އާސަންދައިން ވިޔަފާރިކޮށް ނާޖާއިޒް ބޮޑެތި ފައިދާ ނަގައި، އުސޫލުތަކުން ބޭރުން ކަންކުރުމުގެ ލާމަސީލު މިސާލެއް އެންސްޕާގެ ސީއީއޯ ހީނާ ވަލީދު ރައްޔިތުންނަށް މިއަދު ސާފުކޮށްދެއްވައިފި އެވެ.

ސޯޝަލް މީޑިއާގައި މި ދެތިން ދުވަހު ދައުރުވަމުންދާ މެސެޖެއްގެ ހަގީގަތް ރައްޔިތުންނަށް އޮޅުންފިލުވައިދެއްވުމަށް ފޭސްބުކްގައި ހީނާ ކުރެއްވި ޕޯސްޓެއްގައި ވިދާޅުވީ އާސަންދައިގެ ބޭހުގެ އަގު ރިވައިޒް ކުރުމުގެ ތެރެއިން އެންމެ ޚަރަދު ބޮޑު އެއް ބޭސްކަމުގައިވާ ލުސެންޓިސް އިންޖެކްޝަންގެ އަގު ޗެކްކުރުމުގެ ގޮތުން ލޮލުގެ ފަރުވާދޭ އެ ފަރާތުން އެ ބޭސް ރާއްޖެ އެތެރެކުރާ އަގު އޮޅުން ފިލުވާފައިވާ ކަމަށެވެ. އަދި އެ ފަރާތުން ފޮނުވި އިންވޮއިސްތަކުން އެނގޭ ގޮތުގައި ބޭސް ރާއްޖޭން ބޭރުން ގަންނަން ލިބޭ އަގަށް ވުރެ އެތައް ތަނެއް ބޮޑުކޮށް އާސަންދަ އަށް ބިލްކޮށްފައިވާކަން ފާހަގަ ކުރުވުނު ކަމަށެވެ. 

"މިގޮތުން 500 ވަރަކަށް ޑޮލަރަށް ލިބޭ މި ބޭސް ގެނެސް 23،000 ރުފިޔާ އަށް އާސަންދަ އަށް ބިލްކޮށްފައިވޭ. މިއީ 18 ރުފިޔާގެ ރޭޓުން ޑޮލަރު ބެލިކަމުގައިވިޔަސް، އެންމެ އިންޖެކްޝަނަކުން 14،000 ރުފިޔާގެ ފައިދާއެއް،" ސަރުކާރުގެ އިސް ތަރުޖަމާނުގެ މަގާމު ވެސް އަދާކުރައްވާ ހީނާ ވިދާޅުވި އެވެ. "މި ބޭސް އެތެރެކުރަން ރަޖިސްޓަރކޮށްފައިވަނީ މުޅިން އެހެން ކުންފުންޏަކުން. ނަމަވެސް އެ ފަރާތުން އެއްވެސް ވަރަކަށް މި ބޭސްއެތެރެކޮށްފައި ނުވޭ. ލޮލުގެ ފަރުވާގެ ޚިދުމަތްދޭ މި ފަރާތުން ބޭސް ވިއްކާފައިވަނީ ބޭސް އެތެރެކުރުމަށް ރަޖިސްޓަރީނުކޮށް ޕްރިސްކްރިޕްޝަންއަށް. އެކަމަކު ސްކީމްގެ ތެރެއިން މި އިންޖެކްޝަނަށް އެންމެ ގިނައިން ބިލްކޮށްފައިވަނީ މި ފަރާތުން."

މޯލްޑިވްސް ފުޑް އެންޑް ޑްރަގް އޮތޯރިޓީގައި ރަޖިސްޓަރީކޮށްފައި ނުވާ އިންޖެކްޝަންއަކަށް ބިލުކޮށްފައިވުމާއި އަގުގެ ބޮޑު ތަފާތަކުން ބޮޑު ފައިދާއެއް ނަގަމުންދިޔަ އިރު އެކަން އާސަންދަ ކުންފުންޏަށް ނުވަތަ ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) އަށް އަންގައިފައި ނުވާ ކަމަށް ވެސް ހީނާ ވިދާޅުވި އެވެ.

"މިކަން ފާހަގަވީ އަޅުގަނޑުމެން މަސައްކަތް ފަށައި، އާސަންދައިގެ ބޭހުގެ އަގު ރިވައިޒްކުރުމުގެ ތެރެއިން. މިކަން ހުއްޓުވުމަށް ފިޔަވަޅު އަޅައި އެންސްޕާގެ ވެލްފެއާ އެހީގެ ދަށުން މިހާރު ވެސް ކޮންޓްރޯލްޑް އަގެއްގައި ބޭނުންވާ ފަރާތްތަކަށް މި ބޭސް ހޯދުމަށް އެހީތެރިކަން ދެވެމުންދޭ. މިކަން އިތުރަށް ފުރިހަމަކުރުމުގެ މަސައްކަތް ވެސް ދަނީ ހިނގަމުން،" އާސަންދަ ސްކީލް އިސްލާހު ކުރުމުގެ މަސައްކަތް ސަރުކާރުން މިހާރު ފައްޓަވާފައިވާކަމަށް އިޝާރާތް ކުރައްވައި ހީނާ ވިދާޅުވި އެވެ.

އަމިއްލަ އެކި ފަރާތްތަކުން ވިޔަފާރީގެ ފައިދާގެ ބޭނުމަށް އާސަންދަ ބޭނުންކުރުމުގެ ނަތީޖާއެއްގެ ގޮތުން، ރައްޔިތުންނަށް ބޮޑެތި ގެއްލުން ލިބޭކަމީ ހަގީގަތެއްކަން ހީނާ ފާހަގަ ކުރެއްވި އެވެ. އަދި މިހެން ދިމާވަނީ ޒަމާނުއްސުރެ މިނިޒާމްގެ ތެރޭގައި ހުރި މިފަދަ އެތައް މައްސަލައަކަށް އެޓެންޑް ނުކުރެވި، އެއް ނިޒާމް އަނެއް ނިޒާމާ ވާހަކަ ނުދެކެވި ބޮއްސުންލާން ދޫކޮށްލެވިފައި އޮތުމުގެ ސަބަބުން ކަމަށް ވެސް ހީނާ ވިދާޅުވި އެވެ.

"ރައީސްގެ ލަފާފުޅުގެ ދަށުން، ﷲ ގެ އިރާދަފުޅާ އެކު އަޅުގަނޑުމެން އެކަން ބަދަލުކޮށް އިސްލާޙު ކުރާނަން،" ސޯޝަލް މީޑިއާގައި މީހަކު ކުރި ޕޯސްޓަކަށް ރައްދު ދެއްވަމުން ހީނާ ވިދާޅުވި އެވެ.

އިނގިރޭސި ބަހުން ކޮށްފައިވާ ޕޯސްޓުގައި އެ މީހާ ބުނެފައި ވަނީ 2011 ވަނަ އަހަރުން ފެށިގެން އޭނާގެ މަންމަ އަންނަނީ ލޮލުގެ ފަރުވާގެ އެ އިންޖެކްޝަން އާސަންދަ މެދުވެރިކޮށް ނަގަމުން ކަމަށެވެ. އަދި އާ އުސޫލުގެ ދަށުން އެ އިންޖެކްޝަން އާސަންދައިން މިހާރު ނުލިބޭ ކަމަށް ވެސް އޭނާ ބުނެފައިވެ އެވެ. އޭނާ އެ އިޝާރާތް ކުރަނީ 24،000ރ. އިންޖެކްޝަނަކަށް ކަމަށް ވެސް ބުނެފައިވެ އެވެ.

އާސަންދަ ސްކީމް ރިފޯމް ކުރުމުގެ ގޮތުން އަމިއްލަ އިންޝުއަރެންސް ޕެކޭޖެއް ނަގާފައިވާ މީހުންނަށް އާސަންދައިގެ ހިދުމަތް ލިބޭނީ އެ އިންޝިއުރަންސަށް ކަނޑާފައި ބާކީ ބިލަށް އަރާވަރު ކަމަށް މިހާރު ވަނީ ހަމަޖައްސައިފަ އެވެ. މި ބަދަލު ގެނެސްފައި ވަނީ މިދިޔަ އޮކްޓޯބަރު 1 ވަނަ ދުވަހުން ފެށިގެންނެވެ. 

އަންނަ އަހަރުގެ ބަޖެޓުގައި ވެސް ވަނީ އާސަންދަ ނިޒާމް މުރާޖައާކޮށް މިހާރަށް ވުރެ ވަށާ ޖެހޭ ފުރިހަމަ އަދި ދެމެހެއްޓެނިވި ނިޒާމަކަށް ބަދަލުކުރަން ހިމަނައިފަ އެވެ.