ދިވެހިރާއްޖެއިން މެލޭޝިއާއަށް ކަނޑައަޅުއްވާފައި ހުންނަވާ ސަފީރު ޑރ. މަރްޔަމް ޝަބީނާ އަޙްމަދު، މި އަހަރުގެ އ.ދ. ދުވަސް ފާހަގަކުރުމުގެ ގޮތުން، މެލޭޝިއާގައި ހުންނަ އ.ދ. ގެ މަލްޓިކަންޓްރީ އޮފީހުން އިންތިޒާމް ކޮށްގެން ބޭއްވި ޚާއްޞަ ޙަފްލާގައި ބައިވެރިވެ ވަޑައިގެންފިއެވެ.

މި ހަފްލާގައި ސަފީރުގެ އިތުރުން، މެލޭޝިއާގެ އިސްވެރިންނާއި، މެލޭޝިއާ ތިއްބަވާ އެކި ޤައުމުތަކުގެ ޑިޕްލޮމެޓުން ބައިވެރިވެ ވަޑައިގެންނެވިއެވެ. މި ޙަފްލާ ޝަރަފްވެރި ކޮށްދެއްވީ މެލޭޝިއާގެ ޚާރިޖީ ވުޒާރާގެ ޑެޕިއުޓީ ސެކްރެޓަރީ ޖެނެރަލް ޔަންގް ބަހާގިއާ ދަތޯ އަޙްމަދު ރޯޒިއާން އަބްދުﷲ ޣަނީ އެވެ.

އ.ދ. އިން މޭލޭޝިއާއަށާއި ސިންގަޕޫރަށާއި އަދި ބުރްނާއީ އަށް ކަނޑައަޅުއްވާފައި ހުންނަވާ ރެސިޑެންޓް ކޯޑިނޭޓަރ މިސް ކަރީމާ އެލް ކޮރީ، މިޙަފްލާގައި ވާހަކަފުޅު ދައްކަވާފައިވެއެވެ. އ.ދ. ދުވަސް، މި އަހަރު ފާހަގަ ކޮށްފައިވަނީ 'އަވަރ ކޮމަން ފިއުޗަރ' މި ޝިއާރުގެ ދަށުންނެވެ.

އ.ދ. ދުވަސް، ކޮންމެ އަހަރެއްގެ އޮކްޓޫބަރު މަހުގެ 24 ވަނަ ދުވަހު ފާހަގަކުރަނީ 1945 ވަނަ އަހަރު އ.ދ.ގެ ޗާޓަރަށް އަމަލުކުރަން ފެށި ދުވަހާ ގުޅުވައިގެންނެވެ. މި ދުވަސް ޚާއްޞަކުރާނީ އެ ޖަމްޢިއްޔާގެ ލަނޑުދަނޑިތަކާއި ކާމިޔާބީތަކަށް ހޭލުންތެރިކަން އިތުރުކޮށް، އެ ޖަމްޢިއްޔާގެ މަސައްކަތްތަކަށް އެއްބާރުލުން ހޯދުމަށެވެ. އެ ގޮތުން، މި ޙަފްލާގައި ވާހަކަ ދެއްކެވި ބޭފުޅުން ވަނީ، އ.ދ.ގެ ދެމެހެއްޓެނެވި ތަރައްޤީގެ ލަނޑުދަނޑިތައް ޙާސިލު ކުރުމަށް، އިތުރަށް މަސައްކަތް ކުރުމުގެ މުހިންމުކަމާ ގުޅޭގޮތުން ވާހަކަފުޅު ދައްކަވާފައެވެ.

ދިވެހިރާއްޖޭގެ މިނިވަންކަމާއި ސިޔާދަތު ދިފާޢުކޮށް ކުރިއެރުވުމުގެ މަތިވެރި މަސައްކަތް ކުރާ އެންމެ މުހިންމު މައިދާނަކީ އ.ދ. ޖަމުޢިއްޔާ ކަމަށް، އ.ދ. ގެ މެމްބަރަކަށް ރާއްޖެވިތާ 59 އަހަރު ފުރުމުގެ މުނާސަބަތުގައި ދެއްކެވި ވާހަކަފުޅުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ވިދާޅުވެފައެވެ.