ފީފާ ވޯލްޑް ކަޕް 2026 އަކީ ބޮޑު ކާމިޔާބީއެއްގެ ގޮތުގައި ސިފަކުރައްވައި، މި މުބާރާތް ބޭއްވުމުގައި އެމެރިކާގެ ރައީސް ޑޮނަލްޑް ޓްރަމްޕް އަދާކުރެއްވި ދައުރަށް ފީފާގެ ރައީސް ޖިއާނީ އިންފަންޓީނޯ އަނެއްކާވެސް ތާރީފުކުރައްވައިފިއެވެ. އިންފަންޓީނޯ ވިދާޅުވި ގޮތުގައި، ދުނިޔޭގެ ހުރިހާ ކަންކޮޅުތަކެއްގެ މީހުން އެއްބައިވަންތަކުރުމަށް މި މުބާރާތުން ކަނޑައެޅި މަގުސަދު ވަނީ ހާސިލުވެފައެވެ.

އެމެރިކާގެ ނިއު ޔޯކުގައި ރައީސް ޓްރަމްޕާއެކު އިއްޔެ ބޭއްވި ބައްދަލުވުމުގައި، ސްޓޭޑިއަމްތައް ފުރިބާރުވުމާއި ޓީވީން މުބާރާތް ބަލާ މީހުންގެ އަދަދު ރިކޯޑު މިންވަރަކަށް އިތުރުވުމަކީ، ތާރީޚުގައި ބޭއްވި އެންމެ ބޮޑު ވޯލްޑް ކަޕް އުއްމީދުތަކާ އެއްގޮތަށް ކުރިއަށްދާކަމުގެ ހެއްކެއް ކަމަށް އިންފަންޓީނޯ ފާހަގަކުރެއްވިއެވެ. އޭނާ ވިދާޅުވީ، "އެމެރިކާގެ ހުވަފެން ހަގީގަތަކަށް ވެއްޖެ" ކަމަށާއި، މި މުބާރާތުގެ ސަބަބުން މުޅި ދުނިޔެ އެއްބައިވަންތަވެފައިވާ ކަމަށެވެ.

މެންހަޓަންގައި ހުންނަ ޓްރަމްޕް ޓަވަރުގައި ބޭއްވި މި ހަފުލާގައި ރައީސް ޓްރަމްޕް ވަނީ އިންފަންޓީނޯ އާއި ބައިނަލްއަގުވާމީ ފުޓްބޯޅަ ތަރިންނަށް މަރުހަބާ ދަންނަވާފައެވެ. އާދީއްތަ ދުވަހުގެރޭ އާޖެންޓީނާ އާއި ސްޕެއިން ބައްދަލުކުރާ ފައިނަލް މެޗުން މޮޅުވާ ޓީމަކަށް ޓްރަމްޕް ހަވާލުކުރައްވާ ރަން ތަށީގެ ކައިރީގައި ހުންނަވައި އިންފަންޓީނޯ ވިދާޅުވީ، ރައީސް ޓްރަމްޕުގެ އެހީތެރިކަމާ ނުލައި މި މުބާރާތް މިހާ ބޮޑު ކާމިޔާބީއަކަށް ނުވީސް ކަމަށެވެ.

ރައީސް ޓްރަމްޕް މި މުބާރާތް ސިފަކުރެއްވީ ތާރީޚުގައި ބޭއްވުނު އެންމެ ވަރުގަދަ ކުޅިވަރު ހަރަކާތުގެ ގޮތުގައެވެ. އަދި އާދީއްތަ ދުވަހުގެރޭ ފައިނަލްގައި ވާދަކުރާ ދެ ޓީމަށްވެސް ކާމިޔާބީއަށް އެދިވަޑައިގެންނެވިއެވެ.

މީގެ އިތުރުން އދ. ގައި ބޭއްވި ބައްދަލުވުމެއްގައި ވާހަކަދައްކަވަމުން އިންފަންޓީނޯ ވިދާޅުވީ، ފުޓްބޯޅައަކީ ދުނިޔޭގެ ބައިބައިވުންތައް ނައްތާލައި، މީހުން ގުޅުވައިދޭ "ޖާދޫއެއް" ފަދަ ކުޅިވަރެއް ކަމަށެވެ. އޭނާ ފާހަގަކުރެއްވި ގޮތުގައި ދުނިޔޭގައި ބައިބައިވުންތަކާއި މައްސަލަތައް ހުރި ނަމަވެސް، މި ވޯލްޑް ކަޕުން ފެނިގެންދިޔައީ އަހަރެމެންގެ މެދުގައި ހުރި ތަފާތުތަކަށްވުރެ، އަހަރެމެން ގުޅުވައިދޭ ކަންކަން މާ ގިނަކަމެވެ.

ފީފާއިން ހާމަކުރި ގޮތުގައި އެމެރިކާ، ކެނެޑާ އަދި މެކްސިކޯގައި  ބޭއްވި މި މުބާރާތުގައި 48 ޓީމު ވާދަކުރިއިރު، މިހާތަނަށް ކުޅެވުނު 102 މެޗުގައިވެސް ސްޓޭޑިއަމްތައް އޮތީ ގާތްގަނޑަކަށް ފުރިފައެވެ. މުބާރާތް ބަލަން ދިޔަ މީހުންގެ ޖުމްލަ އަދަދު 6.7 މިލިޔަނަށް އަރާނެ ކަމަށް ބެލެވޭއިރު، މިއީ ވޯލްޑް ކަޕުގެ އައު ރިކޯޑެކެވެ.

މި މުބާރާތުގައި ސަލާމަތީ ގޮތުން ބޮޑު އެއްވެސް ނުރައްކަލެއް ކުރިމަތިވެފައި ނުވި ނަމަވެސް، ބައެއް ސިޔާސީ ޚިޔާލުތަފާތުވުންތައް ވަނީ ފެންމަތިވެފައެވެ. އޭގެ ތެރޭގައި އީރާން ޓީމަށް ކުރިމަތިވި ދަތުރުފަތުރުގެ ދަތިތަކާއި، އާޖެންޓީނާގެ ކުޅުންތެރިން ފޯކްލެންޑް ޖަޒީރާއާ ގުޅޭގޮތުން ދެއްކި ޝުއޫރުތަކުގެ މައްސަލަ ހިމެނެއެވެ. މީގެ އިތުރުން އެމެރިކާގެ ކުޅުންތެރިޔާ ފޮލަރިން ބަލޮގަންގެ ސަސްޕެންޝަން އުވާލުމަށް ރައީސް ޓްރަމްޕް ދެއްވި ލަފަޔަކަށް އިންފަންޓީނޯ އަމަލުކުރެއްވުމުން ބައެއް ފާޑުކިޔުންތައްވެސް ވަނީ އަމާޒުވެފައެވެ.

އިންފަންޓީނޯގެ ވާހަކަ ނިންމާލައްވަމުން ވިދާޅުވީ، ފުޓްބޯޅައަކީ ހަމައެކަނި މަގުބޫލު ކުޅިވަރެއް ނޫން ކަމަށާއި، އެއީ ބަހާއި ސަގާފަތާއި ސިޔާސީ ފިކުރުތަކުގެ ފާރުތައް ގިރާކޮށް، މުޅި ދުނިޔެއަށް ވިސްނޭ އެއްބަހެއް ކަމަށެވެ.