މޯލްޑިވިއަންގެ ދަތުރުތަކުގައި ބޭނުން ކުރުމަށް ގެންނަ ފުރަަތަމަ ވައިޑް ބޮޑީ މަތިންދާބޯޓު ދައްކާލުމަށް ހޯމަ ދުވަހު ހަވީރު ބާއްވާ އެއާޝޯގެ ފޮޓޯ އާއި ވީޑިއޯ ނަގައިގެން ރަނގަޅު އިނާމުތަކެއް ހޯދުމުގެ ފުރުސަތު އައިލެންޑް އޭވިއޭޝަން ސާވިސް (އައިއޭއެސް) އިން ހުޅުވާލައްވައިފިއެވެ. 

އައިއޭއެސްއިން ނެރުއްވި ނޫސް ބަޔާނެއްގައި ބުނެފައިވާ ގޮތުގައި އެއާބަސް އޭ-330 ގެ ބޯޓު ދައްކާލުމަށް ބާއްވާ އެއާޝޯގެ ފޮޓޯ އާއި ވީޑިއޯ ނަގާ ފަރާތްތަކުގެ ތެރެއިން އެންމެ ކަމުދާ ފޮޓޯ އަކާއި ވީޑިއޯއެއް ނަގާ ފަރާތް ހޮވާނީ ވަކިންނެވެ. 

މި މުބާރާތުގައި އެއްވަނަ އަށް ހޮވޭ ފަރާތްކަށް ފައިވް ސްޓާ ރިސޯޓެއްގައި ދެ ރޭ ހުރުމުގެ ފުރުސަތާއި އެއާބަސް އޭ330-200 އެއާކްރާފްޓް މޮޑެލްއެއް ލިބޭނެ އެވެ. ދެވަނައަށް ހޮވޭ ފަރާތަށް ދިނުމަށް ހަމަޖައްސާފައި ވަނީ އިންޑިއާގެ ޓްރިވެންޑްރަމް ނުވަތަ ކޮޗިންއަށް ދެ މީހެއްގެ ރިޓާން ޓިކެޓާއި އެއާބަސް އޭ330-200 އެއާކްރާފްޓް މޮޑެލްއެކެވެ. އަދި ތިންވަނައަށް ހޮވޭ ފަރާތަށް ރާއްޖޭގެ އެތެރޭގެ ބޭނުން މަންޒިލަކަށް ދެ މީހެއްގެ ރިޓާން ޓިކެޓާއި އެއާބަސް އޭ330-200 އެއާކްރާފްޓް މޮޑެލްއެއް ލިބޭނެކަމަށް އައިއޭއެސްއިން ވިދާޅުވެއެވެ.

އެއާޝޯގެ ފޮޓޯ އާއި ވީޑިއޯ މުބާރާތުގައި ބައިވެރިވެވޭނީ ނަގާ ފޮޓޯ އާއި ވީޑިއޯ ފޭސްބުކް، އިންސްޓަގްރާމް ނުވަތަ އެކްސްގައި MaldivianAeroAirshow# ހޭޝްޓެގާ އެކު maldivianaero ޓެގުކޮށްފައި ޕޯސްޓުކޮށްގެންނެވެ. ފޮޓޯ އާއި ވީޑިއޯ ޕޯސްޓުކުރާއިރު، އެކައުންޓް ޕަބްލިކު ކުރަން ޖެހެއެވެ.

މޯލްޑިވިއަންއިން އެއާޝޯ ބާއްވަނީ ހޯމަ ދުވަހުގެ ހަވީރު 5:00-5:30 އަށެވެ. މާލޭގެ އުސްފަސްގަނޑުގެ އިތުރުން، ހުޅުމާލެ 1 އަދި 2 ގެ އިރުމަތީ ފަރާތު އަތިރިމަތީގައި ކުރިއަށްދާ މި އެއާޝޯގައި މޯލްޑިވިއަންގެ އާ ބޯޓާއި އިތުރު ހަތަރު ބޯޓު އެކުގައި ދަތުރުކުރާނެއެވެ.