަށަށް ދިޔަ ތަކެތީގެ ތެރޭގައި ލިނބޮލާއި ފަރުމަހާއި މިރުހާއި ކެރެޓް ފަދަ ބާވަތްތައް ފާހަގަކުރައްވާފައިވެއެވެ.

ނޮވެމްބަރު މަހުގެ ސީޕީއައި ދައްކާ ގޮތުން ޖުމްލަކޮށް މުދަލާއި ޚިދުމަތުގެ އަގު ވަނީ 2.47 އިންސައްތަ އުފުލިފައެވެ. ނިސްބަތުން އެންމެ ބޮޑަށް އަގު އުފުލިފައި ވަނީ ދުންފަތާއި ދުފަން ބެނުންކުރާ ބާވަތްތަކުގެ އަގެވެ. ދުންފަތުގެ ބާވަތްތަކުގެ އަގު ނޮވެމްބަރު މަހު 77 އިންސައްތަ އުލިފައިވެއެވެ. 

ސީޕީއައި ދައްކާ ގޮތުން ނޮވެމަބަރު މަހު ވަނީ ކާބޯތަކެތީގެ ޚިދުމަތްދޭ ތަންތަނާއި އެކޮމަޑޭޝަންގެ ޚިދުމަތްދޭ ތަންތަނުގެ އަގު 15 އިންސައްތަ މަތިވެފައެވެ. މީގެ އިތުރުން ދަތުރުފަތުރުގެ ޚިދުމަތުގެ އަގު 0.63 އިންސައްތަ މަތިވެފައިވެއެވެ. 

ބާޒާރުގެ އަގުތައް ދިރާސާކުރެއްވުމަށް ފަހު ކޮންމެ މަހެއް ނިމުމުން ވެސް އެމްބީއެސްއިން ސީޕީއައި ނެރުއްވައެވެ.