ކްލަަބް މޯލްޑިވްސްގެ އަންހެން ޑިވިޝަނުގެ ދެވަަނަ ފަންތީގެ މުބާރާތް، އެއިޓީން ތާޓީ ކްލަސިކް 2026 ގެ ސެމީ ފައިނަލް ފަހު ދެ ޖާގަ އެންމެ ފަހު ޗެމްޕިއަން ޕްރިޒަން ކުލަބާއި، އެސްޓީއޯ ރެކްރިއޭޝަން ކުލަބުން ހޯދައިފިއެވެ.

ހުޅުމާލެ ރެހެންދި ފުޓްސަލް ދަނޑުގައި ކުރިއަށްދާ ކްލަސިކް މުބާރާތުގައި 9 ޓީމެއް ވާދަކުރެއެވެ. މި ޓީމުތައް ދެ ގްރޫޕަކަށް ބަހާލާފައިވާއިރު، ގްރޫޕް އޭގައި ފަސް ޓީމު ހިމެނެއެވެ. އަދި ގްރޫޕް ބީގައި ހިމެނެނީ ހަތަރު ޓީމެވެ.

މި މުބާރާތުގެ ގްރޫޕް އޭގައި މިރޭ ކުޅުނު މެޗުން ޕްރިޒަން ވަނީ ހުޅުމާލެ ހޮސްޕިޓަލް އަތުން 3-1 ގެ ނަތީޖާއަކުން މޮޅުވެފައެވެ. މި ގްރޫޕުގެ އަނެއް މެޗުގައި ޒުވާނުން ބާރުވެރިކުރުމާއި ކުޅިވަރާއި ހަށިހެޔޮކަމާ ބެހޭ ވުޒާރާއިން 8-1 ގެ ނަތީޖާއަކުން ހެލްތު ރެކްރިއޭޝަން ކުލަބު ބަލިކޮށްފައެވެ.

މި ނަތީޖާތަކާއެކު ގްރޫޕް އޭގެ ކުރީގައި އޮތް ޕްރިޒަން އާއި އެސްޓީއޯ ސެމީއަށް ދަތުރުކުރީ ކުޅުނު ތިން މެޗުން ލިބުނު ނުވަ ޕޮއިންޓާއެކުއެވެ. ލަނޑުގެ ތަފާތުން ތާވަލުގެ އެއްވަނަ މި ވަގުތު ޕްރިޒަން ކުލަބަށް ލިބޭއިރު، އަންނަ ހޮނިހިރު ދުވަހުގެރޭ ދެ ޓީމު ބައްދަލުކުރާ މެޗުން، މި ގްރޫޕުގެ އެއްވަނަ އަދި ދެވަނަ ކަނޑައެޅިގެންދާނެއެވެ. ގްރޫޕް އޭގެ ތިންވަނައިގައި އޮތް ކުޅިވަރާ ބެހޭ ވުޒާރާ އާއި، ހަތަރުވަނައިގައި އޮތް ހުޅުމާލެ ހޮސްޕިޓަލަށް ތިން މެޗުން ތިން ޕޮއިންޓް ލިބިފައިވާއިރު، ފުލުގައި އޮތް ހެލްތަށް ޕޮއިންޓެއް ލިބިފައެއް ނުވެއެވެ.

މީގެ އިތުރުން މި މުބާރާތުގެ ގްރޫޕް ބީގައި މިރޭ 4-1 ގެ ނަތީޖާއަކުން ސްޓެލްކޯ ރެކްރިއޭޝަން ކުލަބު ބަލިކޮށް، ކުލަބު އެޗްޑީސީން ވަނީ މި ގްރޫޕުގެ އެއްވަނަ ހޯދާފައެވެ. މި މެޗާ ކުރިމަތިލިއިރުވެސް މި ދެ ޓީމަށް ވަނީ ސެމީގެ ޖާގަތައް ކަށަވަރުވެފައެވެ. މި ގްރޫޕުގެ އަނެއް މެޗުގައި މިރޭ ޓީމު އެމްއޭސީއެލް އާއި ޔުނައިޓެޑް ބީއެމްއެލް ބައްދަލުކުރިއިރު، މި މެޗު ނިމުނީ 2-2 ގެ ނަތީޖާއަކުން އެއްވަރުވެގެންނެވެ.

މި ނަތީޖާތަކާއެކު ގްރޫޕް ބީގެ އެއްްވަނަ އެޗްޑީސީއަށް ލިބުނީ ކުޅުނު ތިން މެޗުންވެސް މޮޅުވެ ނުވަ ޕޮއިންޓާއެކުއެވެ. ދެވަނައަށް ދިޔަ ސްޓެލްކޯއަށް ހަ ޕޮއިންޓް ލިބުނުއިރު، ތިންވަނައިގައި ނިންމި ބީއެމްއެލް އާއި، ފުލަށްދިޔަ އެންމެ ފަހުގެ ރަނަރަޕް އެމްއޭސީއެލްއަށް ލިބުނީ ޕޮއިންޓެކެވެ.

މި މުބާރާތުގެ ގްރޫޕް ސްޓޭޖު ފަހު ދެ މެޗު އަންނަ ހޮނިހިރު ދުވަހުގެރޭ ކުޅުމަށް ވަނީ ހަމަޖެހިފައެވެ.