ENGLISH
04 އޭޕްރީލު 2025
ފަތުރުވެރިކަން ސިންދަފާތު ކުރުމަށް ތަފާތު އާ ދާއިރާތަކަށް އެމްއެމްޕީއާރުސީން ބަލަނީ
30 ޑިސެމްބަރު 2024
|
އެމްއެމްޕީއާރުސީގެ މެނޭޖިން ޑިރެކްޓަރ އިބްރާހިމް ޝިޢުރީ އެމްއެމްޓީވީގެ "ބޮޑު ޚަބަރު" ޕްރޮގްރާމުގައި މިރޭ މައުލޫމާތު ދެއްވަނީ.
އެންމެ މަޤްބޫލު
ރާއްޖޭގެ ފަތުރުވެރިކަން ސިންދަފާތު ކުރުމަށް ތަފާތު އާ ދާއިރާތަކަށް ކަންކަން ރާވަމުން ދާކަމަށް މޯލްޑިވްސް މާކެޓިންގ އެންޑް ޕަބްލިކް ރިލޭޝަން ކޯޕަރޭޝަން (އެމްއެމްޕީއާރުސީ) އިން ވިދާޅުވެއްޖެއެވެ.
އެމްއެމްޓީވީގެ "ބޮޑު ޚަބަރު" ޕްރޮގްރާމުގައި މިރޭ ވަހަކަ ދައްކަވަމުން، އެމްއެމްޕީއާރުސީގެ މެނޭޖިން ޑިރެކްޓަރ އިބްރާހިމް ޝިޢުރީ ވިދާޅުވީ ރާއްޖެ މަޝްހޫރުވެފައި އޮންނަނީ ރީތި އަގުބޮޑު ހަނީމުން މަންޒިލެއްގެ ގޮތުގައި ކަމަށެވެ. ނަމަވެސް، ފަތުރުވެރިކަމުން ލިބޭ އާމްދަނީ އިތުރުކުރުމަށް ހިންގޭނެ ޓޫރިޒަމްގެ އެހެން ކަންކަންވެސް އެބަހުރި ކަމަށް އޭނާ ވިދާޅުވިއެވެ.
"ވެއަތުވެދިޔަ 50 އަހަރު ވެސް ރާއްޖެއަކީ ގުދުރަތީ ރީތިކަމަށްޓަކައި މަޝްހޫރުވެފައި އޮންނަ ޤައުމެއް. މިހާރު ރާއްޖެ އަކީ ކޮބައިކަން އެންމެނަށްވެސް އެނގޭ. ބޮޑަށް މަޝްހޫރުވެފައި މި އޮންނަކީ ސަން، ސޭންޑް، ސީ، ދެން ހަނީމޫން އެންޑް ޑައިވިން ޑެސްޓިނޭޝަނެއް ގޮތަށް،" ޝިޢުރީ ވިދާޅުވިއެވެ. "މިހާރު އާ ވިސްނުންތަކަށް އެބަ ދަން، އޭގެ ތެރޭގައި ފަތުރުވެރިކަން ސިންދަފާތު ކުރުމުގެ ވާހަކަ އެބަދައްކަން."
ޝިޢުރީ ވިދާޅުވީ އެމްއެމްޕީއާރުސީގެ ވިޒިޓް މޯލްޑިވްސް ކްލަބްގެ ފަރާތުން މިދިޔަ ހަފުތާގައި އިފްތިތާހުކުރި ސްޕޯޓް ފިޝިން މުބާރާތް، "ބުރުނު ބޮމަ" އަކީ ވެސް، ފަތުރުވެރިކަމުގެ މާކެޓް ފުޅާކޮށް ގިނަ ބަޔަކަށް ފަތުރުވެރިކަމުގެ ފައިދާ އިތުރުވެގެންދާނެ އާ ދާއިރާއެއް ކަމަށެވެ. އެ މުބާރާތް އަހަރަކު އެއްފަހަރު ބޭއްވުމަށް ވަނީ ނިންމައިފައެވެ.
"ސްޕޯޓްސް ޓޫރިޒަމް އެކަންޏެއްވެސް ނޫން، ކޮންމެވެސް ވަރަކަށް އަޅުގަނޑުމެން އެބަ ބަލަން ފިލްމު ޓޫރިޒަމްގެ ކަންތައްވެސް ހަމައަކަށް އެޅުވޭތޯ، ކިހިނެއްތޯ އޭގެން ނަފާ އިތުރަށް ލިބޭނީ، އެހެން ގައުމުތަކުގައި ޓެކްސް ލުއިތަކާއި އެއްޗެހި އެބަލިބޭ ޓޫރިޒަމް ޕްރޮމޯޓް ކުރުމަށްޓަކައި،" ޝިއުރީ ވިދާޅުވީއެވެ.
އޭނާ ވިދާޅުވީ ރާއްޖޭގައި މީގެ ކުރިން ސްޓާވޯޒް ފަދަ މަދު ފިލްމުތަކެއް ޝޫޓްކޮށްފައި ހުރުމުން އެއީ ކުރެވިދާނެ ކަމެއް ކަމަށެވެ. އެހެންކަމުން އެދާއިރާގެ މީހުންނާއި ވާހަކަ ދައްކަމުން އަންނަ ކަމަށް އޭނާ ވިދާޅުވިއެވެ.
"މިސާލަކަށް ނިއުޒިލޭންޑް ކަހަލަ ގައުމުތަކަކީ ލޯޑް އޮފް ރިންގްސް ކަހަލަ ބޮޑެތި ފިލްމުތައް ކުޅެފައިހުރި ޤައުމުތައްވީމާ، ކަމާ ކަންފަށާފައި ފޭނުން އެބަ ދޭ އެ ޤައުމުތަކަށް ފިލްމު ސައިޓުތަކަށް، ދާއިރު ލޯކްލަ މީހުން އެބަ އެފިލްމާ ގުޅުވާފައި ސޮފްޓު ޓޯއިޒް އާއި އޭގެ ފޮތާއި ޓީޝާޓާ ބައިޕްރޮޑަކްސްގެ ގޮތުގައި އެބަ ވިއްކާ، އެހެންވީމަ، އެ ޤައުމަށް މި ލިބެނީ އިތުރު ނަފާތަކެއް،" ޝިޢުރީ ވިދާޅުވިއެވެ.
ޝިޢުރީ އިތުރަށް ވިދާޅުވީ އެޑިޔުކޭޝަން އަދި ވެލްނަސް ޓޫރިޒަމް ފުޅާކުރުމުގެ ފުރުސަތު ވެސް ރާއްޖެއަށް އެބައޮތް ކަމަށެވެ. ދިވެހި ބޭސްވެރިކަމުގައި ފާހަގަކުރެވޭ ބ. ކެންދޫއާ ބެހޭ ކުޑަ ޑޮކިޔުމެންޓްރީއެއް އެމްއެމްޕީއާރުސީން އެރަށު ކައުންސިލާއި ގުޅިގެން ހަދާފައިވާކަން އޭނާ ފާހަގަކުރެއްވިއެވެ.
އެމްއެމްޕީއާރުސީން ވިދާޅުވީ ދުނިޔޭގެ ލީޑިން ޑެސްޓިނޭޝަން އެވޯޑް ރާއްޖެއަށް ޖެހިޖެހިގެން ފަސްވަނަ ފަހަރަށް ލިބިފައިވާއިރު، ރާއްޖެއިން މާކެޓް ކުރުމުގައި އެންމެ ބޮޑަށް އަމާޒުކުރަނީ މަތީ ފަންތީގެ ފަތުވެރިންނަށެވެ. ނަމަވެސް، މެދުފަންތީގެ ޓޫރިސްޓުންނާއި އާ މާކެޓްތަކަށް ވެސް ސަމާލުކަން ދޭކަމަށް އެމްއެމްޕީއާރުސީން ވިދާޅުވިއެވެ. އަދި ކުރިއާ ޚިލާފަށް މާކެޓް ކުރުމުގައި ސޯޝަލް މީޑިޔާ އާއި ޑޭޓައަށް ވަރަށް ބޮޑަށް ބެލިގެން، ޚަރަދުކުޑަކޮށް ނަތީޖާއަށް އިސްކަންދޭކަމަށް އެމްއެމްޕީއާރުސީން ވިދާޅުވިއެވެ.