ދިވެހިރާއްޖޭގެ ޒަކާތު ހައުސްއިން ދެމުންދާ "ފުދުންތެރިކަން ނެތް ފަރާތްތަކަށް ދެވޭ ބޭސްފަރުވާގެ އެހީ" ހިދުމަތަށް 'ވަންގަވް' މެދުވެރިކޮށް އެދެވޭނެ އިންތިޒާމް ހަމަޖައްސައިފި އެވެ.

'ވަންގަވް' އަކީ ދިވެހި ސަރުކާރުގެ ހިދުމަތްތައް ރައްޔިތުންނަށް އަވަސްކަމާއި ފަސޭހަކަމާ އެކު އެއް ތަނަކުން ގެނެސްދިނުމަށް ފަރުމާކޮށްފައިވާ ޑިޖިޓަލް ޕްލެޓްފޯމެކެވެ.

ރާއްޖޭގެ ޒަކާތު ހައުސްގެ ހިދުމަތްތައް ވަންގަވް މެދުވެރިކޮށް ލިބޭނެ ގޮތް ތައާރަފު ކުރުމަށް މިއަދު ހެނދުނު އިސްލާމިކް މިނިސްޓްރީގައި ވަނީ ހާއްސަ ރަސްމިއްޔާތެއް ބާއްވާފަ އެވެ. މި ރަސްމިއްޔާތުގައި މި ހިދުމަތް ރަސްމީކޮށް ތައާރަފު ކޮށްދެއްވީ އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދެވެ.

ރަސްމިއްޔާތުގައި ވާހަކަ ދައްކަވަމުން ޝަހީމް ވިދާޅުވީ މި ހިދުމަތަކީ ރައްޔިތުންނަށް ލުއިފަސޭހަކަން ލިބިގެންދާނެ ހިދުމަތަކަށްވާނެ ކަމަށެވެ. ހިދުމަތް ތައާރަފު ކުރުމަށް ޒަކާތު ހައުސްގެ މުވައްޒަފުންނާއި ޓްރޭޑްނެޓްގެ މުވައްޒަފުން ކުރި މަސައްކަތް ފާހަގަކުރައްވާ އެކަމަށް ޓަކައި މިނިސްޓަރު ވަނީ އެ މުވައްޒަފުންނަށް ޝުކުރު އަދާކުރައްވާފަ އެވެ. މިފަދަ ހުރިހާ ކަމަކަށް މިނިސްޓްރީގެ ފުރިހަމަ އެއްބާރުލުން ލިބޭނެކަން ވެސް ފާހަގަކުރެއްވި އެވެ.

އިސްލާމިކް މިނިސްޓްރީން ބުނީ ޒަކާތު ހައުސްގެ ބޭސްފަރުވާގެ ހިދުމަތް ވަންގަވްއަށް ގެނެސްފައި ވަނީ ރައްޔިތުންނަށް ވީހާވެސް ލުއިފަސޭހަކަމާއި އަވަސްކަމާ އެކު ހިދުމަތެއް އެދެވޭނެ އިންތިޒާމް ހަމަޖެއްސުމަށް ކަމަށެވެ. މި ހިދުމަތް ތައާރަފުކުރުމާ އެކު މިއަދުން ފެށިގެން ކައުންޓަރަށް ނުވަތަ އީމެއިލް މެދުވެރިކޮށް ޒަކާތުގެ ބޭސްފަރުވާގެ އެހީއަށް އެދި ހުށައަޅާ ފޯމުތައް ބަލައިނުގަންނާނެ ކަމަށް އެ މިނިސްޓްރީން ބުނެ އެވެ.