ޝަހީދުންގެ ހިޔާގެ ނަމުގައި 50 ހައުސިން ޔުނިޓް އެޅުމަށް ސަރުކާރުން ނިންމާފައިވާކަމަށް ނަޞްރުގެ ދުވަހުގެ މުނާސަބަތުގައި  ރޭ ދަރުބާރުގޭގައި ބޭއްވެވި ޖަލްސާގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެ އެވެ.

މި ޖަލްސާގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ޑޮކްޓަރ މުޢިއްޒު ވަނީ ޝަހީދުން ކުރެއްވި މަތިވެރި ޖިހާދު އޭގެ ފުރިހަމަ ގޮތުގައި އަގުވަޒަން ކުރަން ޖެހޭކަން ފާހަގަކުރައްވައި، އެބޭކަލުންނާއި އެބޭކަލުންގެ ޢާއިލާތަކަށް ޚާއްޞަ ކުރައްވައިގެން ބޯހިޔާވަހިކަމުގެ މި މަސައްކަތް އެމަނިކުފާނުގެ ދައުރު ނިމުމުގެ ކުރިން ކުރައްވައި، 50 ހައުސިން ޔުނިޓް މި ދައުރުގެ ތެރޭގައި އަޅާ ނިންމަވައި އެ ޢާއިލާތަކާ ޙަވާލު ކުރައްވާނޭ ކަމުގެ އުފާވެރި ޚަބަރު ދެއްވާފައެވެ.

އަދި ޝަހީދުންގެ ޢާއިލާތަކަށް ސަރުކާރުން ދެމުން އައި ފައިސާ ދިނުން ހުއްޓިފައިވާކަން ފާހަގަކުރައްވައި، އެ ފައިސާ ދެއްވުން އަލުން ފަށްޓަވަން ނިންމަވާފައިވާ ކަމުގައި ވެސް އެމަނިކުފާނު ވިދާޅުވިއެވެ.

ނަޞްރުގެ ދުވަހުގެ މުނާސަބަތުގެ ރަސްމީ ޖަލްސާގައި ރައީސުލްޖުމްހޫރިއްޔާ ޑޮކްޓަރ މުޢިއްޒު ވަނީ ދިވެހި ޢަސްކަރިއްޔާ ހަރުދަނާ ކުރެއްވުމަށް ގިނަ މުހިންމު މަސައްކަތްތަކެއް ކުރައްވަމުން ގެންދަވާ ކަމުގައި ފާހަގަކުރައްވާފައެވެ. އެގޮތުން ދިވެހި ރާއްޖޭގެ އުތުރާއި ދެކުނުގައި ތަރައްޤީ ކުރާ ޢަސްކަރީ މަރުކަޒުތަކުގެ މަސައްކަތްތަކާއި، އަދި ކުރިއަށް ކުރައްވަން ނިންމަވާފައިވާ ކަންކަމަށް އަލިއަޅުއްވާލައްވަމުން ވިދާޅުވީ، ޢަސްކަރީ ރޮނގުން މީހުން ބިނާ ކުރުމުގެ ދާއިރާގެ ތެރެއިން ޤާނޫނުން ބާރު ލިބިގެން ޤައުމީ ޚިދުމަތުގެ ޕްރޮގްރާމް ފެށްޓެވުމަށް ނިންމަވައި ޢުމުރުން 16 އަހަރުގައި ދިވެހި ސިފައިންގެ ޚިދުމަތަށާއި ދިވެހި ފުލުހުންގެ ޚިދުމަތަށް ޝައުޤުވެރިވާ ކުދީންނަށް އެފުރުޞަތު ހޯއްދަވައިދެއްވާ އެކަމަށް ނިކުންނަ ފަރާތްތަކަށް އެ ރޮނގުން މަތީ ތަޢުލީމް ޙާޞިލް ކުރުމުގެ ފުރުޞަތު ފަހިވާ ގޮތަށް ޤާނޫނުތަކަށާއި ޤަވާޢިދުތަކަށް ބަދަލުތައް ގެންނެވުމަށް މަސައްކަތް ކުރައްވާނޭ ކަމުގައި ވިދާޅުވެއެވެ.

މި ޖަލްސާގައި ވަނީ މޭޖަރ ޖެނެރަލް (ރިޓަޔަރޑް) މޫސާ ޢަލީ ޖަލީލަށް ނިޝާން ޢަސްކަރީގެ ވެރިކަމުގެ ޢިއްޒަތް އަރުއްވާފައެވެ. ދިވެހި ދައުލަތުގެ މަތިވެރި ޢިއްޒަތެއް ކަމަށްވާ، ނިޝާން ޢަސްކަރީގެ ވެރިކަމުގެ ޢިއްޒަތް މޭޖަރ ޖެނެރަލް (ރިޓަޔަރޑް) މޫސާ ޢަލީ ޖަލީލަށް އެރުއްވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއެވެ.