ރާއްޖެ މިއަދު މިއޮތް ހާލަތާއި ބައްދަލުވީ އެމްޑީޕީ ސަރުކާރުގައި ފައިސާ ޗާޕު ކުރުމުން ކަމަށް މިނިސްޓަރ އޮފް އިކޮނަމިކް ޑިވަލަޕްމަންޓް ޓްރާންސްޕޯޓް އެންޑް ޓްރޭޑް މުހައްމަދު ސައީދު ވިދާޅުވެއްޖެއެވެ. 

މިނިސްޓަރ މިފަދައިން ވިދާޅުވީ މިއަދު ބޭއްވި ރައްޔިތުންގެ މަޖިލީހުގެ ވަޒީރާއި ސުވާލުކުރުމުގެ ބައިގައި ފޭދޫ އުތުރު ދާއިރާގެ މެންބަރު އިސްމާއިލް ނިޒާރު ކުރެއްވި ސުވާލަށް ޖަވާބު ދެއްވަމުންނެވެ. 

މެންބަރުގެ ސުވާލުގެ ޖަވާބުގައި މިނިސްޓަރ ވިދާޅުވީ، ޕީއެންސީ އިދިކޮޅު ޕާޓިއެއްގެ ގޮތުގައި އޮތް އިރުގައި ވެސް އެކި ޕްލެޓްފޯމްތަކުގައި ވަރަށް ބޮޑަށް އަޑު އިއްވަމުން ގެންދިޔައީ ފައިސާ ޗާޕް ކުރުމުން މިހާރު މި އޮތް ހާލަތު ރާއްޖެއާއި ބައްދަލުކުރާނެ ކަމަށެވެ. 

މިނިސްޓަރ ވިދާޅުވީ އެއިރު ރެއާ ދުވާލު މަސައްކަތް ކުރައްވަމުން ގެންދެވީ މާލީ އަދި އިގްތިސާދީ ދާއިރާގެ ބޭފުޅުންނާއެކު ކަމަށެވެ. އަދި އެ މަސައްކަތާއެކު މަޖިލީހުގެ ކޮމިޓީތަކާއި މަޖިލީހުގައި ކުރެވުނު މަސައްކަތާއި، ކުރެވުނު ދިރާސާތަކުގައި ވެސް، ހުދު އެމްޑީޕީގެ ބޭފުޅުންގެ ތެރެއިން ޑިމޮކްރެޓިކް ފެކްޝަނުގައި ތިއްބެވި ބޭފުޅުން ވެސް ގޮވާލަމުން ގެންދެވީ ފައިސާ ޗާޕް ނުކުރުމަށް ކަމަށެވެ. 

މިނިސްޓަރ ވިދާޅުވީ އެއިރުގެ ސަރުކާރު ނިމުމަކަށް އަންނަންޖެހުނު އެއް ސަބަބަކީ ކޮރަޕްޝަން އިތުރުވެ ވައްކަން އިތުރުވުމުން ކަމަށެވެ. 

މިނިސްޓަރ ވިދާޅުވީ މިކަމާއި އެންމެންނަށް އެބަ އެއްބަސްވެވޭ ކަމަށެވެ. އެހެންކަމުން އެފަދަ ކަންކަން ދެންވެސް ނުކުރުން މުހިންމު ކަމަށް މިނިސްޓަރ ވިދާޅުވިއެވެ. 

ރައީސް ޑރ. މުހައްމަދު މުއިއްޒު ވެރިކަމަށް ވަޑައިގެންނެވުމަށްފަހު ފައިސާ ޗާޕް ކުރުން ވަނީ ނިމުމަކަށް ގެނެސްފައެވެ. އެމްޑީޕީ ވެރިކަމުގައި 8 ބިލިއަން ރުފިޔާ ޗާޕް ކުރި އިރު، މި ސަރުކާރު އައި އިރު ދައުލަތުގެ ދަރަނި ހުރީ 120 ބިލިއަނަށްވުރެ މަތީގައެވެ.