ހުޅުމާލޭގެ ޓްރެފިކް ފްލޯއަށް ބަދަލު ގެނައުމާއެކު ހުޅުމާލޭގައި ހިނގާ އެކްސިޑެންޓްތައް މަދުވެއްޖެ ކަމަށް ސުޕްރިޓެންޑެންޓް އޮފް ޕޮލިސް އަޙްމަދު ފަޞީޙު ވިދާޅުވެއްޖެއެވެ.

އެމްއެމް ޓީވީގެ "ބޮޑު ޚަބަރު" ޕްރޮގްރާމުގައި ވާހަކަ ދައްކަވަމުން އަޙްމަދު ފަޞީޙު ވިދާޅުވީ ރާއްޖެ އަމާންކުރުމުގެ މަސައްކަތް ވަރަށް ބޮޑަށް ކުރެވެމުންދާ ކަމަށާއި ވަކިން ޚާއްސަކޮށް މާލެ އާއި ހުޅުމާލޭގެ މަގުތަކުގައި މި މަސައްކަތް ފުޅާ ދާއިރާއެއްގައި ކުރަމުންދާ ކަމަށެވެ. މި ކަމުގެ ސަބަބުން ރައްޔިތުންނަށް ބޮޑެތި ފަސޭހަތަކެއްވެ ޓްރެފިކް މައްސަލަތަކަށް ވަރަށް ބޮޑެތި ޙައްލުތަކެއް ލިބިގެންދާ ކަމަށް ވެސް ފަޞީޙު ވިދާޅުވިއެވެ.

ހުޅުމާލޭގެ އާބާދީ މިދިޔަ އަހަރު ވަރަށް ބޮޑަށް އިތުރުވުމުން މާލެ އާއި ހުޅުމާލެއާ ދޭތެރޭގައި ދަތުރުކުރާ މީހުން ގިނަވެފައިވަން ފަޞީޙު ފާހަގަކުރެއްވިއެވެ. އަދި މީގެ ސަބަބުން މި އަހަރު ރިޕޯޓުކުރެވިފައިވާ އެކްސިޑެންޓްތަކުގެ އަދަދު އިތުރުވެފައިވާ ކަމަށް ވެސް ފަޞީޙް ވިދާޅުވިއެވެ.