ޖަރުމަނުގެ ކޯޗުކަމުގެ މަގާމުގައި ދެމިހުންނަން ބޭނުންވާ ކަމަށް އެ ޓީމުގެ ކޯޗު ހޫލިއަން ނާގަލްސްމަން ބުނެފިއެވެ. މިކަން އޭނާ ހާމަކުރީ ފީފާ ވޯލްޑް ކަޕް 2026 ގެ ދެވަނަ ބުރުގައި، އެންމެން ހައިރާންކޮށްލުމަށްފަހު ޕެނަލްޓީ ޖަހައިގެން ޕެރަގުއޭ އަތުން ބަލިވެ، މުބާރާތުން ކެޓުމާ ގުޅިގެންނެވެ.

އުމުރުން 38 އަހަރުގެ ނާގަލްސްމަން އަކީ ވޭތުވެދިޔަ 40 އަހަރު ދުވަހުގެ ތެރޭގައި ވޯލްޑް ކަޕެއްގެ ނޮކްއައުޓް މަރުހަލާގައި ޓީމަކަށް އިރުޝާދުދިން އެންމެ ޒުވާން ކޯޗެވެ. އޭނާ 2023 ވަނަ އަހަރު ޓީމާ ހަވާލުވި ނަމަވެސް، 2018 އަދި 2022 ވަނަ އަހަރުގެ ވޯލްޑް ކަޕުގެ ގްރޫޕް ސްޓޭޖުން ކެޓުމަށްފަހު، މި ފަހަރުވެސް ޖަރުމަން މުބާރާތުން އަވަހަށް ވަކިވާން ޖެހުމުން، އޭނާގެ މުސްތަގުބަލާ މެދު ވަނީ ސުވާލު އުފެދިފައެވެ.

މުބާރާތް ފެށުމުގެ ކުރިން ނާގަލްސްމަން ތަކުރާރުކޮށް ބުނަމުންދިޔައީ، ފަސްވަނަ ފަހަރަށް ތަށި ކާމިޔާބުކޮށް ޖަރުމަނުގެ ގެއްލިފައިވާ މަގާމު އަލުން ހޯދައިދޭނެ ކަމަށެވެ. އެކަމަކު ފުރަތަމަ ވޯލްޑް ކަޕުގައި ކުރިމަތިވި މި ނާކާމިޔާބީއާއެކު، މަގާމުގައި ދެމިހުރުމަށް އޭނާއަށް މިވަނީ ބޮޑެތި ގޮންޖެހުންތަކަކާ ކުރިމަތިލާން ޖެހިފައެވެ. ނާގަލްސްމަންގެ އިރުޝާދުގެ ދަށުން ޖަރުމަނު ވަނީ ޔޫރޯ 2024 ގެ ކުއާޓާ ފައިނަލާ ހަމައަށް ދަތުރުކޮށްފައެވެ.

އޭނާގެ މުސްތަގުބަލާ ގުޅޭގޮތުން ނާގަލްސްމަން ބުނީ، "މިއީ މިހާރު އަހަރެންގެ އަތްމަތީގައި އޮތް ކަމެއް ނޫން، އެކަމަކު ފުރުސަތު ދީފިނަމަ އަހަރެން މިހުރީ ތައްޔާރަށް. އެހެން ގޮތަކަށް ކަންތައް ކުރަން ބޭނުންވާ ބަޔަކު ތިބިނަމަ، އެކަން އަހަރެން ގާތު ބުނަންޖެހޭނެ. އަހަރެން ބޭނުމީ ކުރިއަށްދާން،" ކަމަށެވެ.

މީގެ އިތުރުން އޭނާ ބުނީ، "އަހަރެންނަކީ ކަންކަމުން ފިލައިގެން ދާނެ މީހެއް ނޫން. އަހަރެން ބޭނުންވަނީ މަސައްކަތުގައި ދެމިހުންނަން، އެކަމަކު ފުޓްބޯޅައިގައި ހުރިހާ ކަމެއް އަބަދު ކޮންޓްރޯލެއް ނުކުރެވޭނެ. ޖަރުމަނުގެ ފުޓްބޯޅަ އެސޯސިއޭޝަނުން ބޭނުންވާނަމަ، ޔޫރަޕިއަން ޗެމްޕިއަންޝިޕާއި ނޭޝަންސް ލީގަށް ޓީމު ތައްޔާރުކުރުމުގެ މަސައްކަތް އަހަރެން ފަށާނަން،" ކަމަށެވެ.

މިއީ ވޯލްޑް ކަޕުގެ ތާރީޚުގައި ޕެނަލްޓީ ޝޫޓްއައުޓަކުން ޖަރުމަން ބަލިވި ފުރަތަމަ ފަހަރެވެ. މީގެ ކުރިން ޖަރުމަނަކީ ޕެނަލްޓީ ޖެހުމުގައި ނުހަނު އިތުބާރު އޮތް ޓީމެކެވެ. ނަމަވެސް މި މެޗުގައި ކައި ހާވާޓްޒް، ނިކް ވޮލްޓެމޭޑް އަދި ޖޮނަތަން ޓާ ޖެހި ޕެނަލްޓީތައް ކާމިޔާބު ނުވުމުން، ސްޓޭޑިއަމްގައި ތިބި ސަޕޯޓަރުންނާއި، ޖަރުމަނުގައި ތިބި އެތައް މިލިއަން ބަޔަކަށް ވަނީ ބޮޑު މާޔޫސްކަމެއް ލިބިފައެވެ.

2014 ވަނަ އަހަރު ހަތަރުވަނަ ފަހަރަށް ވޯލްޑް ކަޕް ކާމިޔާބުކުރި ފަހުން، ބައިނަލްއަގުވާމީ ބޮޑު މުބާރާތެއްގެ ފައިނަލަކާ ހަމައަށް ވާސިލުވުމުގައި ޖަރުމަނަށް ވަނީ ބޮޑެތި ނާކާމިޔާބީތަކެއް ކުރިމަތިވެފައެވެ.

ނާގަލްސްމަން އިތުރަށް ބުނި ގޮތުގައި، މި މުބާރާތުގައި މިއަށްވުރެ ރަނގަޅު ނަތީޖާއެއް ހޯދުމުގެ ފުރުސަތު އޮތެވެ. "އަހަރެމެން ބޭނުންވީ ގަދަ 16 ގައި ފްރާންސާ ދެކޮޅަށް ކުޅެ އަހަރެމެންގެ ފެންވަރު ބަލަން. އެކަމަކު މިހާރު މި އޮތް ގޮތުން، މިއީ އެންމެ އެކަށީގެންވާ ނަތީޖާއެއް ނޫން،" އޭނާ ބުންޏެވެ.