މިރޭ ދަންވަރު 12:00 އިން ފެށިގެން އަމަލުކުރަންފަށާ ރާއްޖެ-ޗައިނާ މިނިވަން ވިޔަފާރީގެ އެއްބަސްވުމުގެ ދަށުން ދިވެހިނަން ޗައިނާގައި ފިހާރަ ހުޅުވައިގެން ވިޔާފާރި ކުރެވި، ޓްރެވަލް އެޖެންސީ ހަދައިގެން ފަތުރުވެރިން ގެނެސް އަދި އެނޫން ވެސް ދާއިރާތަކުގައި ވެސް ހަރަކާތްތެރިވެވޭނެކަމަށް، އިކޮނިމިކް ޑިވެލޮޕްމަންޓް މިނިސްޓްރީގެ ސްޓޭޓް މިނިސްޓަރ ޢަބްދުﷲ ސިޔާޒް ވިދާޅުވެއްޖެއެވެ.

އެމްއެމްޓީވީގެ "ބޮޑު ޚަބަރު" ޕްރޮގްރާމުގައި ރާއްޖެ-ޗައިނާ މިނިވަން ވިޔަފާރީގެ އެއްބަސްވުމާ ގުޅޭ މައުލޫމާތު ދެއްވަމުން ސިޔާޒް ވިދާޅުވީ މި ވިޔަފާރީގެ އެއްބަސްވުމުގެ ސަބަބުން ދެ ޤައުމުގެ މެދުގައި ކުރާ ވިޔަފާރި މުދަލުގެ ބޮޑު ޕަސެންޓަކުން ޑިޔުޓީ މާފުވުމުގެ އިތުރުން، ޚިދުމަތުގެ ދާއިރާ ވެސް ހަރަކާތްތެރި ވެވޭނެކަމަށެވެ. އަދި ދެ ޤައުމުގެ ވިޔަފާރީގެ ގުޅުން އިތުރަށް ބަދަހިވުމާއި އިންވެސްޓުމަންޓުތައް ހިމާޔަތް ކުރުމާއި ދިވެހި ވިޔަފާރިތަކަށް ޓެކްނިކަލް އެހީ ފޯރުކޮށްދިނުން ފަދަ ކަންކަންވެސް މި އެއްބަސްވުމުގައި ހިމެނޭކަމަށް އެނާ ވިދާޅުވިއެވެ.

"(މި އެއްބަސްވުމުގެ ސަބަބުން) ދިވެހި ވިޔަފާރިތަކަށް ވެސް އެބަހުރި ފުރުސަތު ޗައިނާގައި އެސްޓެބްލިޝް ވެގެން އައުޓްލެޓް ހުޅުވައިގެން ވިޔަފާރިކުރުމުގެ ފުރުސަތު، ދިވެހިން އަމިއްލައަށް ޗައިނާގައި އައުޓްލެޓް ހުޅުވާފައި، ފެކްޓަރީތަކުން މުދާ އުފައްދައިގެން ދުނިޔޭގެ އެހެން މާކެޓްތަކަށް އެ މުދާ އެކްސްޕޯޓު ކުރުމުގެ ފުރުސަތު ވެސް އެބަ ލިބޭ މީގެ ތެރެއިން،" ސިޔާޒް ވިދާޅުވިއެވެ.

މީގެ 7 އަހަރު ދުވަސް ކުރިން ސޮއިކުރެވުނު މި އެއްބަސްވުމަކީ، ވަރަށް ފުޅާ ދާއިރާއެއްގައި މަޝްވަރާ ކުރެވިގެން ރާއްޖޭގެ ވިޔަފާރިތައް ހިމާޔަތްކޮށް، ރާއްޖޭގެ ވިޔަފާރި އާއި ޚިދުމަތްދޭ ފަރާތްތަކަށް ފުރުސަތު ހޯދައިދިނުމަށް ވެފައިވާ އެއްބަސްވުމެއް ކަމަށް ޝިޔާޒް ވިދާޅުވިއެވެ. އޭނާ ވިދާޅުވި ގޮތުގައި ތަފާތު 11 ދާއިރާއެއް ހިމެނޭ މި އެއްބަސްވުމުގެ ދަށުން ޑޮކްޓަރުންނާއި އެކައުންޓެއްޓުންނާއި އާކިޓެކްޓުންނާއި އިންޖިނޭރުންނާއި ޓޫރިޒަމް ދާއިރާގައި ޚިދުމަތްދޭ ފަރާތްތަކަށް ޗައިނާގައި ވިޔަފާރިކުރުމުގެ ފުރުސަތު ލިބިގެންދާނެއެވެ.  

"އެންމެ ބޮޑު އެއް ފުރުސަތަކީ ޗައިނާގެ ތެރޭގައި ދިވެހި ޓުއަ އޮޕަރޭޓަރުން ހަރަކާތެރިވުން، ޗައިނާއިން އައުޓް ބައުންޑް ސާވިސް ދެވޭ، އަދި ޗައިނާގެ ވަކި  ސިޓީތަކެއްގައި އިންބައުންޑް ސާވިސް ވެސް ދެވޭ. މާނައަކީ ޗައިނާގައި ލޯކަލް ޓޫރިޒަމްގެ ޚިދުމަތް ވެސް ދެވެން އެބައޮތޭ، އެހެން ވީމާ ޓޫރިޒަމް ވިޔަފާރީގައި ހަރަކާތްތެރިވާ ދިވެހިންނަށް ވަރަށް ފަހި ފުރުސަތުތަކެއް އެބަހުރި،" ސިޔާޒް ވިދާޅުވިއެވެ. 

ރާއްޖެ- ޗައިނާ މިނިވަން ވިޔަފާރީގެ އެއްބަސްވުމުގެ ދަށުން މިރޭ 12:00 އިން ފެށިގެން، ޗައިނާއިން ރާއްޖެ އެތެރެކުރާ 70 ޕަސެންޓު މުދަލާއި ރާއްޖެއިން ޗައިނާ އަށް ބޭރުކުރާ 90 ޕަސެންޓް މުދަލުން ޑިޔުޓީ މާފުވާނެއެވެ. ސިޔާޒް ވިދާޅުވީ އެކަމަށް މޯލްޑިވްސް ކަސްޓަމްސް ސާރވިސް އިން މިހާރުވަނީ ތައްޔާރުވެފައި ކަމަށެވެ. އެނާ ވިދާޅުވި ގޮތުގައި ޑިޔުޓީގެ އިނާޔަތް ހޯދުމަށް، މުދާ އުފެއްދި ޤައުމު އަންގައިދޭ އޮރިޖިނަލް ސެޓްފިކެޓް ހުށަހަޅަން ޖެހޭނެއެވެ. ޗައިނާ އިން މި ސެޓްފިކެޓް އޮންލައިންކޮށް ހޯދޭނެކަމަށް އޭނާ ވިދާޅުވިއެވެ.

ސިޔާޒް އިތުރަށް ވިދާޅުވި ގޮތުގައި މުދަލެއް އުފެއްދުމަށް ކުރާ ޖުމްލަ ޚަރަދުގެ 40 ޕަސެންޓަކީ ރާއްޖެގައި ކުރި ޚަރަދަކަށް ވާނަމަ، އެއީ ރާއްޖެގެ އުފެއްދުމެއްކަމަށް ބަލާނެއެވެ. އެހެންކަމުން، މިސާލެއްގެ ގޮތުން ބޭރު ޤައުމަކުން ފޮތި ގެނެސްގެން ރާއްޖޭގައި ފަހާ ގަމީހެއް ދިވެހި އުފެއްދުމެއްގެ ގޮތުގައި ޑިޔުޓީ ނުދައްކާ ޗައިނާއަށް އެތެރެކުރެވޭނެ ކަމަށް އޭނާ ވިދާޅުވިއެވެ.

ދުނިޔޭގައި އުފައްދާ މުދަލުގެ 30 ޕަސެންޓް ޗައިނާ ހިއްސާކުރާއިރު، އެކްސްޕޯޓް މާކެޓްގެ 15 ޕަސެންޓް ޗައިނާ ހިއްސާ ކުރެއެވެ. ޗައިނާ އިން އެކި ޤައުމުތަކާއެކު މިނިވަން ވިޔަފާރީގެ 16 އެއްބަސްވުމެއް ހަދާފައިވެއެވެ. ރާއްޖޭގެ ވިޔަފާރިވެރިންނަށް ޗައިނާގައި މުދާ އުފައްދައިގެން، އެ އެއްބަސްވުންތަކުގެ ދަށުންވެސް ލިބިދޭ އިނާޔަތްތައްވެސް ހޯދޭނެ ކަމަށް ސިޔާޒު ވިދާޅުވިއެވެ.

އިކޮނޮމިކް މިނިސްޓްރީން ވިދާޅުވީ ކުރީގެ ސަރުކާރުން މި އެއްބަސްވުން ތަންފީޒު ނުކޮށް އޮތުމުން، މިދިޔަ ހަތް އަހަރަކީ ރާއްޖެ އަށް ވިޔާފާރީގައި ލިބެން އޮތް ރަނުގެ ފުރުސަތުތަކެއް ބޭނުން ނުކުރެވި ދިޔަ ހަތް އަހަރު ކަމަށެވެ.