ރައީސް ޑރ. މުހައްމަދު މުއިއްޒުގެ ސަރުކާރުން ރައްޔިތުންނަށް ދިމާވާ ދަތިތައް ހައްލުކުރުމަށްޓަކައި ފުޅާކުރަންޖެހުނު ކޮންމެ މަގެއް ފުޅާ ކުރަމުންދާނެ ކަމަށް މިނިސްޓަރ އޮފް އިކޮނަމިކް ޑިވަލަޕްމަންޓް ޓްރާންސްޕޯޓް އެންޑް ޓްރޭޑް މުހައްމަދު ސައީދު ވިދާޅުވެއްޖެއެވެ. 

މިނިސްޓަރ ސައީދު މިފަދައިން ވިދާޅުވީ ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް ކުރެއްވި ސުވާލަށް ޖަވާބުދެއްވަމުންނެވެ. 

މެންބަރުގެ ސުވާލަށް ޖަވާބުދެއްވަމުން މިނިސްޓަރ ސައީދު ވިދާޅުވީ ރައީސް ޑރ. މުހައްމަދު މުއިއްޒުގެ ސަރުކާރުން ރައްޔިތުންނަށް ދިމާވާ ދަތިތައް ހައްލުކުރުމަށްޓަކައި ފުޅާކުރަންޖެހުނު މަގެއް ފުޅާ ކުރަމުންދާނެ ކަމަށެވެ. 

މާލޭގެ އުތުރުފަރާތުގެ ބޮޑުތަކުރުފާނު މަގު ޒަމާނީ ފެންވަރަށް ތަރައްގީކޮށް ފުޅާކުރުމުގެ މަސައްކަތް ފެށީ ރައީސް ޑރ. މުއިއްޒުގެ ސަރުކާރުންނެވެ. އެގޮތުން މިއަހަރުގެ ރަމަޟާން މަހުގެ ކުރިން މާލޭގެ މާރުކޭޓް ހިމެނޭ ސަރަަހައްދު ފުޅާކުރުމުގެ މަސައްކަތް ނިންމާފައިވާއިރު، މިހާރު ކުރަމުންދަނީ އެމްޓީސީސީ ހެންވޭރު ޓާމިނަލް އިން ފެށިގެން ރަސްމީ ފާލަމާ ހަމައަށް މަގު ފުޅާކޮށް ތަރައްގީ ކުރުމުގެ މަސައްކަތެވެ. 

މި މަޝްރޫޢު (ފޭސް 1) ގެ ދަށުން ޝީޓް ޕައިލް އިންސްޓޯލް ކުރުމުގެ މަސައްކަތުގެ 100 އިންސައްތަ މަސައްކަތް ކާމިޔާބުކަމާއެކު ނިމިފައިވާކަމަށް މި މަސައްކަތް ކުރަމުން އަންނަ އެމްޓީސީސީއިން ވަނީ ބުނެފަ އެވެ. 

ސެގްމެންޓް 4 އަދި 5 ގެ ސަބް ބޭސް މަސައްކަތްތައް ނިމުމާއެކު، އެގްރިގޭޓް ބޭސް ކޯސް (އޭބީސީ) އެޅުމުގެ މަސައްކަތް މިހާރު ކުރިއަށްދާއިރު، ތާރުއެޅުމުގެ މަސައްކަތް ފެށުމަށް ހަމަޖެހިފައިވަނީ 7 ޖުލައި 2026 ގައެވެ.