ޝަހީދުވާ ފަރާތްތަކުގެ އާއިލާތަކަށް "ޝަހީދުންގެ ހިޔާ" ސޯޝަލް ހައުސިންގ މަޝްރޫޢެއް ފައްޓަވާނެ ކަމަށް ރައީސް ޑޮކްޓަރ މުހައްމަދު މުއިއްޒު މިރޭ އިޢުލާނު ކުރައްވައިފިއެވެ.

ނަސްރުގެ ދުވަހުގެ ރަސްމީ ޖަލްސާގައި ވާހަކަފުޅު ދައްކަވަމުން ރައީސް މުޢިއްޒު ވިދާޅުވީ ނޮވެމްބަރު 3 ގައި ސިފައިންގެ އަށް ބޭކަލުންނާއި އާންމު ރައްޔިތުންގެ ތެރޭން ޝަހީދުވެގެންދިޔަ 11 ކޭކަލުންނާ އެކު، ޖުމްލަ 19 ދިވެހިން ވަނީ ޝަހީދުކޮށްލާފައި ކަމަށެވެ. އަދި ހަމަ އެއާއެކު،  1970 ގެ އަހަރުތަކުން ފެށިގެން ސިފައިންގެ ހިސާބުތައް ހޯއްދެވި އިރު، އެކި ފަހަރު މަތިން ޝަހީދުވި މީހުންގެ އަދަދުތައް ހޯއްދަވާފައިވާ ކަމަށް ރައީސް ވިދާޅުވި އެވެ.

"މިގޮތުން ބަލާއިރު، 29 ސިފައިން މިދިޔަ 40 އަހަރު ތެރޭގައި އެކި ހާދިސާތަކުގައި އަދި ފުލުހުންގެ ދެ މީހުންނާއި މިދެންނެވި 11 އާންމުންނާ އެކީގައި ވަނީ ޝަހީދުވެފައި. އެހެން ނަމަވެސް އެއްވެސް ކަމެއް އެ ބޭފުޅުންގެ އާއިލާތަކަށް ކޮށްދެވިފައެއް ނުވޭ. އަމުދުން ފަހަކަށް އައިސް މި ފަރާތްތަކުގެ އަގު ވަޒަން ކުރާކަށް އެއްވެސް ކަމެއް ކޮށްދީފައެއް ނުވޭ. ކުރީގައި ޝަހީދުންގެ އާއިލާތަކަށް ކޮންމެވެސް ކަހަލަ ފައިސާގެ އެހީއެއް ދޭ. ނަމަވެސް ފަހަކަށް އައިސް އެކަން ވެސް ވަނީ ހުއްޓިފައި،" ރައީސް މުއިއްޒުގެ ވެރިކަމުގައި ފާހަގަ ކުރާ ފުރަތަަމަ ނަސްރުގެ ދުވަހުގެ ކުލަގަދަ ޖަލްސާގައި އެމަނިކުފާން ވިދާވި އެވެ.

އަދި ހަމަ އެއާއެކީގައި، ޝަހީދުވީ އާއިލާތަކަށް ހާއްސަކޮށް ޝަހީދުވި ފަރާތްތަކަށް ހާއްސަކުރެވިގެން ހައުސިން ޕްރޮގްރާމެއް ޝަހީދުންގެ ހިޔާގެ ނަމުގައި 50 ހައުސިން ޔުނިޓު ހިމެނޭ ހައުސިން އިމާރާތެއް ކުރިއަށް އޮތް އަހަރުތަކުގައި ތެރޭގައި އަޅާ ނިންމާ މި އާއިލާތަކަށް ހަވާލު ކުރާނަން ކަމަށް ރައީސް މުޢިއްޒު ވިދާޅުވި އެވެ.

މީގެ އިތުރުން، ރައީސް މުޢިއްޒު ވިދާޅުވީ ކުރިއަށް އޮތް ދުވަސްތަކުގައި ސިފައިންގެ އަދި ފުލުހުންގެ ހިދުމަތަށް ވަންނަ ފަރާތްތަކަކީ ކުރިއަށް ވުރެ ވެސް ބޮޑަށް ޤައުމަށް ދިމާވާ ކަންކަމުގައި ނިކަން ހުޝިޔާރު، ޤައުމަށް ބޭނުންޖެހޭ ހުރިހާ ކަމެއްގެ ތަމްރީނު ލިބިފައިވާ ބަޔަކަށް ހެދިގެން ދާނެކަމަށެވެ. ސިފައިންގެ ޚިދުމަތަށް ވަނުމަކީ ކެރިއަރ އޮޕްޝަނެއްގެ ގޮތުގައި، އުފަލާއެކީ ވަނަން ހިތްވާ ތަނަކަށް ހެދުމަކީ މި ސަރުކާރުގެ އަޒުމެއްކަމުގަ އެވެ.

އެކި ދާއިރާތަކުން އެކި ކަހަލަ ތަމްރީނުތައް ސިފައިންނަށް ދިނުމަކީ ކުރެވޭނެ ކަމެއްކަމަށާއި އެކަން ޤާއިމު ކުރަން ބޭނުންވާކަން ރައީސް ހާމަކުރެއްވި އެވެ. 

ކުރިއަށް އޮތް ދުވަސްތަކުގައި ކެޕޭސިޓީ ބިލްޑް ކުރުމުގެ ގިނަ ކަންތައްތަކެއް ކުރެވިގެން ދާނެ ކަމަށް ރައީސް މުޢިއްޒު ވިދާޅުވިއެވެ. މިހާރު ދެކުނު އަދި އުތުރު ސަރަޙައްދުގައި އެއަރބޭސް ޤާއިމު ކުރުމުގެ މަސައްކަތް ބާރު ސްޕީޑުގައި ކުރިއަށްދާ ކަމަށާއި މަސައްކަތް ވަރަށް އަވަހަށް ނިމޭނެ ކަމަށާއި، އުތުރުގައި އެފަދަ އެއްތަން ހެދިގެން ދާނެ ކަމަށް ވެސް ރައީސް ވިދާޅުވިއެވެ.